Job 14 - Bible in Tzeltal de Oxchuc y Tenejapa

¹ “Te winic ayinem ta swenta antse, mero com te xcuxlejale, soc bayal wocol ya xtal ta stojol.

² Jich nax te bit'il nichim ya xt'ome, pero ya sayub ta ora; ya xc'ax bael, ora ya xch'ay bael, ja' pajal soc te axinale.

³ ¿Pero ja' bal awac'oj asit ta stojol te winique, ya bal awic' ta chajbajibal ta ora?

⁴ Ma'yuc mach'a ya spas te ay bila lec ya xloc' yu'un a te bila ma lecuque.

⁵ Teme melel te ja'at nix ya awajtaybey te jayeb c'aal ya xcuxin te winique, teme ja'at ya awac'bey seña te banti ma xju' ya xc'axe,

⁶ q'ueja asit ta stojol, ac'a lamajuc q'uinal ta stojol, ijq'uitaya, ac'a yaiybey yutsilal ta xcuxlejal te stojol ta at'ele.

⁷ “Te c'alal ya yich' ts'etel te', ya to jmaliybeytic spul stuquel, melel ay nix spul ya yac' a.

⁸ Manchuc me mero yijubenix te yisime, manchuc me c'a'emix ta lum te xchuman te'ele,

⁹ pero c'alal ya yaiybey siquil te ja'e, ya me xcha'yaxub xan jajch'el; ya me yac' xan yabenal jichuc unin wamal.

¹⁰ Yan te c'alal ya xlaj stuquel te winique jc'axel nax, ma xju' ta comel stuquel. ¿Banti ya xbajt' jiche te c'alal ya xlaje?

¹¹ “Te ya'lel te mar ya xju' ya xtup' bael, soc te muc'ul ja'etic ya xju' ya xtaquejic stuquelic.

¹² Pero te jayeb c'aal lec ay te ch'ulchane, te winic ma xloc' tel ta smuquenal stuquel, ma xcux yo'tan ta wayel c'oem stuquel.

¹³ “Ayuc bit'il ya anac'on bael ta yawil te lajele, te ja' to ya ana'on a te c'alal lamajix a te awilimba, yacuc awajtaybey sc'aalelal te bi ora ya ana'on xane.

¹⁴ Teme laj te winique, ¿ya to bal xcha'cuxin xan? Te jayeb c'aal cuxulone ya me jmaliy, ja' to te c'alal ya sta yorail te ya xc'ax te jwocole.

¹⁵ Ya awic'on, te jo'one ya me jac'bat te jichuque; bin nax me awo'tan ya awilon, melel ja'at la apason, Cajwal.

¹⁶ Teme ja' ya awac' asit ta yilel te juju-jtejc' ya xbeenone, ja' ma ba ya awilbon a te jmul te jichuque;

¹⁷ ya ach'aybon ta awo'tan te falta cu'un, pocbil ya xc'oon awu'un, ma'yuquix jmul a te jichuque.

¹⁸ “Te witstiquil ya xlajic ta jemts'ujel, te niwac tonetique ya xjelon yawilic.

¹⁹ Jich nix te bit'il ya xch'ulub ton yu'un te ja'e, soc jich te bit'il ya x'eanot ta ja'al te ts'ubil lume, jich ya alajinbey smuc'ul yo'tan te winique.

²⁰ Ya atsal ta jc'axel, ya aloq'ues ta slumal, jich ya xjin te sit-yelawe.

²¹ Teme lec sc'oplal c'ot te snich'nabe, ma ba ya yaiy; teme tal wocol ta stojolic, ma ba ya sna' stuquel;

²² ja' nax ya yaiy te xc'uxul te sbaq'uetal nixe, soc te smel-o'tan yu'un te swocol ta cuxinele —xi' te Job.