Job 13 - Bible in Tzeltal de Oxchuc y Tenejapa

¹ “Spisil in to, jo'on nix quiloj ta jsit, soc jo'on nix caiyoj ta jchiquin.

² Te bila ana'ojic te ja'exe, jna'oj uuc te jo'one; ma'yuc bila peq'uelon ta atojolic yu'un.

³ Pero ja' ya jc'an ya xc'opojon soc te Diose, ja' ya jc'an ya jnujp'in jba ta c'op soc te Mach'a Spisil ya xju' yu'une.

⁴ Te ja'exe ya amaquic ta lot te bila smelelile; jichex te bit'il doctoretic te ma xlecub jchameletic yu'unique.

⁵ Te yacuc xch'abex ta c'ope, ay wan ap'ijilic ya xcuyotex te jichuque.

⁶ “Wocoluc, aiybon awaiyic jc'op, co'tanuc ya awaiyic te bila ya cale.

⁷ ¿Te ja'exe ya bal acuyic te ya acoltayic ta c'op te Dios te bit'il yacalex ta lote? ¿Ya bal awac' abaic ta abatinel yu'un ta ac'opic te bit'il yacalex ta lo'laywaneje?

⁸ Te ja'ex q'uejel awac'oj abaic soc te Diose. Ya ac'anic te ja'ex ya xc'opojex yu'une,

⁹ pero ¿bi wan ya xc'ot ta pasel te yacuc spasex ta prueba te Diose? ¿Ya bal xju' ya alo'layic jich te bit'il te winique?

¹⁰ Teme seña nax apasoj abaic te ja'ex awac'oj abaic soque, ya me yac'beyex buen tulan comel.

¹¹ Te smuc'ul te Diose ya me xtal xiwel ta awo'tanic yu'un, soc ya xc'ub xiwel ya awaiyic yu'un.

¹² Te ac'opic ma'yuquix bila ya xtuun a, ja' pajal c'oem soc te ts'ubil lume; jich nax c'oem te bit'il joyob ts'ajc' pasbil ta ajch'al te ma xcoltaywane.

¹³ “Yo'tic, ch'abanic, ya xc'opojon; teme ay bi tal ta jtojole, ac'a me taluc, chican biluc a.

¹⁴ Ya me jloq'ues jba ta co'tan, chican bit'il ya xc'oon ta loq'uel soc te jcuxlejale.

¹⁵ Manchuc me ya smilon stuquel te Diose, pero te jo'one ma xyanaj co'tan, ja' me ay sc'oplal ta co'tan te ya jtejc'an jba ta stojol ta yalel te bila ya jcoltay jba a.

¹⁶ Tey ora ya jtaix a te jcolele, melel te mach'a amen yo'tan ma xju' ya x'och ta stojol stuquel.

¹⁷ Aiybon me awaiyic ta lec te bila ya calbeyex ta atojolique.

¹⁸ Yo'tic ay me bila ya calix ta jamal, chapalix c'opetic cu'un swenta jcolel, melel jna'oj te melel te bila ya cale.

¹⁹ Teme ay mach'a ya xju' ya yalbon te bila jmulineje, ac'a me c'opojuc; te jo'one ma'yuc bila ya cal yu'un soc ac'a lajucon.

²⁰ “Ja' nax cheb te bila ya jc'anbat ta atojol, Dios cu'un, ma ba ya jnac' jba ta atojol:

²¹ Ma xawac'bonix castigo, Cajwal, soc ma xawac' taluc bayal xiwel ta co'tan.

²² C'opojan neeluc, Cajwal, ya me jac'bat; o teme jo'on neel ya xc'opojone, ja'at me ya ajac'bon te jc'ope.

²³ Albon, Cajwal, ¿bitic a te jmulinej ta atojole? Ac'bon jna' bila mandalil te jc'axintayeje.

²⁴ ¿Bi yu'un ya anac' aba ta jtojol? ¿Bi yu'un te jich c'oemon awu'un te bit'il acontro?

²⁵ Jichon bit'il yabenal te' te ya xlicot yu'un te iq'ue. ¿Bi yu'un ya ac'an ya alajinon? Ja' nax pajalon soc te taquin ac. ¿Bi yu'un te ya anutsone?

²⁶ Mero xc'uxul xch'aal leel ta mulil ay awu'un ta jtojol; ya awich'bon ta wenta te faltaetic cu'un c'alal to ta jqueremil.

²⁷ Ya axojbon cadena ta cacan c'oem, ya awil te c'alal ya xbeenone, ya atsajtaybon te juju-jtejc' ya xbeenone.

²⁸ Yaconix ta lajel, jich te bit'il ay bila yaquix ta c'a'ele, jichon te bit'il c'u'il te ya xlaj ta chane.