Job 12 - Bible in Tzeltal de Oxchuc y Tenejapa

¹ La sjac' xan te Job:

² —Melel ja'ex te sc'opex te lume, te c'alal ya xlajex, tey ora ya xlaj a te p'ijil-o'tanile.

³ Pero te jo'one ay sp'ijil co'tan uuc, ma'yuc banti peq'uelon awu'unic. ¿Mach'a ma ba sna'oj spisil te bitic awalojique?

⁴ “Manchuc me ma'yuc bila jpasoj soc manchuc me toj ayon, soc ta yan c'aal la yaiybon te Dios te la calbey wocole, yo'tic te camigotac ya stse'luyonic.

⁵ Te mach'a jun yo'tan aye, ya yilay te mach'a ay wocol ta stojole; ma swentauc teme la scotp'in xan bael te mach'a yalelixe.

⁶ Te j'eleq'uetic lamal q'uinal ya yaiyic ta snaic; te mach'atic ya scontroinic te Diose, ma'yuc falta ya yaiyic stuquelic, ya scuy te ayic ta sc'ab te Diose.

⁷ Jojc'obeya awaiy te chambalametic, jojc'obeya awaiy te mutetique; ya xju' yu'unic te ya yac'bat anope.

⁸ Soc nix te lumq'uinal soc te chayetic ta mar, ay permiso te ya ac'anbey te ya sp'ijubtesate.

⁹ ¿Yu'un bal ay to mach'a ma ba sna'oj jiche te Dios la spas ta sc'ab spisil te bitic aye?

¹⁰ Ja' yich'oj ta sc'ab te cuxlejale, ja' cuxul yu'un spisil te bitic cuxajtique.

¹¹ Te chiquinil ya yaiy te bit'il ay te c'opetique; ja' nix jich te quejtique, ya yaiybey sbujts' te bila ay sbujts'e.

¹² “Te mamaletic ay sp'ijil yo'tanic; ja' ac'bot sp'ijilic yu'un te ya'wilalique.

¹³ Pero te Diose ay sp'ijil soc spisil ya xju' yu'un stuquel. Ay bila ya xchap, soc te bila ya xchape, ya xc'ot ta pasel yu'un.

¹⁴ Te bila ya sjin te Diose, ma'yuc mach'a ya xju' yu'un ya xcha'pas xan stuquel. Te mach'a Dios ya xmacot yu'une, ma'yuc mach'a ya xju' ya yac' ta libre yan buelta.

¹⁵ Teme ya scom te ja'ale, spisil ya xtaquej te bitic aye; teme ya yal mandal ya xtal bayale, ya xnoj ta ja' te lumq'uinale.

¹⁶ Ta swenta yu'el ya yaiy tsalaw stuquel te Diose. Ja' nix swentainej te mach'a lo'laybil soc swentainej te jlo'laywaneje.

¹⁷ Ja' ya yac' ch'ayuc sp'ijil yo'tan te jp'ijil-o'tanetique, soc ja' ya yac' jowejuc sjolic te juecetique.

¹⁸ Ya xju' ya sloq'uesbey yat'el muc'ul ajwaliletic, soc ya xju' t'anal a ya yac' bael ta chuquel.

¹⁹ Ya xju' yu'un ya sloq'uesbey yat'el sacerdoteetic, soc ya spejc'an te mach'a muc' sc'oplalique.

²⁰ Ya scom ta c'op te jtac'uywanejetique, ya spojbey sp'ijil te jchajbanwanej-mamaletique.

²¹ Ya scom ta ich'el ta muc' te mach'atic ich'bilic ta muq'ue, soc ya spejc'anbey yipic te mach'atic ay bayal yipique.

²² Ya yac' ta na'el te bila mero mucbil ta o'tanile, soc ya sloq'ues ta saquil q'uinal te bitic ayic ta ijc' q'uinale.

²³ Ya xju' ya smuc'tes soc ya xju' ya slajin te nacionetique, ya xju' ya spuc bael soc ya stsob xan tel.

²⁴ Ya scombey sp'ijil yo'tanic jwentainwanejetic ta nación, soc ya yac' ch'ayuquic ta jochol taquin q'uinal te banti ma'yuc be ya staique,

²⁵ te banti xjuchlajan ya xbeenic ta ijc' q'uinale, soc te banti xtal xbajt' ta beel jichuc jyacubeletique.