Job 11 - Bible in Tzeltal de Oxchuc y Tenejapa

¹ La sjac' te Zofar te naamat-winique:

² —Spisil te aiyejetic in to sujt'ib me ya sc'an. Manchuc me bayal ya xc'opoje, ma ja'uc ya yac' ta na'el te bila melele.

³ ¿Ya bal acuy te scaj te bayal ya xc'opojat te jich ya jquejch'an jbatic ta c'ope? ¿Ya bal acuy te ma'yuc sujt'ib cu'untic te ac'op ta labanwaneje?

⁴ Ja'at ya awal te buen toj te nopjibal awu'une, soc ja'at nix ya awal aba te ma'yuc bila amulineje.

⁵ Ayuc bit'il ja' ya sjac'bat te Diose.

⁶ Ja' me ya yac'bat ana' te muquen c'op soc te p'ijil-o'tanil, te mero wocol ta na'el swentaile. Jich me ya ana' a te ma c'axemuc jich ya yac'bat castigo a te Dios te bit'il te amul ataoje.

⁷ “¿Ya bal acuy te ya xju' ya x'ochat a te bitic muquen ay ta yo'tan te Diose, te ya xju' awu'un stael ta na'el smuc'ul te Mach'a Spisil ya xju' yu'une?

⁸ ¿Bi ya xju' awu'un spasel? Melel c'axem jichic stoyolil a te bit'il stoyolil te ch'ulchane ¿Bi ya xju' awu'un sna'el? Melel c'axem jichic sc'ubulil a te bit'il te muquenale.

⁹ C'axem jichic smuc'ul a te bit'il te lumq'uinale, c'axem jichic sjamalul a te bit'il sjamalul mar.

¹⁰ Teme tal te Diose, teme ic'awan ta chajbanwaneje, soc teme ya yac' castigo, ¿mach'a ya xju' yu'un scomel?

¹¹ Sna'oj stuquel mach'a a te ya spas lote; ya yil te bila amen ya yich' pasele. ¿O ma ba ya sna' ta ac'op?

¹² Te bi c'aalil ya xyanaj te ja'mal burroe, ja' to me ya sna' q'uinal a te bol-o'tan winique.

¹³ Nopa ta awo'tan te toj ya awaq'uix aba, c'opojan ta yalel wocol ta stojol Dios.

¹⁴ Teme acuchoj amule, ch'aya me jilel; ma me xawac' ta ana te bila amene.

¹⁵ Jich me jun awo'tan ya xju' ya atoy asit, lamal me awo'tan ya x'ainat, soc ma ba ya xtalix xiwel ta awo'tan.

¹⁶ Ya me ach'ay ta awo'tan spisil te bitic la yac'bat awocole; jich me xach'ay bael te bit'il ya x'oquin bael te ja'e.

¹⁷ Te acuxlejal c'ax me jichix xojobil c'oem a te bit'il te c'aal ta olil c'aale. Te awocol yac'ojat ta ijc' q'uinal c'oem, jich me ya xc'oatix te bit'il ayat ta sacubel q'uinale.

¹⁸ Ay me bila ya amaliy, jun me awo'tan ya x'ainat; Dios me ya scanantayat, jun me awo'tan ya xwayat.

¹⁹ Ma me ayuc bila ya xiwtesat te c'alal ya acux awo'tane. Ay tsobol mach'atic ya xtal sc'anic c'uxtayel awu'un.

²⁰ Yan te mach'atic amenic ya me sleic coltayel, pero ma ba ya staic stuquelic. Ma staic ta banti ya snac' sbaic, ja' nax me ya smaliyic te lajel ya xc'ot ta swentaique —xi' te Zofar.