Job 10 - Bible in Tzeltal de Oxchuc y Tenejapa

¹ “C'axix co'tan yu'un te jcuxlejale, ma jc'anix te cuxulone. Ya me xc'opojon ta yalel ta jamal te bitic ay jwocol yu'une, ya me cal ta jamal te bitic ch'aubenix co'tan yu'une.

² Dios cu'un, ma me xaucat ta jtojol: “Ay amul”. Albon te bila jmulinej awu'un.

³ Ja'at nix la apason atuquel. ¿Lec bal ya awaiy jiche te ya awuts'inon soc te ya awilayone soc lec bal awo'tan yu'un te bila chapal yu'unic te mach'atic amenique?

⁴ ¿Yu'un bal jich ya awil bitic ay te bit'il ya yil te winiquetique?

⁵ ¿Yu'un bal jich nax snajt'il acuxlejal te bit'il te winic te ya xlaje?

⁶ ¿Bi yu'un yacat ta sleel te bila falta jtaoje, te yacat ta sleel te bila mulil jtaoje,

⁷ manchuc me ana'oj te ma'yuc te jmule, soc te ma'yuc mach'a ya xju' ya scoltayon ta ac'abe?

⁸ Ja'at la apason ta ac'ab, pero yo'tic ja'at nix ya ac'an te ya alajinon yan buelta.

⁹ Te yacuc xtal ta awo'tan te ts'ubil lum te la apasone. ¿Ya bal acha'sutp'inon ta ts'ubil lum yan buelta?

¹⁰ Ja'at la awac' tulanubuc te jbaq'uetale, jich te bit'il ya xtulanub te queso te c'alal ya ston sba te leche.

¹¹ La apotson ta baq'uet soc ta nujc'ul, soc la awac'bey sjal sba soc tulan chietic te jbaquele.

¹² La awac'bon jcuxlejal, c'ux la awaiyon ta awo'tan, soc la acanantayon atuquel, jich cuxulon awu'un.

¹³ Pero yo'tic ya quil te ay bila anopoj te muquen ay ta awo'tane:

¹⁴ ya atsajtayon awil teme ya jle jmule, swenta yu'un jich ya awac'on bael ta castigo yu'un a te falta cu'une.

¹⁵ Teme ay jtaoj te jmule, ch'ayemonix yu'un jiche; pero teme ma'yuc te jmule, ma yu'unuc bin nax co'tan yu'un, melel mero apejc'anejon ta atojol soc mero ma'yuc quip ta atojol.

¹⁶ Teme ya jtoy jbae, ja'at ya anutson jichuc león-choj, asta ya awac' ta ilel awu'el ta alajinbelon yu'un.

¹⁷ Ma spas falta testigoetic yu'un ya slebonic jmul ta atojol. Jich ya xtoy xan awilimba ta jtojol; jich bit'il jchajp soldado, ya awac'bon guerra spisil ora.

¹⁸ “¿Bistuc la awac' ayinucon? Ja' lec te lajucon ta ora, jich ma'yuc mach'a la yilonix a te jichuque.

¹⁹ Ja' lec ta xch'ujt'uc to jme' c'axon bael ta muquenale; jich c'oon a te bit'il jc'axel ma ba talon ta balumilale.

²⁰ Melel mero com te jcuxlejale, ja' yu'un ac'bonix lamal q'uinal. Ac'bon lecubuc q'uinal caiy jtebuc

²¹ te ma to ba staoj yorail te ya xboon te banti bael yacone, ja' te ma'yuquix bi ora ya sujt'on tel, melel ya xboon te banti ma'yuc saquil q'uinal, tey ta banti ay ijc' q'uinale,

²² ta banti lum ay puro axinal, ta banti ma'yuquix bila toj aye, te banti pajalix soc saquil q'uinal yilel te yijc'al q'uinale —xi' te Job.