Job 1 - Bible in Tzeltal de Oxchuc y Tenejapa

Dios la yac' taluc wocol ta stojol Job

¹ Ta sq'uinal Uz nain jtul winic, Job sbiil. Buen toj yo'tan ain ta stojol Dios, ma'yuc bila amen spasoj stuquel. Soc mero jun yo'tan la yac' sba ta abatinel yu'un te Diose; mero la stsajtay sba ta lec, soc ma'yuc bila amen la spasbey ta stojol yantic.

² Te Job ayin juqueb squerem-nich'nab soc oxeb yantsil-nich'nab.

³ Ay esmaj jucmil (7,000) chijetic yu'un, oxmil (3,000) camelloetic, jo'winic xcha'bajc' (500) ta jchajp j'at'el-wacaxetic, soc jo'winic xcha'bajc' (500) ta jcojt' me' burraetic yu'un. Ay mero bayal manbil abatetic. Mero jc'ulej te winique, c'ax jich a te bit'il yantic te ainemic ta stojol sloq'uib c'aale.

⁴ Te snich'nab te Job costumbre yu'unic te ya spasic te q'uine, ya stsob sbaic ta we'el ta jujun snaic, xmelmon ya xbajt' yu'unic asta ya sts'acaj yu'unic. Te c'alal ya stsob sbaique, spisil ora ya yiq'uic te oxeb yantsilelique.

⁵ Te c'alal ya xlaj te q'uin yu'unic ta jujun snaic te snich'nab te Jobe, ya stsob te snich'nabe. Ta buen sab ya xjajch', ya yac'bey milbil smajt'an Dios te ya yich' chiq'uel ta scojt'ol yu'un ta juju-jtul te snich'nabe, swenta yu'un jich ya yich'ic lecubtesel yu'un smulic a. Jich la spas spisil ora te Job, la yal ta yo'tan teme repente ay staoj smulic te snich'nabe. Soc teme ay la yixtac'optayic Dios ta yo'tanique.

⁶ Ay jun c'aal te la sta yorail te ba stejc'an sbaic ta stojol Cajwaltic spisilic te abatetic yu'un te ayic ta ch'ulchane. Tey c'ot uuc a te Satanase.

⁷ Jojc'obot yu'un te Cajwaltique: —¿Banti talat? —xi' sc'oplal yu'un. Te Satanase la sjac': —Ayon ta beel ta yoclinel spamal te balumilale —xi'.

⁸ Jich albot yu'un te Cajwaltic: —¿La bal awilbon te cabat Job? Ma'yuc mach'a yan jich pajal soc ta balumilal te mero jun yo'tan yac'oj sba ta abatinel ta jtojole, soc te mero toj yo'tan cuxul ta q'uinale. Ma'yuc bila amen spasoj, soc stsajtayej sba te ma'yuc mach'a ya yuts'in ta q'uinal stuquele —xi'.

⁹ Pero te Satanás jich la yal: —A, pero ma tojoluc te mero jun yo'tan yac'oj sba ta abatinel awu'une.

¹⁰ Te ja'at ma xawac' te ay bila ya xtaot yu'un, ni ja'uc te mach'atic ay yu'un, soc ni ja'uc te bitic ay yu'une. Ja'at ya awac'bey bendición spisil te bitic ya spase. Ja' nax mero jc'ulej winic ta swenta te xchamsbalam.

¹¹ Pero te yacuc apojbey spisil te bitic ay yu'une, ya me awil te ya xjajch' yixtac'optayate —xi'.

¹² Te Cajwaltic jich la yalbey te Satanase: —Lec ay jiche, pasa spisil te bila ya sc'an awo'tan ta stojol te sbiluc te Job, pero ma me ayuc bila amen xapasbey stuquel —la yut. Jich te Satanás loc' bael ta stojol te Cajwaltique.

¹³ Ay jun c'aal, te c'alal yacalic ta pas-q'uin ta sna smuc'ul banquilic a te squerem-nich'nab soc yantsil-nich'nab Job,

¹⁴ jtul winic c'ot ta sna, jich c'o yalbey: —Te c'alal yacalotic ta at'el ta sjoq'uel lum soc wacax a, soc yacalic ta we'el ta nopol a te me' burraetique,

¹⁵ ora nax c'otic te sabeoetic, la yelc'anic bael te chambalametic, la smilic jilel ta puñal te winiquetique. Jo'on xanix colon jilel te tal calbat awaiye —xi'.

¹⁶ Ma to xlaj yo'tan ta c'op a te winique, c'ot yan winic, jich c'o yal: —Yal tel c'ajc' ta ch'ulchan, spisil lajinotic te jcanan-chijetic, soc laj spisilic te chijetique. Jo'on xanix colon jilel te tal calbat awaiye —xi'.

¹⁷ Ma to xlaj yo'tan ta c'op a te winique, c'ot yan swenta yoxebal, jich c'o yal: —Oxchajp caldeoetic ta sc'ajc'al yo'tanic la yelc'anic bael te camelloetic, soc la smilic ta puñal te winiquetique. Jo'on xanix colon jilel te tal calbat awaiye —xi'.

¹⁸ Ma to xlaj yo'tan ta c'op a te winique, c'ot jtul xan yan, jich c'o yal: —Te aquerem-nich'nab soc te awantsil-nich'nab yacalic ta we'el swenta q'uin ta sna a te muc'ul banquilal.

¹⁹ Ora nax tal tulan ic' ta jochol taquin q'uinal, c'o syuc' ta xchanebal xujc' te nae, jich jin coel ta sbaic te anich'nabe. Laj ta spisilic. Jo'on xanix colon jilel te tal calbat awaiye —xi'.

²⁰ Te Job la stejc'an sba, bayal xc'uxul mel-o'tan la yaiy. La xch'i' sc'u' yu'un, la sjox te stsotsil sjole, la squejan sba ta lum, la sc'opon Dios.

²¹ Jich la yal: —T'analon a julon ta balumilal yu'un te jme'e, t'anal ya xsujt'on bael. Ja' nix la yac'bon spisil te Cajwaltic, ja' nix la yich'bon sujt'el. Jelawen yutsil xch'ul-biil stuquel te Cajwaltique —xi'.

²² Manchuc me ay bayal bila c'ot ta swenta, ma la sta smul ta stojol Dios te Jobe. Ma'yuc bila amen c'op la yalbey te Diose.