Jeremías 51 - Bible in Tzeltal de Oxchuc y Tenejapa

Chajbanel yu'un smul Babilonia

¹ Te Cajwaltic jich ya yal: —Ya jticun tel jinawanej ic' ta stojol Babilonia soc te caldeoetique.

² Te Babilonia ya me cac' te jich ya spasbot yu'un scontro te bit'il ya yich' wilesel ta ic' te trigoe; ya me cac' te ma'yuc yajwal ya xjil te sq'uinale. C'alal ya xc'ot sc'aalelal te swocole, ya me x'ac'bot guerra ta bayuc ta sjoylejal.

³ Ac'a xchajban st'imic te jt'imuywanejetique, soc ac'a slapic te smajq'uilic ta guerra. Ma me sna'beyic yo'bolil sbaic te queremetic ta Babilonia; ac'a slajinic ta jc'axel te soldadoetic yu'une.

⁴ Ta spamal slumal te caldeoetique, te ants-winiquetic limil me ya xjilic ta calleetic.

⁵ Te Israel soc Judá, manchuc me staoj smulic ta jtojol, soc teme nojel ta mulil yu'unic te slumale, ma ba pijt'esbilic cu'un, jo'on Ajwalilon, te Spisil ya xju' cu'une, te Ch'ul Dioson yu'un Israel.

⁶ “Ananic loq'uel ta Babilonia, coltaya abaic te mach'a ya xju' yu'une. Ma me xlajex yu'un te smulic stuquelique. Ja' yorail te ya cac'bey spacole, soc ya cac'bey stoj te bit'il ya sc'an te yat'ele.

⁷ Te Babilonia jich c'oem ta jc'ab bit'il vaso pasbil ta oro te la cac' yacubuc spisil ants-winiquetic a. Te nacionetic la yuch'ic te vino, soc ch'ayic ta q'uinal yu'un.

⁸ Ja'uc me to, ora nax a yal te Babilonia, wuyultic nax a c'ot. ¡Ochanic ta yoq'uetayel! Ich'beyaic tel xpoxil yu'un te yejch'ene, ya quiltic teme ya xcole —xi' te Cajwaltique.

⁹ La cac'beytiquix xpoxil te Babilonia; ja'uc me to, ma ba col yu'un. Ijq'uitayaic jilel, loc'ucotic bael li'to, boucotic ta jlumaltic juju-jtul. Melel te smule, c'oem c'alal ta ch'ulchan, jajch'em moel c'alal tocal.

¹⁰ Te Cajwaltic la yaiy tsalaw ta jwentatic. La'ic, ya xba caltic ta Sión te bila spasoj te Cajwaltic te Dios cu'untique.

¹¹ Te Cajwaltic ya sc'an sjin te Babilonia, soc la stijbeyix yo'tanic muc' ajwaliletic ta Media, jich nix ay ta yo'tanic. Ja'ix te spacol yu'un Cajwaltic te bila la spasbey te templo yu'une. Chajbanaic te yat'ejibal at'imique, soc chuca me ta ac'abic te amajq'uilique.

¹² Ac'beya seña yu'un yorailix guerra ta sjoyobal sts'ajc'ul te Babilonia. Ac'beyaic yip yo'tanic te soldadoetique. Ac'aic j'il-q'uinaletic tey a. Ac'a ta yawilic te mach'a ya snac' sbaic ta maliywanej. Melel te Cajwaltic la xchajban soc la sc'otes ta pasel, ja' te chapal yu'un te la yalbey sc'oplal te yajwal Babilonia.

¹³ Ja'at Babilonia, te ayat ta bay muc'ul ja'etic, soc bayal smuc'ul ac'ulejal, c'otix te alajibale, te slajibal te bit'il ayat ta q'uinale.

¹⁴ Te Cajwaltic te Spisil ya xju' yu'une, yaloj ta jamal stuquel: —Ya jnojesbat tel bayal acontrotac, jich bit'il c'ulubetic; soc ya me xc'ajinic ta tsalaw ta atojol —xi'.

C'ayoj ta yalbeyel wocol Dios

¹⁵ Te Cajwaltic, ta yu'el la spas te lumq'uinale; ta swenta sp'ijil, tulanajem yu'un te balumilale; ta swenta sp'ijil, la slim bael te ch'ulchane.

¹⁶ Ta swenta sc'op chawuc ya xc'opoj te ja' ay ta ch'ulchane; ya yac' xmo tel tocal c'alal ta sti'il balumilal; ya yac' xlem te tsantsewaletic ta yolil te ja'ale; ya sloq'ues tel ic' te bay q'uejbil yu'une.

¹⁷ Bol yo'tanic, ma sna'ic q'uinal ta spisil te ants-winiquetique. Te mach'a ya spas te loc'ombaetic ya me staic q'uexlal yu'un; melel puro lo'laywanej te yat'ele, ma ba cuxul te loc'omba ya spase.

¹⁸ Ma'yuc sc'oplal stuquel, swenta tse'luyel ayic; ta yorail chajbanel yu'un Cajwaltic ya me sjin.

¹⁹ Mero yan yilel stuquel a te Dios yu'un Jacob; jchicnanteswanej yu'un spisil te bitic aye. La stsa Israel te mero yu'un stuquele. “Ajwalil te Spisil ya xju' yu'un”, xi' te sbiile.

Cajwaltic la stuuntes Babilonia ta yaq'uel castigo

²⁰ Te Cajwaltic jich ya yal: —Babilonia ya jtuuntesat, cat'ejibat yu'un guerra, jich bit'il martillo. Ta awenta ja'at ya jwuy nacionetic, soc ya jinbey yat'el ajwaliletic.

²¹ Ja'at ta awenta ya jmil te caballoetic soc te mach'atic ya scajtijibinique, ya jin carretaetic soc te mach'atic ya xmoic a.

²² Ta awenta ya jmil winiquetic soc antsetic, mamaletic soc alaletic, queremetic soc ach'ixetic.

²³ Ta awenta ya jmil jcanan-chijetic soc te xchijique, te j'at'eletic ta q'uinal soc te joc'lum wacaxe, ajwaliletic soc te mach'atic yich'oj tulan yat'elique.

Castigo ta stojol Babilonia

²⁴ “Ta mero atojolic soc ta asitic te ja'exe, ya cac'bey stoj Babilonia soc spisil te caldeoetic, yu'un jich ya sc'an te bit'il amen bila la spasbey te Sión. Jo'on Ajwalilon, jich ya cal.

²⁵ Jcontroinejat ja'at, wits c'oemat swenta jinawanej, te ya ajin spamal te balumilale. Jo'on Ajwalilon, jich ya cal. Ya me jtoy jc'ab, ya cac'bat castigo. Ya jtselc'unat coel tel c'alal ta sba muc'ul tonetic, soc ya jc'atp'unat ta c'ajq'uem wits.

²⁶ Ni jp'ijuc stonil te jinem ts'ajq'uetic awu'un te ya xtuun xan ta pasel a te naetique. Jochol me ya xjilat sbajt'el q'uinal. Jo'on Ajwalilon, jich ya cal.

²⁷ “Ac'a chicnajuc bandera swenta guerra ta q'uinal; Oq'uesinaic oq'ues soc ac'a xchajban sbaic te nacionetic yu'un yaq'uel guerra te Babilonia. Jajch'anic nacionetic ta scontroinel, ja'at Ararat, Mini soc Askenaz. Tejc'anaic jtuluc mach'a ya xmandalaj yu'un guerra. Ac'a noptsajuc tel te caballoetique, jich bit'il te c'ajc'al c'ulubetique.

²⁸ Ac'a xchajban sbaic te nacionetic ta yaq'uel guerra; ac'a xchajban sbaic te muc' ajwaliletic yu'un Media, soc te sjo'tac ta ajwalil, te mach'atic yich'oj tulan yat'el yu'unic, soc te soldadoetic ta banti q'uinal wentainbil yu'unique —xi' te Cajwaltique.

²⁹ Te lumq'uinal ya xnijc' soc ya syuc' sba, melel yac ta c'oel ta pasel te bila xchapoj te Cajwaltique, ja' te ya xc'atp'uj te Babilonia ta jochol q'uinal te xiweltic sbae.

³⁰ Te soldado-babiloniaetic ma'yuc bay ya xloq'uix ta guerra, ya xjiliquix ta bay tulanil anjibal ts'ajc' yu'unic; lajix te yipique, jichiquix yilel te bit'il antsetique. Ochintayotiquix te lumetic yu'unic soc te snaic ac'biliquix sc'aal.

³¹ Xtal xbajt'ic nax te mach'atic ya yich'ic tel te c'ope, ta yalbeyel te muc' ajwalil yu'un Babilonia te jc'axel u'uninbilix te lum yu'une.

³² Te contro la yac' sbaic tey a ta bay tec'oja'e; la yac'bey sc'aal te anjibaletic te bay ya scoltay sbaique. Te soldadoetic yu'un Babilonia, noj xiwel ta yo'tanic.

³³ Melel te Cajwaltic te Spisil ya xju' yu'un, te Dios yu'un Israel, ya yal: —Babilonia, jich c'ot te bit'il yawil sloq'uesjibal sbac' trigo te bay ya yich' wuyel ta teq'uel te spat trigo ta yorail sloq'uesele; mero yorailix ya xc'ot sc'aalelal te ya awich'ix wuyel ta teq'uel c'oeme —xi'.

^34-35 Ya yal Jerusalén, te lum yu'un Sión: —Nabucodonosor, te muc' ajwalil yu'un Babilonia, wuyultic la yac'on, soc la sbic'on bael; jochol la yijq'uitayon jilel jichuc plato. Jich c'oem te bit'il muc'ul chan ta mar te la sbic'on baele; noj xch'ujt' yu'un a te bitic la smulanbone, te olil xane la xch'oj bael. Ac'a stoj Babilonia, te bayal la yuts'inone; ac'a stoj caldeoetic te ants-winiquetic la smilbonique —xi' me ta yalel.

Bi albot Israel

³⁶ Te Cajwaltic jich ya yal: —Jo'on me ya jchajbanat, ya me cac'bey spacol te acontrotaque. Taquin me ya quijq'uitay jilel ta jc'axel te muc'ul ja' soc te sloq'uibja'etic yu'un Babilonia.

³⁷ Busulbus me ya xjil te jinem ts'ajq'uetique; ja' me sna te ja'mal ts'i'etic ya xc'ot, ma me xju'ix nainel tey a, spisil mach'atic ya yilic, ya me x'ac'botic xiwtesel soc labanel te bit'il yan ta ilele.

³⁸ Spisil te babiloniaetic x'awetic nax me jichuc león-chojetic, x'awlajanic jichuc alal león-chojetic.

³⁹ C'alal ya xtoy xq'uixnal ya yaiyic, ay me bi ya cac'bey yuch'ic c'oem, ja' me te uch'balil te ya xyacubic yu'une, soc te ya xch'aybey q'uinal yaiyic yu'une. Jich me ya xch'ayic ta q'uinal yu'un swayelic sbajt'el q'uinal, te ma xwijc' sitic yu'une. Jo'on Ajwalilon, jich ya cal.

⁴⁰ Ya quic' bael ta miljibal, jich bit'il ya x'ic'ot bael alal chijetic, tentsunetic soc tat chijetic —xi' te Cajwaltique.

Laj Babilonia

⁴¹ Babilonia, ja' te lum te pujq'uem nax sc'oplal ta spamal balumilale, ochix ta lajel, la yich'ix stsalel. Ya me xiwic te nacionetic te ya yilique.

⁴² Mar c'oem te la smuc te Babilonia, la smuc soc te smuc'ul yipe.

⁴³ Te lumetic yu'une, c'atp'ujic ta jochol q'uinal xiweltic sba, taquin q'uinal, soc tan a jil. Ma'yuc mach'a ya xnainix, ma'yuc mach'a ya xc'axix tey a.

⁴⁴ Te Cajwaltic jich ya yal: —Ya me cac'bey castigo te lotil dios Bel ta Babilonia, ya cac'bey xejtay loq'uel te bila sbic'oj c'oeme. Te nacionetic ma xju' ya xbajt'iquix ta stojol; jiniquix ta sjoyobal sts'ajc'ul te Babilonia.

⁴⁵ Lum cu'un, loc'anix bael tey a; juju-jtul ac'a me scoltay sba loq'uel yu'un te sc'aal quilimbae.

⁴⁶ Ma me xnijc' awo'tanic, ma me xiwex yu'un te bi yacalic ta yalel ta lume. Jujun ja'wil yantic me te bila ay ta alel tey a, ja' sc'oplal woclajel ta spamal te lumq'uinale, soc te tsaltomba ya yac'bey sbaic te ajwaliletique.

⁴⁷ Jich yu'un, ya xtal sc'aalelal te ya cac'bey castigo te yajcananic ta Babilonia. Spamal te lume peq'uel me ya xjil, soc ya me xmujc' sbaq'uetalic te lajeme.

⁴⁸ Te ch'ulchan balumilale, spisil te bitic aye, bin nax me yo'tanic yu'un te c'alal ya x'och ta c'abal Babilonia, te c'alal ya xtal ta norte te jinawanejetic yu'une. Jo'on Ajwalilon, jich ya cal.

⁴⁹ Ta melel, te Babilonia ya me xjin, ja' ta scaj te animaetic yu'un Israel soc ta scaj te animaetic ta spamal te balumilale —xi' te Cajwaltique.

Sc'oplal judioetic te ayic ta Babilonia

⁵⁰ Ja'ex te colex loq'uel ta bay milel, ananic bael, mero ma me xtejc'ajex. Na'aic me te Cajwaltique, manchuc me c'ubul ayexix bael a, soc na'aic me te Jerusalén.

⁵¹ Ja'ex ya awalic: —Ay q'uexlal ya caiytic c'alal ya caiytic stojol te bit'il ya yixtac'optayotique. Ya xq'uexawotic, ya jmuc quelawtic yu'un; melel jyanlumetic ochemic bael c'alal ta awilal ch'ulajem ta templo —xaex.

⁵² Ja'uc me to, te Cajwaltic jich ya yal: —Ya me xtal sc'aalelal te ya cac'bey castigo lotil diosetic yu'un te Babilonia; ta spamal te sq'uinale, ya me x'ajc'anaj c'oem yu'un te yejch'enique.

⁵³ Manchuc me c'alal ta yolil ch'ulchan c'oem te Babilonia swenta yu'un toyol me ya xc'ot te tulanil anjibal ts'ajc' yu'une, ya me jticun bael ta jinel yu'un te scontrotaque. Jo'on Ajwalilon, jich ya cal —xi'.

Ya xjinot Babilonia

⁵⁴ Ta Babilonia ya xchicnaj awetic yu'un te xc'uxule; ta slumal caldeoetic ya xtoy sc'op te jinele.

⁵⁵ Ja' me te Cajwaltic, yac ta sjinel te Babilonia, soc ya xch'aybey ta jc'axel sc'op te yajwale. Te controetic yu'un, jich sc'opic te bit'il yip mar, ya me xlumtayot yu'unic.

⁵⁶ Talic ta sjinel te Babilonia; la xchucbeyiquix te soldadoetic yu'une, soc la slajinbeyic te st'imique. Melel te Cajwaltic, ja' te Dios te ya yac'bey stoj juju-jtul te bit'il nix ya sc'an te yat'ele.

⁵⁷ Te Muc' Ajwalil, te Ajwalil Spisil ya xju' yu'une, ya yalbey xan sc'oplal: —Ya me cac' xyacub te jtsobwanejetic yu'un Babilonia, te mach'atic p'ijic yu'un, soc te ajwaliletic, te mach'atic te tulan yat'el yich'ojic, soc te soldadoetique, ya me xyalic ta lum yu'un swayelic sbajt'el q'uinal te ma xwijq'uix sitic yu'une.

⁵⁸ Jo'on Ajwalilon te Spisil ya xju' cu'une, ya cal: Te spimil sts'ajc'ul ta sjoyobal Babilonia jc'axel me ya xjin coel ta jyalel; te smuc'ul yochibalic te ts'ajq'ue, ya me yich'ic chiq'uel. Tojol nax at'ejic te nacionetique, tojol nax swocolic yu'un lubel, melel ya xlaj ta c'ajq'uel spisil —xi'.

La yich'ic bael ta Babilonia sc'op Jeremías

⁵⁹ Ta xchanebal ja'wil yat'el ta ajwalil a te Sedequías, te muc' ajwalil yu'un Judá, te j'alwanej Jeremías ay bila la yac'bey bael te Seraías, snich'an Nerías, soc smam Maasías. Seraías la sjoin bael te muc' ajwalil Sedequías te bajt' ta Babilonia, te bit'il ja' ay ta swenta xchajbanel wayibal na yu'un te muc' ajwalile.

⁶⁰ Te Jeremías sts'ibuyejix jpajc' libro. Tey ts'ibubil a te sc'op te la yalbey sc'oplal spisil tulan woclajel ya xtal ta stojol te Babilonia.

⁶¹ Jich la yalbey te Seraías: —C'alal ya xc'oat ta Babilonia, p'ijan me ta yilel spisil te jun soc albeya ta xchiquinic te jlumaltique.

⁶² Teme laj awo'tan ta yilele, ya me awal ta ora: “Cajwal, ja'at la awal te ya ajin in lum to, te ma'yuc mach'a ya xcha'nain xan li'to, ni ants-winiquetic, ni chambalametic; melel ya ac'atp'un ta jochol q'uinal sbajt'el ora”, xaat me.

⁶³ Ta ora nax te c'alal ya xlaj awo'tan ta yilel te libro, chuca soc jp'ijuc ton, ch'oja ochel ta muc'ul ja' Éufrates.

⁶⁴ Jich me ya awal: “Jich me ya xmul coel te Babilonia, ma ba ya xcha'jajch' xan tel, yu'un te tulan woclajel ya sticun tel te Cajwaltique”, xaat me —xi'. Tey laj loq'uel spisil sc'op te Jeremiase.