Jeremías 50 - Bible in Tzeltal de Oxchuc y Tenejapa

Laj Babilonia

¹ Te sc'oplal yu'un Cajwaltic te Babilonia, te slumal te caldeoetique, te la yalbey ta swenta te j'alwanej Jeremías:

² —Alaic ta bayuc te c'ope, ac'beyaic sna' stojol te nacionetique. Tejc'anbeyaic señail te c'ope; ma me xanaq'uic. Alaic jich bit'il to: “¡Te Babilonia ochix ta c'abal! Te lotil dios Bel la yich'ix tse'luyel; te lotil dios Merodac nojel nax q'uexlal ta stojol. Te loc'ombaetic yu'unic, ja' te diosetic yu'unique, la yich'ic jilel tse'luyel soc nojel q'uexlal ta stojolic”, xaex me.

³ Melel ta norte ya xmo tel jun nación ta scontroinbel sba soc, ya me sc'atp'unbey ta jochol q'uinal te slumale. Ma me ayuc ni ants-winiquetic, ni chambalametic, ya xbajt'ic xan ta nainel tey a, melel spisil me ya x'anic loq'uel —xi' te Cajwaltique.

Ya sujt'ic tel israeletic

⁴ Te Cajwaltic jich ya yal: —Te bi c'aalil ya xc'ot ta pasele, te ants-winiquetic yu'un Israel soc yu'un Judá yacalic me ta oq'uel ya xtal sleonic jo'on te Yajwalon te Dioson yu'unique.

⁵ Ya me sjojc'oyic bael te sbelal Sión, tey me ya xbajt'ic a. Jich me ya yalic bael: “La'ic ta bay Cajwaltic, jun nax ya cac' jbatic soc, ya jpastic jun trato sbajt'el q'uinal te mero ma xch'ay ta o'tanile”, xiic me.

⁶ “Te lum cu'une, jich c'otic bit'il chijetic te ch'ayique, te ma lecuc wentainbilic ta beel yu'un te jcanan-chijetic yu'unique, te la yaq'uic ch'ayuc jilel ta witstiquile. Yacalic ta beel ta yantic witstiquil, asta ch'ay ta yo'tanic te scorrale.

⁷ Te scontrotac, te c'alal ya sta sba soc, ya xti'otic yu'un, soc jich me ya yalic: “Ma jmulticuc jo'otic, melel la sta smulic ta stojol Yajwalic. Staoj nix lec swe'elic c'oem a, soc ja' nix la smuc'ulin yo'tanic te antiguo sme'-statique”, xiic me ta yalel.

⁸ “Ananic loq'uel ta Babilonia, te slumal caldeoetic. Jich me ya x'ic'awanex loq'uel te bit'il ya x'ic'awan tat chijetic ta stojol te jtsojp chijetique.

⁹ Melel ya me cac'bey spas te jtsojp tulanil lumetic ta norte te ya yac'bey guerra Babilonia, te c'alal ya sta yoraile. Ya me xchol sbaic ta guerra soc ya me stsalic. Mero p'ijic ta guerra, te ya st'imuy te st'imique, toj ya xc'ot tey a.

¹⁰ Ya me spojbeyic sbiluc te caldeoetique; ya xcuchbeyic bael ja' to c'alal ma xju'ix yu'unic. Jo'on Ajwalilon, jich ya cal.

Laj Babilonia

¹¹ “Ja'ex caldeoetic, te la apojbeyic sbiluc te lum cu'une, binuc nax me awo'tanic soc bayaluc me yutsil q'uinal ya awaiyic. Wilanic jichuc jcojt' alal wacax ta aquiltic. Ilajananic jichuc caballoetic.

¹² Ja'uc me to, te alumal ta bay ayinate, nojel ta q'uexlal ya xjil. Ya xc'atp'ujatix ta slajibal yu'un te nacionetique, jochol taquin q'uinal soc tan me ya xjilat.

¹³ Melel ya x'ilinon ta atojol, jich ma'yuc mach'a ya quijq'uitaybat jilel, jc'axel me ya xc'atp'uj alumal ta jochol taquin q'uinal. Spisil mach'atic ya xc'axic tey a, ya me xiwic yu'un te ya yilic te castigo la yich'e.

¹⁴ “Ja'ex te ay awat'elic yu'un te t'imetique, joytayaic te Babilonia. T'imuyaic bael ta stojol spisil te awat'ejibique, melel la sle smul ta jtojol jo'on te Ajwalilone.

¹⁵ Toyesa awawic yu'un guerra ta bayuc nax ta juju-jejch'. Te Babilonia ya yac' sbaix ta c'abal. Jinix coel tel te balal ts'ajq'uetic soc te ts'ajc' ta sjoyobale. Ja' me spacol cu'un te ya awac'beyic stoj; jich me ya apasbeyic te bit'il nix la spase.

¹⁶ Ma me mach'a xawijq'uitayiquix ta sq'uinal Babilonia; ma me ayuc mach'a ya yaiy awal tey a, soc ma me mach'a ya yaiy c'ajoj. Te ya yilic te jinawanej guerra, te jyanlumetic ya me sujt'ic bael ta slumal, juju-jtul ya x'anic bael ta slum-sq'uinalic.

Ya sujt' tel Israel

¹⁷ “Te Israel jich c'oem te bit'il chij te ch'ayeme, te nutsbil ta jyalel yu'un te león-chojetique. Ta sbabial ja' la sti'bey sbaq'uetal c'oem te muc' ajwalil yu'un Asiria; ta patil te muc' ajwalil yu'un Babilonia, ja' la snulbeyix ta c'uxel c'oem te sbaquele.

¹⁸ Jich yu'un te jo'on Ajwalilon te Spisil ya xju' cu'une, te Dioson yu'un Israel, ya cal: Ya cac'bey castigo te muc' ajwalil yu'un Babilonia soc te slumale, jich bit'il la jpasbey te muc' ajwalil yu'un Asiria.

¹⁹ Ya me cac' ya sujt' bael ta slum-sq'uinalic te israeletique, jich bit'il chijetic ya me sta bayal swe'elic ta Carmelo, ta Basán, ta witstiquil yu'un Efraín soc ta Galaad.

²⁰ Jo'on Ajwalilon, jich ya cal: Ja' me jich yorail a, te Israel soc Judá ya xjilic ta libre yu'un te falta soc te smulique, melel jo'on ya jpasbey perdón te mach'atic ya cac' cuxinuc xane.

Tsalot Babilonia

²¹ “Ac'beyaic guerra te q'uinal yu'un Merataim soc te mach'atic yajwal Pecod. Nutsaic ta jyalel, jinaic ta jc'axel; c'otesaic ta pasel spisil te jmandale. Jo'on Ajwalilon, te ya cal mandale —xi'.

²² Ta bay lumq'uinal chicanix sc'op guerra, te muc'ul jinel ta jyalele.

²³ Babilonia, te martillo yu'un sjinel spamal balumilal, wuybilix ta jyalel, ts'ubiltic jilel. Bayal xiwel ya yaiy ta yo'tanic te nacionetique, te ya yilic te bila pasbilix ta stojol Babilonia.

²⁴ Ja'at nix atuquel, Babilonia, la ayac aba ta lazo, ma la ana' stojol te ja'at tey ya xyalat ae. Tey chujc'at jilel a, tsacotat, melel tulan la awac' aba ta scontroinel te Cajwaltique.

²⁵ Te Cajwaltic la sjambey yawil te at'ejibaletic yu'un guerra, la sloq'ues tel te yat'ejibe, ja' te yilimbae; melel te Cajwaltic te Spisil ya xju' yu'une ay me jun starea te ya sju'tes ta pasele, ja' me te nación yu'un te caldeoetique.

²⁶ Ac'beyaic guerra ta spisil ta bayuc. Jambeyaic snail te swe'elique. Tsoba te ants-winiquetic soc jinaic; ma me ayuc mach'a cuxul xan ya xjil.

²⁷ Milbeyaic spisilic te soldadoetic yu'une, ticunaic bael ta miljibal. ¡Ya me yil swocolic! ¡C'otix sc'aalelal, yorailix te castigo ta stojolique!

²⁸ (Te ants-winiquetic colemic loq'uel ta Babilonia, ya xc'o yalic ta Sión te bit'il te Cajwaltic Dios la yac'bey stoj Babilonia te bila la spasbey te templo.)

²⁹ Te Cajwaltic ya yal: —Ic'aic tel spisil te jt'imuywanejetique, swenta yu'un ya me yac'beyic guerra te Babilonia. Joyintayaic tel ta sjoyobal te lume, swenta yu'un ma me ayuc mach'a ya xcol loq'uel. Ac'beyaic stoj te bit'il ya sc'an te yat'ele; jich nix me ya apasbeyic te bit'il la spase. Melel la yal ixta c'op ta jtojol te Ajwalilon, te Ch'ul Dioson yu'un Israel.

³⁰ Jich yu'un te queremetic yu'une ya me xlajic ta calleetic; jich me c'aalil ya xlajic spisil te soldadoetic yu'une. Jo'on Ajwalilon, jich ya cal —xi'.

³¹ Te Cajwaltic te Spisil ya xju' yu'une, ya yal: —Nación te j'ixta-c'opate, jcontroinwanejat, c'otix aworail, ya cac'batix castigo.

³² Nación te j'ixta-c'opate, ya me ac'ojch'in aba soc ya me xyalat; ma me ayuc mach'a ya sjachat. Ya me jchic'bat spisil te lumetic awu'une; te c'ajq'ue ya me sjin ta chiq'uel spisil ta ajoyobal —xi'.

³³ Te Cajwaltic te Spisil ya xju' yu'une, ya yal: —Te lum Israel soc te lum Judá yac ta woclajel yu'un tenel ta uts'inel. Ayic ta chuquel yu'un te scontrotaque, ma sc'an scoltayic.

³⁴ Ja'uc me to, te j'ac'wanej ta libre yu'une tulan ta jyalel stuquel, “Ajwalil Spisil ya xju' yu'un”, te sbiile. Ja' ay ta swenta xchajbanel; ya me xtal lamal q'uinal ta stojol te lum yu'une. Yan te mach'atic yajwal Babilonia ya me x'och xiwel ta yo'tan stuquelic —xi'.

³⁵ Te Cajwaltic jich ya yal: —Ay me guerra ta stojol Babilonia soc te yajwale, ta stojol te jtsobwanejetic soc te p'ijil winiquetic yu'une.

³⁶ Ay me guerra ta stojol te mach'atic ay bi ya sna'ic yalele, ac'a jowejuc sjolic yu'un.

³⁷ Ay me guerra ta stojol te soldadoetic yu'une, ac'a nijc'uc yu'un te xiwele. Ay me guerra ta stojol te caballoetic soc te carretaetic yu'une. Ay me guerra ta stojol te soldadoetic yu'un te c'anbilic tel ta yan lume, jich ac'a c'atp'ujuc ta antsetic. Ay me guerra ta bay yawil sc'ulejalique, ac'a bajt'uc ta elc'anel.

³⁸ Ay me guerra ta stojol te ja'etique, ac'a taquinajuc. Melel te Babilonia, ja' te jpam lum soc yajcanan te xiweltic sba soque, scaj te yajcananic te ch'ayemix ta q'uinal yu'une.

³⁹ “Jich yu'un, ya me spas snaic jti'awal ja'mal chambalametic soc ja'mal ts'i'etic ta Babilonia, soc tey me ya xnainic a te avestruz-mutetique. Ta spisil jayebuc xan ja'wil bael ta patil, ma'yuc mach'a ya x'ain tey a.

⁴⁰ Jich ya xjil te bit'il Sodoma soc Gomorra soc te lumetic te nopol ayic soque, te c'alal ya yich' jinele. Ma'yuc mach'a ya xba ainuc tey a, ni ma'yuc mach'a ya xc'ax. Jo'on Ajwalilon, jich ya cal.

⁴¹ “C'alal to ta c'ubul q'uinal ta norte, ya xchajban sba tel jun nación te ay yipe, soc bayal muc' ajwaliletic yu'un.

⁴² Chapal yat'ejibic, ja' te st'imic soc slanzaique; amen yo'tanic, ma'yuc xc'uxul yo'tanic. Te yawique, jich bit'il sc'op yip mar, soc cajajtic me ta caballo ya xtalic. Chapalic yu'un guerra ta stojol Babilonia.

⁴³ Te c'alal ya sna' stojol muc' ajwalil yu'un Babilonia in c'op to, ma'yuc yip yoc sc'ab ya xc'ot yu'un xiwel; ya me yaiy mel-o'tan soc xc'uxul, jich bit'il ya x'alaj ants.

⁴⁴ “Talon meix a te ya awilique, jich bit'il león-choj ya xloc' tel ta pimil ja'mal ta ti'ti'ja' Jordán, te ya yantay bael ta bay unin aquiltic. Tey me ya cac' x'anic loq'uel a te yajwal Babilonia, soc ya me cac' xmandalaj ta ajwalil te mach'a ya sc'an co'tan ya jtsae. Melel ¿mach'a ya spajon te jo'one? ¿Mach'a ya xju' ya stsalon? ¿Mach'a jcanan-chij c'oem te ya xju' scontroinone?

⁴⁵ Aiya awaiyic stojol te bila chapal cu'un jo'on te Ajwalilone, te bila chapalix cu'un ta stojol Babilonia; te bila chajbanbil cu'un ta stojol slumal te caldeoetique: Ya me x'ic'otic bael asta ta bay mero alal chijetique, soc ya me yich' jinel spisil te yax aquiltique.

⁴⁶ C'alal ya xjin te Babilonia, muc' nax me sc'op ya xc'ot. Te lumq'uinal ya me xnijc'; te yawique ya to me yaiyic stojol te yantic nacionetique —xi' te Cajwaltique.