Jeremías 5 - Bible in Tzeltal de Oxchuc y Tenejapa

Smul Jerusalén

¹ Te Cajwaltic ya yal: —Beenanic ta bay calleetic yu'un Jerusalén, ila me awilic ta lec, leaic ta parqueetic, te ayuc mach'a ya ataic tey a te toj ya x'at'eje, te smelelil ya sc'an yac' sba. Teme ay ya ataique, ya me jpasbey perdón te Jerusalén.

² Manchuc me ya stabeyic ta alel sbiil te cuxul Diose, ja'uc me to, ma'yuc swentail ya xc'ot te bila ya yalique —xi' te Cajwaltique.

³ Cajwal, te bila ya alebey te ants-winiquetic, ja' te jun yo'tanic ta atojole. Te castigo la awac'bey, ma ba c'ux la yaiyic; la awac'bey tulan swocolic, pero ma teyuc la snopic a. Tulan ta jyalel te yo'tanique, c'ax to jich te bit'il ton; ma la sc'an sujt'ic bael ta bay lequil be.

⁴ La cal ta co'tan: “Ja' nax te me'baetic te amen ta jyalel te yat'elique, melel ma sna'ic stuquelic te bila ya sc'an yo'tan te Cajwaltique, te bila mandal yu'un te Diose.

⁵ Jich yu'un ya me xba jc'opon te ants-winiquetic te muc' sc'oplalique. Ja'ic wan te ma ba wocol ya sna'ic te bila ya sc'an yo'tan te Cajwaltique, te bila mandal yu'un Dios”, xoon yu'un. Ja'uc me to, ni me'baetic, ni ja'uc te mach'atic muc' sc'oplalic, spisil la stoy sbaic ta stojol te Diose, ma la sc'an la xch'uunbeyic te sc'ope.

⁶ Jich yu'un, ya me xloc' tel león-chojetic ta ja'mal, ya me xmilotic yu'un; te jti'awal ja'mal ts'i'etic ta jochol taquin q'uinal, ya me xti'otic yu'un; te leopardo-chojetic ya me xba milawanuc ta bay nopol te lumetic yu'unique, c'alal ya xloq'uic tel, ora me ya xmilotic yu'un; melel bayal la sle smulic te ants-winiquetique, ma ajtaybiluc te smuquen-mulique.

⁷ Te Cajwaltic jich ya yal: —¿Bit'il ya jpasbat perdón yu'un spisil? Te anich'nabique la yijq'uitayonic, soc ja' ya yalbeyic loq'uel sbiil te ma diosuque. La cac'bey bayal swe'elic; ja'uc me to, ma junaj yo'tanic ta jtojol, soc jun nax la yac' sbaic bael ta spasel mulwej ta sna jmulawil antsetic.

⁸ Jich bit'il caballoetic te chijuben yo'tanique, te x'ilajanic nax yu'un yinam te spat-xujq'ue.

⁹ ¿Ma bal yacuc cac'bey castigo yu'un? ¿Ma bal yacuc cac'bey stoj te lum te jich ya spase?

¹⁰ Ac'a ochuc tel te scontrotaque soc ac'a slajinbeyic te sts'usubilique, manchuc me ma spisiluc ya sjinbey ta jyalel. Ac'a sjecbeyic te sc'abc'abe, melel ma ja'uquix te ts'usubiltic cu'une.

¹¹ Israel soc Judá muquen la stoy sbaic ta jtojol. Jo'on Ajwalilon te jich ya cale —xi' te Cajwaltique.

Sc'oplal castigo

¹² Israel soc Judá la smuc ta yo'tanic te Cajwaltique. La yalic: “Ma'yuc te Diose. Ma'yuc bila amen ya xtal ta jtojoltic, ma xtal guerra ta jtojoltic, ni ma'yuc wi'nal”, xiic.

^13-14 Te j'alwanejetic puro ic' nax te sc'opic, ma'yuc sc'op Cajwaltic ta yo'tanic. Lec ay jiche, ja' yalojbon te Cajwaltic Dios te Spisil ya xju' yu'une: —Te bit'il jich la yalique, jich ya xc'ot ta pasel ta stojolic: Te jc'ope ya me cac' x'ain ta awe jichuc c'ajc', soc jichuc ya xc'ot bit'il si' te lume, te ja'uc ya xbic'otic bael c'oem yu'un te c'ajq'ue —xi'.

¹⁵ Te Cajwaltic ya yalbey xan sc'oplal: —Israel, ya me quic' tel yajwal lum te c'ubul ay, te ya scontroinat te ja'ate, ja' te jpam lum te tulan ta jyalel soc te mero namey q'uinale. Te ja'ate ma x'ana'bey te sc'ope, ma x'awaiy stojol te bila ya yalique.

¹⁶ Spisil mach'a ay ta guerraetic tulan yo'tanic; te yat'ejibic, ja' me ya yalbey sc'oplal te lajele.

¹⁷ Ya me swe'elinbat te bila loq'uem ta c'ajel awu'une soc ya me swe'bat te awaje, soc ya me sbic'bat c'oem te anich'nab queremetic soc te ach'ixetique. Ya me sti'beyex te chijetic awu'unic, te awacaxic, te ts'usubiltic soc te higueraetic awu'une. Ta yat'ejibic yu'un guerra ya sjinic a te lumetic tulanic sts'ajc'ul te smuc'ulinej awo'tanique —xi' te Cajwaltique.

¹⁸ Te Cajwaltic jich ya yal: —Te bi c'aalil te ya cale, ma ba ya jin ta jc'axel.

¹⁹ C'alal jich ya sjojc'obeyex: “¿Bi yu'un te Cajwaltic Dios cu'untic te la spasbotic jiche?” teme xiique. Albeya: “Ja' laj yu'un te la awijq'uitayic ta awo'tanic te Cajwaltique, te ba awac' abaic ta abatinel yu'un lotil diosetic ta sq'uinalic, ja' nix laj me jich ya xba awac' abaic ta abatinel yu'un jyanlum winiquetic ta sq'uinalic”, uta me —xi'.

Ac'bot sna' Israel

²⁰ Te Cajwaltic jich ya yal: —Ticunbeyaic ta alel ta stojol te sts'umbal Israel, soc ya me awalbey te Judá:

²¹ “Aiya awaiy stojol, lom bolat soc ma x'ana' q'uinal ta jyalel, ay asit, pero ma x'awil q'uinal a, ay achiquin, pero ma x'awaiy stojol c'op a”, uta me.

²² Jo'on, Ajwalilon jich ya cal: ¿Yu'un bal ma x'axi'onic te ja'exe? ¿Yu'un bal ma xnijq'uex ta jtojol? Jo'on la jpas te bay ya xquejch'aj te sti'il mar, ja' te sti'il te bay ma xc'ax tel te ja'e. Tulan ya stij sbaic ta jyalel te sbule soc te yipe, soc ya x'awunic; ja'uc me to, ma xju' xc'ax tel.

²³ Te ja'exe tulan te awo'tanic soc toyba-o'tanex; la awijq'uitayonic ta awo'tanic, jich baex.

²⁴ Ma'yuc bay la yal awo'tanic, ni ma'yuc bay la anop: “Ya me quich'tic ta muc' te Cajwaltic te Dios cu'untique, te melel ya yac'botic tel ja'al ta mero sc'aalelal ta yorail siquil q'uinal soc ta q'uepel q'uinal, soc ya yac'botic sc'aalelal ta swenta c'ajoj”, ma xauquex.

²⁵ Ja'uc me to, te amulic te ja'ex, ja' yanajem yu'un ta spisil, soc jich ma xju' ya amulanic te utsilale.

²⁶ Melel ta bay te lum cu'une, ay tey a te winiquetic te amen yo'tanique, jich ya xmujc'taywanic te bit'il mach'atic ya smil ja'mal mutetique, te ya spasic pejts' swenta yu'un ay mach'atic ya spejts'uyic a.

²⁷ Ya snojes snaic yu'un te bitic ya yelc'anique, jich bit'il ja'mal mutetic te ya xnoj yu'unic te scorralique. Jich tulan la yac' sbaic, soc jc'ulej ya xc'otic,

²⁸ soc buen jujp'enic, melel lec we'emic. Te bila amen ya spasic ma'yuc slajibal yu'unic; ma'yuc bila lec ya spasbeyic te me'ba alaletique, ni ya sna'beyic te bila ay ta swenta te mach'atic me'baetique.

²⁹ ¿Ma bal yacuc cac'bey castigo yu'un? ¿Ma bal jichuc ya sc'an ac'beyel castigo te ants-winiquetic te jich ya spasique? Jo'on Ajwalilon te jich ya cale.

³⁰ “Ma lecuc soc xiweltic sba te bitic yac ta c'oel ta pasel ta spamal te q'uinale.

³¹ Te bila ya yalbey sc'oplal te j'alwanejetic ta sc'opique, lotil; te sacerdoteetic ja' ya yaq'uic ta pasel te bila ya smulanique. ¡Te lum cu'une jich nix ya sc'anic! Ja'uc me to, “¿bi ya apasic ja'ex c'alal ya xc'ot te slajibal c'aale?” uta me —xi' te Cajwaltique.