Jeremías 49 - Bible in Tzeltal de Oxchuc y Tenejapa

Alwanej-c'op ta stojol amonetic

¹ Ja' sc'oplal Amón yu'un te Cajwaltique: —¿Banti ay te snich'nab Israel? ¿Banti ay te mach'atic ay bi ya x'ac'bot jilel yu'uninique? ¿Bi yu'un te lotil dios Milcom te ja' yu'uninejix yo'tic te Gad? ¿Bi yu'un te amonetic te nainemic ta lumetic yu'une?

² “Lec ay, jo'on Ajwalilon, jich ya cal: Ya me xc'ot sc'aalelal te ya cac'bey yaiy stojol te aw yu'un guerra te amonetic ta lum Rabá. Ta busulbus me ya xc'atp'uj ta jinem ts'ajc'; te juju-jpam lum ta sjoylejal ya me xtilic ta c'ajq'uel. Jich yu'un te Israel ya me yu'unin xan te lumetique. Jo'on Ajwalilon, jich ya cal.

³ “Ac'a ajc'anajuc te Hesbón, melel te lum Hai la yich'ix jinel. Oq'uetaya abaic, antsetic ta Rabá; lapaic ch'ixal pac', maja awo'tanic yu'un; animajanic jichuc mach'atic soquem sjolic, ejch'entesa abaic. Melel te dios Milcom awu'unic ya x'ich'ot bael ta yan q'uinal, soc ya x'ic'otic bael uuc te sacerdoteetic yu'un soc mach'atic muc' sc'oplalic.

⁴ ¿Bi yu'un cajal ya awac' aba yu'un te awipe? Te ja'at toyba lum, ya xlajix te awipe. Ja' smuc'ulinej awo'tan te ac'ulejal atsoboje, te jich ya awal: “¿Mach'a c'an yac'bon guerra?” te xaate.

⁵ Ja'uc me to, ta spisil ta bayuc ya jticun xiwel ta atojol. Jo'on Ajwalilon Spisil ya xju' cu'un, jich ya cal. Juju-jtul ya xloq'uex ta animal te ja'exe; soc ma'yuc mach'a ya xju' stsobex xan ta yan buelta.

⁶ Ja'uc me to, ta patil ya me sta sc'aalelal te ya cac'bey xan yutsilal te amonetique. Jo'on Ajwalilon, jich ya cal —xi' te Cajwaltique.

Alwanej-c'op ta stojol Edom

⁷ Ja' sc'oplal Edom yu'un Cajwaltic te Spisil ya xju' yu'une: —¿Yu'un bal ma'yuquix mach'a ay sp'ijil ta Temán? ¿Yu'un bal ma sna'iquix te bila ya spasic te mach'atic ay sp'ijil sjolique? ¿Ch'ay balix te sp'ijilique?

⁸ Yajwal Dedán, loc'anic ta animal, baan, nac'a abaic. Melel ya jinbey te lum yu'un Esaú; c'otix yorail te ya cac'bey castigo.

⁹ C'alal ya sloq'uesic ta tulel te ts'usubiltique, ay to jtebuc joc'ajtic ya xjil; c'alal ya xtal eleq'uetic ta ajc'ubal, ja' nax ya yich'ic bael te bila ya xtuun yu'unique.

¹⁰ Yan te jo'one ma'yuc bi ya quijq'uitaybey jtebuc te lum yu'un Esaú. Quilojix ta bay ya snac' sbaique, jich ma xju'ix ya snac' sbaic. Te snich'nab, yermanotac soc te spat-xujq'ue spisilic la yich'ic jinel. Ma'yuc mach'a jil jtuluc tey a, te ya yal:

¹¹ “Ijq'uitaybon te me'ba alaletic awu'une, ya jcanantay. Te me'ba antsetic awu'une ya xju' ya smuc'ulin co'tan”, te xiique —xi' te Cajwaltique.

¹² Te Cajwaltic ya yal: —Ay mach'atic te ma'yuc smul te la yuch'iquix te taza yu'un castigo; in te ja'exe puersa me ya xc'ot ta awenta te castigoe, ya nix me awuch'ic a.

¹³ Jo'on Ajwalilon, jo'onix me ya cal ta jamal: Te lum Bosra ya xc'atp'uj ta jochol taquin q'uinal, ya xc'atp'uj ta jinem ts'ajq'uetic. Ja' me ejemplo ya xc'ot te bit'il ay te pejc'anel, pijt'esel, soc te boltesel sc'oplale. Soc xan te yantic lumetique jc'axel me jinbil ya xc'otic sbajt'el q'uinal —xi'.

¹⁴ Julix tel ta jtojol c'op yu'un te Cajwaltique: —Ay jtul jcholc'op te ya x'awun ta yalbeyel sc'oplal te nacionetique: “¡Tsoba abaic soc beenanic ta stojol Edom! ¡Chajbana abaic yu'un guerra!”

¹⁵ Ya me cac' te ch'in lum ya xc'oat yu'un te lumetique; mero c'ax ilaybil me ya xc'oat yu'un te winiquetique.

¹⁶ Ja' la awac' slo'layat te atoybaile; melel la awac'bey ochel xiwel ta yo'tanic spisilic. Nainemat ta lom ch'entiquile, ataoj te snajt'il sba te witstiquile. Manchuc me mero toyol ya apas apechech jichuc águila, li'to c'alal ya cac'at ta ch'ojel coel tel a. Jo'on Ajwalilon, jich ya cal.

¹⁷ “Te sjinel Edom, mero muc' me ta jyalel, ya me yac' xiwel. Spisil mach'a ya xc'ax tey a, ya me xiw yu'un te ya yil te castigoe,

¹⁸ melel jich me ya xjil bit'il Sodoma soc Gomorra, soc te lumetic te slac'oj sba soc te c'alal la yich'ic jinele. Ma me ayuc mach'a ya xba nainuc xan tey a, soc ma'yuc mach'a ya xc'ax. Jo'on Ajwalilon te ya cale.

¹⁹ Talon meix a te ya awile, jich bit'il león-choj ya xloc' tel ta pimil ja'mal ta ti'ti'ja' Jordán, te ya yantay bael ta bay unin aquiltic. Tey me ya cac' x'anic loq'uel a te mach'atic ay ta Edom, ya me cac' xmandalaj ta ajwalil tey a te mach'a ya sc'an co'tan ya jtsae. Melel ¿mach'a ya spajon te jo'one? ¿Mach'a ya xju' ya stsalon? ¿Mach'a jcanan-chij c'oem te ya xju' scontroinone?

²⁰ Aiya awaiyic stojol te bila chapal cu'un jo'on te Ajwalilone, te bila chapalix cu'un ta stojol Edom, te bila chajbanbil cu'un ta stojol yajwal Temán: Ya me x'ic'otic bael asta ta bay mero alal chijetic, soc ya me yich' jinel spisil te yax aquiltique.

²¹ Te c'alal ya xjin te Edom, muc' nax me sc'op ya xc'ot, te lumq'uinal ya me xnijc'. Ya me x'awunic ta sc'anel coltayel, te yawique ya to xchicnaj c'oel ta Mar Rojo.

²² Te contro ya me xwilic bael ta stojol Bosra, jich bit'il águila te slich'oj xiq'ue. Te bi c'aalile, te soldadoetic yu'un Edom ya me xnijq'uic jich bit'il ya x'alaj ants —xi'.

Alwanej-c'op ta stojol Damasco

²³ Sc'oplal te Damasco te ya yal te Cajwaltique: —Te lumetic yu'un Hamat soc Arfad ayic me ta q'uexlal, melel ma lecuc te c'op jul ta stojolique. Ya xnoj yo'tanic yu'un xiwel, ma ba lamalix yo'tan ya yaiyic.

²⁴ Te Damasco, ma'yuquix yipic, jich ya yac' sbaic bael ta anel. Ya x'u'uninot yu'un xiwel, mel-o'tan soc xc'uxul, jich bit'il ya x'alaj ants.

²⁵ Te lum pujq'uem nax sc'oplal, te bin nax yo'tane, ijq'uitayotix jilel.

²⁶ Te bi c'aalile, limil me ya xjil ta calleetic sbaq'uetalic te queremetic, soc spisil te soldadoetic ya me xlajic. Jo'on Ajwalilon, te Spisil ya xju' cu'une, jich ya cal.

²⁷ Ya cac'bey sc'aal te ts'ajq'uetic ta sjoyobal Damasco, te c'ajq'ue ya sjin te palacioetic yu'un Ben-hadad —xi'.

Alwanej-c'op ta stojol Cedar soc Hazor

²⁸ Sc'oplalic yu'un Cajwaltic te sts'umbal Cedar soc te jtsobwanejetic yu'un yajwal Hazor, te la yich'ic tsalel yu'un Nabucodonosor, muc' ajwalil yu'un Babilonia: —¡Jajch'anic me, ac'beyaic guerra te Cedar! Lajinbeyaic me sts'umbal te ay ta stojol sloq'uib c'aale.

²⁹ Ochuc ta ac'abic te snailpaq'uic soc te chijetic yu'une, te paq'uetic yu'un soc spisil te sbiluquile. Pojbeya te camelloetic yu'une soc awtayaic: “¡Ay xiwel ta bayuc ta spisil!” xaanic me ta stojolic.

³⁰ ¡Loc'anic ta animal, yajwal Hazor! ¡Baan, nac'a abaic! Jo'on Ajwalilon te ya cale. Melel te Nabucodonosor, muc' ajwalil yu'un Babilonia, xchajbanejix sc'op ta atojolic te ja'exe.

³¹ Jo'on Ajwalilon, ya jpasex ta mandal: Jajch'anic, ac'beyaic guerra te lume te lamal nax q'uinal ya yaiyic soc te jun nax yo'tanique. Ni ma'yuc sts'ajc'ul, ni smajq'uil taq'uin yu'un, jich nax stuquel ay ta jyalel.

³² Elc'anbeyaic te scamelloic soc spisil te xchamsbalamique. Ya me jpuc bael ta bayuc ta juju-jejch' q'uinal te winiquetic te ya xjox xujc' xchiquinic; spisil ta juju-jejch' ya me cac'bey tel jinel ta stojolic. Jo'on Ajwalilon, jich ya cal.

³³ Te Hazor jochol ya xjil sbajt'el q'uinal, sna ja'mal ts'i'etic ya xc'ot. Ma'yuquix mach'a ya xbajt' ta nainel tey a, soc ma'yuc mach'a ya xc'ax —xi'.

Alwanej-c'op ta stojol Elam

³⁴ C'alal jajch' ta at'el ta ajwalil ta Judá te Sedequías, te Cajwaltic la sc'opon Jeremías, la yalbey sc'oplal Elam:

³⁵ —Jo'on Ajwalilon te Spisil ya xju' cu'une, jich ya cal: Ya jtuch'bey st'im te Elam, te ja' tulan at'ejibal yu'une.

³⁶ Ya cac' tel ic' ta stojol te lume, c'alal ta xchanxujc'ul te q'uinale; swenta yu'un ya me spuc bael ta bayuc, ja' to c'alal ma'yuc lum ya xjil ta bay ma'yuquix ya x'och bael ta anel.

³⁷ Ya me cac' xnijc' te Elam ta stojol te scontrotaque. Ya me jticun tel te bila amen; ya me cac' tel ta stojol te quilimbae. Soc ya me jticun tel guerra te ya xtal sjin jilel ta jc'axele. Jo'on Ajwalilon, tulan ya cal.

³⁸ Ya me cac' jmuc'ul nactijib ta Elam; soc ya me cac' ta lajel te muc' ajwaliletic soc te jtsobwanejetic yu'unique. Jo'on Ajwalilon, jich ya cal.

³⁹ Ja'uc me to, ta patil ya me sta sc'aalelal te ya cac'bey xan yutsilal te Elam. Jo'on Ajwalilon, jich ya cal —xi'.