Jeremías 48 - Bible in Tzeltal de Oxchuc y Tenejapa

Alwanej-c'op ta stojol Moab

¹ Ja' sc'op Cajwaltic te Spisil ya xju' yu'un, te Dios yu'un Israel, te ja' sc'oplal Moab. Jich ya yal: —¡Obol sba te lum Nebo, la yich'ix jinel! ¡Quiriataim, tsacot soc pejc'anot! Te tulanil ts'ajc' yu'un, jinot coel c'alal ta lum.

² Te yutsilal Moab laj sc'oplal. Ta lum Hesbón te mach'atic scontrotac te nación Moab ya xchajbanbeyic sc'oplal te ya xch'ay ta jc'axel. Ja'at uuc, lum Madmén, ya awich' jinel, te guerra ma ba ya yijq'uitayat.

³ Ta lum Horonaim ya xloc' tel awetic tey a: “¡Jinel soc muc'ul woclajel ta jyalel!” xiic ta aw.

⁴ “Moab yich'ojix jinel; te yawic yu'un xc'uxul ya xc'ot ta Zoar.

⁵ Soc ya'lel sit ta oq'uel ya xmoic bael ta Luhit; ya x'awunic yu'un xc'uxul ta swenta milel te mach'atic ya xcoic tel ta lum Horonaim.

⁶ ¡Ananic bael, ac'a scoltay sba te mach'a ya xju' yu'une! Jichanic te bit'il ch'ix ta jochol taquin q'uinal.

⁷ “Ja'at Moab, la awich' aba ta muc' soc awip soc ac'ulejal; ja'uc me to, ya me awich' tsaquel. Te Quemós te dios awu'une, ya xbajt' ta chuquel ta c'ubul, soc te sacerdoteetic yu'un, soc te mach'atic muc' sc'oplalique.

⁸ Te jinele ya xc'ot bael ta spisil te lumetique, ma'yuc mach'a ya xcol jchajbuc lum; te xatal q'uinal soc te c'atal wits ya me yich'ic jinel. Jo'on Ajwalilon, jich ya cal.

⁹ Ac'beya ton, seña smuquenal te Moab, melel ya me xba sjinic; te lumetic yu'une ya me xjinic jilel, ma'yuquix yajwal ya xjil —xi' te Cajwaltique.

¹⁰ (Ch'aybil me ya xc'ot te mach'a ma socuc yutsil yo'tan ya spas te at'el te ya x'ac'bot ta swenta yu'un te Cajwaltique. Ch'aybil me ya xjil te mach'a ma sc'an ya yac' sba ta milawe.)

¹¹ Moab lamal nax q'uinal la yaiy spisil ora, ma'yuc bay baem ta mosoil ta yan lum. Jich c'oem te bit'il vino te ya sts'ab sba ta yawil, te ma'yuc bay yich'oj aq'uel ta yan yawil, te jich ma xch'ay sbujts', ni ma xch'ay yic'.

¹² Te Cajwaltic jich ya yal: —Ya xc'ot sc'aalelal te ay mach'atic ya jticun, te ya yac' ta yan yawil te vino c'oeme. Te yawil jochol ya xjile, ya me yich' wuyel ta jyalel.

¹³ Jich yu'un te Moab ya me yaiy q'uexlal ta yo'tan ta swenta te Quemós te dios yu'une, jich bit'il Israel la yaiy q'uexlal ta swenta Betel, te tey yac'oj smuc'ul a te yo'tane.

¹⁴ “Ma me xyal te Moab: “Jo'otic tulanotic, ay quiptic yu'un guerra”, ma me xiuc.

¹⁵ Ya me xjulix tel jinwanej yu'un Moab soc te lumetic yu'une; ta bay mero lec te ach'ix-queremetic yu'une ya me xlajic. Tulan ya yal te Muc' Ajwalile, te ja' “Ajwalil te Spisil ya xju' yu'une”, xi' te sbiile.

¹⁶ Te tulan woclajel yu'un Moab, ya xnoptsajix tel, te swocole tey ya xjulix a.

¹⁷ Spisil te spat-xujc' Moab, soc spisil te mach'atic ya sna'beyic te sc'oplale, ac'a yoq'uetayic, soc jich ac'a yalic: “Ilawilic, ch'ay ta jc'axel te bit'il ya xmandalaje, te tulan ta jyalel soc te bayal yutsilale”, xiuquic me ta oq'uel.

¹⁸ “Ja'at lum Dibón, coan tel tey a ta bay ayat ta ich'el ta muq'ue, naclan ta taquin lum. Melel te jinwanej yu'un Moab ya me staat julel, soc ya me sjinbatix te tulanil ts'ajq'uetic awu'une.

¹⁹ Lum Aroer, tejc'ana aba ta ti'be, soc ilawil; jojc'obeya awaiy te mach'atic cuxulic toe, bila a te c'oem ta pasele.

²⁰ Moab peq'uelix, nojelix xiwel ta yo'tan. Oq'uetayaic yu'un xc'uxul. Pucbeyaic sc'oplal ta bay muc'ja' Arnón: te la yich'ix jinel te Moabe —xi' te Cajwaltique.

²¹ Jul tel castigo te albil sc'oplal ta stojol lumetic ta bay c'atal wits: Ta Holón, Jahaza, Mefaat,

²² Dibón, Nebo, Bet-diblataim,

²³ Quiriataim, Bet-gamul, Bet-meón,

²⁴ Queriot, Bosra soc spisil te lumetic ta sq'uinal Moab te nopol ayic soc c'ubul ayic.

²⁵ Te Cajwaltic jich ya yal: —Te yip Moab ch'ayix; te yu'el lajix —xi'.

²⁶ Yacubtesaic te Moab, melel la stoy sba ta stojol te Cajwaltique. Jich yu'un te Moab ya me sbalan sba ta xe, spisilic ya me yich'ic labanel.

²⁷ Moab, ¿ma bal lajuc alaban Israel? La awal spisil ora te ma lecuc awo'tan yu'un, jich c'oem ta awo'tan te bit'il j'eleq'ue.

²⁸ Ijq'uitayaic te lumetic awu'unic, yajwal Moab; baanic ta nainel ta ch'entiquil jichuc stsumutetic te ya spas xpechechic ta sti'il lom ch'entiquil.

²⁹ Ya jna'beytic sba te smuc'ul toybail Moab, te sbol-c'op te cajal yac'oj sba soc stoybail.

³⁰ Ja' nix jich te Cajwaltic, ya sna'bey te yixta-c'ope; te sjowil-c'ope ma xc'ot ta pasel yu'unic.

³¹ Jich yu'un ya me coq'uetay yu'un mel-o'tan ta spisil te lum Moab soc te mach'atic ayic ta Kir-hares.

³² Ya me coq'uetayat, ja'at sts'usubil Sibma, c'ax jich te bit'il la yich' oq'uetayel Jazer. Te ac'abc'abe c'axic bael ta jejch' mar ja' to c'oemic ta Jazer. Ta ora yo'tic te ts'usub te sc'oplal ya atule, jinbilix jilel.

³³ Ma x'aiyotix stojol aw yu'un yutsil q'uinal ta bay yawil awalts'unubil yu'un Moab. Te vino ma'yuquix tey a ta bay yawile. Ma'yuc mach'a ya spits' ta teq'uel te ts'usube, ma'yuquix c'ayoj yu'un yutsil q'uinal tey a.

³⁴ Te ants-winiquetic ta Hesbón ya x'awunic yu'un xc'uxul te ma'yuquix bi ay yu'unique. Te yawique ja' to ya xc'ot ta Eleale soc Jahaza, soc c'alal ta Zoar ja' to ta Horonaim soc Eglat-selisiya, melel te sloq'uibja'etic yu'un Nimrim taquejiquix.

³⁵ Te Cajwaltic jich ya yal: —“Ya jin te ants-winiquetic ta Moab te ya xmoic ta toyol ch'uunjibal ta swenta yac'beyel milbil majt'anil soc pom te lotil diosetique —xi'.

³⁶ Jich yu'un ya x'ajc'anaj co'tan yu'un te Moab soc te yajwal Kir-hares, ta sc'op amay yu'un mel-o'tan swenta anima, melel te c'ulejalil la stsobique, ch'ay ta jc'axel.

³⁷ Spisil loq'uesbil stsotsil sjolic soc yisimic; spisilic la yejch'entes sc'abic soc slapojic ch'ixal paq'uetic.

³⁸ Te Cajwaltic jich ya yal: —Spisil te quembil lumetic yu'un Moab soc spisil te calleetic yu'une, ma'yuc yan bi ya x'aiyot stojol tey a, ja' nax oq'uel. Melel la jwuy ta jyalel te Moab, jich bit'il oxom te ma'yuc stuule. Jo'on Ajwalilon, jich ya cal —xi'.

³⁹ Mela awo'tanic yu'un te Moab; nojel me ta xiwel. La sujt'es tel spat yu'un q'uexlal. C'atp'uj ta xiwtesjibal soc bila ya x'ilayot yu'un spisil te spat-xujq'ue.

⁴⁰ Te Cajwaltic ya yal: —Te scontro Moab yacal ta wilel tel ta stojol, jichuc muc'ul águila yilel te slich'oj xiq'ue.

⁴¹ Lumetic soc tulanil ts'ajq'uetic ya me x'ochic ta sc'ab te jcontroinwaneje. Te bi c'aalil ya xc'ot ta pasele, te soldadoetic yu'un Moab ya me xnijq'uic jich te bit'il ya x'alaj ants.

⁴² Te Moab ma ba nación ya xjilix, melel jelaw ta jtojol te Ajwalilone.

⁴³ Jich yu'un jo'on te Ajwalilone, jich ya cal: Te yajwal Moab, jichic me te bit'il chambalametic nutsbilic yu'un te jts'iwiletique, o teme ya sta xaab, o pejts'.

⁴⁴ Te mach'a ya xcol bael yu'un te jts'iwiletique, ya xch'ay coel ta xaab, soc teme ya xloc' tel ta xaabe, ya x'och ta pejts'. Melel ya sta sc'aalelal ya quich' tel castigo ta stojol Moab. Jo'on Ajwalilon, jich ya cal.

⁴⁵ “Ay ma'yuquix yipic ya x'anic bael ta sleel anjibal ta Hesbón; ja'uc me to, te Hesbón, te slumal te namey q'uinal muc' ajwalil Sehón, yaquix ta tilel. Te c'ajq'ue ya spuquix sba, soc ya xc'ajc' te witstiquil yu'un Moab, ja' me te toyba lume.

⁴⁶ ¡Obol aba ja'at Moab! ¡Lum yu'un Quemós, ch'ayematix! Te anich'nab queremetic ach'ixetic ya me x'ic'otic bael ta mosoil.

⁴⁷ Ja'uc me to, ta patil ya me sta sc'aalelal te ya cac'bey xan yutsilal te Moab; jo'on Ajwalilon, jich ya cal —xi' te Cajwaltique. Ja' jich sc'oplal ta chajbanel yu'un Cajwaltic te Moabe.