Jeremías 42 - Bible in Tzeltal de Oxchuc y Tenejapa

Te lum la sc'anbeyic Jeremías ya xc'oponbotic Dios

¹ Ta spisil capitán yu'un soldadoetic, soc tey ay a te Johanán snich'an Carea, te Azarías snich'an Osaías soc spisil lum, muc'-biq'uit, noptsajic tel

² ta stojol te j'alwanej Jeremías, jich la yalbeyic: —Ay bila ya jc'antic ta atojol, pasbotic a: Albotic wocol a te Cajwaltic Dios, jo'otic te ch'in jteb xanix te jilemotique. Ta neelal mero bayalotic, ta ora yo'tic jteb xanix jilemotic, jich bit'il ya awil in to.

³ Albotic wocol a te Cajwaltic Dios, ac'a stojtesotic te bit'il ya sc'an ya x'ainotique, soc te bila ya sc'an ya jpastique —xiic.

⁴ Te Jeremías la sjac': —Lec ay. Ya calbey wocol te Cajwaltic Dios te bit'il la ac'anique, soc ya me cac'beyex ana'ic stojol spisil te bila ya yac'bon jna' stojole, ma ba ya jmucbat ta co'tan ni jtebuc —xi'.

⁵ Jich la yalbeyic: —Te Cajwaltic Diose ja' lequil testigo, soc melel te bila ya yalbotic stuquele, ac'a me scontroinotic teme ma jpastic spisil te bila ya yalbotic ta awenta te Diose.

⁶ Chican teme ya jmulantic, o ma jmulantic, ya me jch'uunbeytic sc'op te Cajwaltic Diose te la jc'antic te ya ac'oponbotique, swenta yu'un jich me lec ya xc'ootic ta loq'uel —xiic ta yalel.

Cajwaltic la sujt'esbey sc'op Jeremías

⁷ Ta slajunebal c'aal ta patil, te Cajwaltic la sc'opon Jeremías.

⁸ Jich la yic' tel te Johanán, te snich'an Carea, te mach'atic capitanetic yu'un te soldadoetic te sjoinejique, soc spisil te lume, manchuc me muc'-biq'uit.

⁹ La yalbey: —Te Cajwaltic te Dios yu'un Israel te la awac'bonic ta jwenta te ya xba cal te bila la ac'anique, jich yaloj:

¹⁰ “Teme jich awo'tanic te li' ya xjilex ta lumq'uinal to, ya me cac' esmajuquex; ma ba ya jinexix, tulan ya jts'unex, ma ba ya jbulex xan. Ya jmel co'tan yu'un te bila amen la jticunbeyex ta atojolique.

¹¹ Ma x'axi'ic te muc' ajwalil yu'un Babilonia, te bayal ay ta xi'el awu'unique. Ma me x'axi'ic, melel joinejex ta jcoltabelex, soc ya jloq'uesex ta sc'ab. Jo'on Ajwalilon, jich ya cal.

¹² Ya me jna'beyex yo'bolil abaic te ja'exe, soc ya me cac' te ya sna'beyex yo'bolil abaique, soc te ya yaq'uex sujt'el ta alumalique”, xi' me.

¹³ “Yan teme ma x'ac'anic ya xjilex li' ta lumq'uinal, teme ya ac'axintaybeyic sc'op te Cajwaltic Dios,

¹⁴ teme jich ya awalic: ‘Ja' lec ya xba ainucotic ta Egipto ta bay ma xquiltiquix guerra, ma xcaiytiquix stojol sc'op oq'ues, soc ma xlajotic ta wi'nal tey a’, teme xaexe,

¹⁵ jich yu'un aiya me awaiyic stojol ja'ex te cuxulex jilel te yajwalex Judá, te bila ya yalbeyex te Cajwaltic te Spisil ya xju' yu'un, te Dios yu'un Israel: “Teme yu'un tey ya awac' bael awo'tanic ta ainel ta Egipto,

¹⁶ tey nix me ya staex c'oel a te lajel yu'un guerra soc wi'nal te mero bayal ya axi'ique.

¹⁷ Spisil mach'atic tey yo'tanic bael ta ainel ta Egipto, tey me ya xlajic yu'un guerra soc wi'nal soc chamel. Ma me ayuc mach'a cuxul ya xjil tey a, ma me ayuc mach'a ya xcol yu'un te bila amen ya jticun tele”, xi'.

¹⁸ “Te Cajwaltic te Spisil ya xju' yu'une, te Dios yu'un Israel, ya yal: “Te quilimba til ta stojol te yajwal Jerusalén, jich nix ya xtil ta atojolic teme ya xbaex ta Egipto. Ja' me ya xc'atp'ujex ta ejemplo yu'un te castigo te ya yac' xiwel; soc ma'yuc bi ora ya awil xan in q'uinal to”, xi' xan.

¹⁹ Ja'ex te cuxulex jilel te yajwalex Judá, te Cajwaltic ya spasex ta mandal te ma me xbaex ta Egipto. Na'aic me ta lec, jo'on ya cac'beyex ana'ic.

²⁰ Ja'ex nix ya awac' abaic ta woclajel atuquelic. Melel ja'ex nix la awac'bonic ta jwenta te ya xnoptsajon ta stojol te Cajwaltic Dios, te jich la awalbonic: “Albotic wocol a te Cajwaltic Dios, soc ac'botic jna'tic spisil te bila mandal ya yal stuquel, swenta yu'un ya jpastic”, te xaexe.

²¹ Ta ora yo'tic la cac'beyexix ana'ic stojol te bila la yac'bon ta jwenta te Cajwaltic Dios ta yalel ta atojolique; ja'uc me to, ma x'ac'an awich'ic ta muc'.

²² Ja' yu'un na'aic me ta lec, ta scaj me te guerra, wi'nal soc chamel tey me ya xlajex a ta bay te q'uinal te banti ya ac'anic ya xbaex ta ainele —xi' te Jeremiase.