Jeremías 38 - Bible in Tzeltal de Oxchuc y Tenejapa

La yich' ch'ojel ta taquin pozo te Jeremiase

¹ Sefatías te snich'an Matán, Gedalías te snich'an Pasur, Jucal te snich'an Selemías, soc Pasur te snich'an Malquías, la yaiyiquix stojol te bila la yal te Jeremías ta stojol te lume:

² —Te Cajwaltic la yal: “Te mach'a ya xjil ta lum, ya me xlaj ta guerra, ta wi'nal o ta chamel. Yan te mach'a ya xloc' bael, soc te ya yac' sba ta c'abal yu'un te caldeoetique, ma x'uts'inbot xcuxlejal stuquel”, xi' te Cajwaltique.

³ Te Cajwaltic la yal xan: “Te lume ya x'och ta sc'ab soldado-caldeoetic yu'un te muc' ajwalil ta Babilonia. Ya me stsal, ma'yuc mach'a ya xcomot yu'un”, xi' te Cajwaltique —xi' sc'op te Jeremiase.

⁴ Jich yu'un, te mach'atic yich'oj yat'elique la yalbeyic te muc' ajwalile: —Ac'a yich' milel te winique, melel ta swenta sc'op ya snijq'uesbey yo'tanic te soldadoetic te ayic to xan ta lum, soc spisil te ants-winiquetique. Te winique ma ja'uc ya slebey yutsilal te lume, ja' ya slebey te bila amene —xiic.

⁵ Te muc' ajwalil Sedequías la sjac'bey sc'opic: —Lec ay, pasbeyaic ta stojol te bila ya sc'an awo'tanique. Te jo'one ma'yuc bila ya xju' ya calbeyex yu'un —xi'.

⁶ Jich och ta sc'abic te Jeremías. La yaq'uic coel ta taquin pozo yu'un Malquías te snich'an muc' ajwalile, te ay ta amac' yu'un soldadoetic. La scojt'esic ta lazo. Te bit'il ma'yuc ya'lel te pozo, ja' nax ay ajch'al tey a, jich yu'un te Jeremías ts'ajpaj c'oel yacan ta ajch'al.

⁷ Ay jtul etiope-winic, Ebed-melec sbiil, te yich'oj tulan yat'el ta spalacio te ajwalile. La yaiy stojol te la yaq'uic coel ta pozo te Jeremías. Te muc' ajwalile ja' yorail a te yac ta xchajbanel aiyej ta yochibal lum te Benjamín sbiile.

⁸ Jich yu'un, Ebed-melec loc' bael ta spalacio te ajwalil, ba yalbey:

⁹ —Muc' ajwalil cu'un, te bila la spasbeyic Jeremías te winiquetique, milel ta jyalel. La yaq'uic coel ta pozo, tey yac ta lajel ta wi'nal a, melel ma'yuquix we'elil ta spamal lum —xi'.

¹⁰ Ta ora te muc' ajwalil la yalbey mandal te Ebed-melec te ya yic' lajuneb xcha'winic (30) ta jtul winiquetic ta sloq'uesel te Jeremías ta pozo te bit'il ma to xlaje.

¹¹ Te Ebed-melec la yic' bael te winiquetic, bajt' ta yawil c'u'iletic ta palacio. La yich' loq'uel pocol paq'uetic, la scojt'esic soc lazo ta stojol te Jeremías ta yutil pozo,

¹² jich la yalbey: —Ac'a ta yet'al anejq'uel te pocol paq'uetique, swenta yu'un ma ba ya yejch'entesat te lazoetique —xi'. Te Jeremías jich la spas.

¹³ Jich yu'un te winiquetic la sliquic loq'uel, jich la sloq'uesic tel tey a. Ta patil te Jeremías jil ta amac' yu'un soldadoetic.

Sedequías la sticun ta iq'uel Jeremías

¹⁴ Te muc' ajwalil Sedequías la yal mandal ta iq'uel tel ta stojol te j'alwanej Jeremías, ta bay yoxebal yochibal templo. Te muc' ajwalil tey la yalbey a: —Ay bila ya jojc'obat jp'aluc, ya jc'an te yacuc asujt'esbon ta mero sjamalul ta jyalel —xi'.

¹⁵ Te Jeremías la sjac': —Teme ya jsujt'esbat te bila ya ajojc'obone, ya awac'on ta milel yu'un; teme ay tojtesel ya calbate, ma x'awich'bon ta muc' —xi'.

¹⁶ Ja'uc me to, te muc' ajwalil Sedequías muquen la yalbey te Jeremías, soc jamal la yal ta stojol te bit'il ay te yo'tane: —Ya cal ta stojol Cajwaltic, te la yac'botic jcuxlejaltique, te ma ba ya cac'at ta milel, soc ma ba ya cac'at ta sc'abic te mach'atic ya sc'an smilate —xi'.

¹⁷ Ja' yu'un te Jeremías la yalbey Sedequías: —Te Cajwaltic te Spisil ya xju' yu'une, te Dios yu'un Israel, jich ya yalbat: “Teme ya awac' aba ta sc'ab ta jc'axel te generaletic yu'un te muc' ajwalil ta Babilonia, te ja'at soc te mach'atic ay awu'un ya me xcuxinex, soc te lume ma ba ya yich' chiq'uel.

¹⁸ Melel teme ma la awac' aba ta sc'abique, te caldeoetic ya me x'och ta sc'abic te lume, soc ya me xchiq'uic. Soc te ja'ate ma xju' xcolat”, xi' te Cajwaltique —la yut.

¹⁹ Te Sedequías la sjac': —Ya jxi' te judioetic te ay c'axemiquix ta stojol te caldeoetique; teme ya x'ochon ta sc'abique, ya niwan yac'bonic c'axuc jwocol —xi'.

²⁰ Jeremías la sjac': —Ja'uc me to, muc' ajwalil, ma ba x'ochat ta sc'abic. Wocoluc, ch'uunbeya sc'op Cajwaltic te la calbatix awaiye. Jich me lec ya xc'oat ta loq'uel, jich me ya xcol acuxlejal.

²¹ Yan teme ma junuc awo'tan ya awac' aba, te Cajwaltic yac'ojbonix quil te bila ya xc'ot ta pasele:

²² Spisilic te antsetic ya xjilic ta apalacio, ja'at te muc' ajwalilat yu'un Judá, ya me yich'ic loq'uesel bael, ya me x'ac'ot ta sc'abic te general soldadoetic yu'un te Babilonia, jich me ya yalic te antsetic awu'une: “Te mach'atic mero sjoy sba soc te muc' ajwalile la slo'layic soc la stsalic; la yaq'uic bic'otuc bael yu'un ajch'al te yacane, soc sujt'ic ta spatic”, xiic me te antsetique —xi' te Jeremiase.

²³ Te Jeremías la yalbey xan te muc' ajwalile: —Spisil te antsetic awu'un soc te anich'nab ja'at muc' ajwalil, ya me x'ac'otic ta sc'ab te caldeoetique. Te ja'ate ma me xju' ya acoltay aba ta sc'abic; ya me x'ac'otat ta sc'ab te muc' ajwalil yu'un Babilonia, soc ya me xchiq'uic jilel te lume —xi'.

²⁴ Jich yu'un, te Sedequías la yalbey te Jeremías: —Teme ya ac'uxtay abae, ma me mach'a ya awalbey jtuluc te bila la caltique.

²⁵ Teme ya yaiyic stojol te mach'atic ay yat'elic te yacotic ta c'ope, ya me xtalic ta sjojc'oyel ta atojol te bila tal awalbone, soc te bila la calbat te jo'one, swenta yu'un ma me smilat a te ya awalbey spisile.

²⁶ Ja'uc me to, sujt'esbeya te sc'opic te ja' nax yacal awalbelon wocol yu'un te manchuc ya cac'at xan bael ta sna Jonatán, te jich ma xlajat tey a —xi' te Sedequíase.

²⁷ Jich a c'ot ta pasel. Spisilic te mach'atic ay yat'elic, ba yilic te Jeremiase. La sjojc'obeyic te c'ope; ja'uc me to, jich la sujt'esbey te bit'il nix la yal te muc' ajwalile. Jich la yijq'uitayic jilel, melel ma'yuc mach'a la yaiy stojol te bila la yalique.

²⁸ Te Jeremías jil ta amac' yu'un soldadoetic ja' to c'alal te bi c'aalil och ta c'abal Jerusalén.