Jeremías 37 - Bible in Tzeltal de Oxchuc y Tenejapa

Sedequías ay bi la sc'anbey Jeremías

¹ Te Nabucodonosor, muc' ajwalil yu'un Babilonia, la yac' ochuc ta muc' ajwalil ta Judá te Sedequías snich'an te Josías, ta swenta sjelol te Jeconías snich'an Joacim.

² Ja'uc me to, te Sedequías soc te mach'atic ay yat'elic yu'un te lume, ma la yich'beyic ta muc' sc'op te Cajwaltic te la yac' ta yalel te Jeremías te j'alwanej yu'une.

³ Te muc' ajwalil Sedequías la sticun bael te Jucal snich'an Selemías soc te sacerdote Sofonías te snich'an Maasías, ta yilel te j'alwanej Jeremías. Jich c'o yalbeyic: —C'oponbotic Cajwaltic te Dios cu'untique —xiic.

⁴ Te Jeremías ma to ochemuc ta chuquel a, jich jun yo'tan bayuc a been ta yolil te lume.

⁵ Jich yorail yac ta loq'uel tel bayal soldadoetic yu'un faraón ta Egipto. La yaiyic stojol te caldeoetic te yacalic ta stenel ta guerra te Jerusalén, jich la sq'uej sbaic bael.

⁶ Jich yu'un te Cajwaltic la sc'opon te j'alwanej Jeremías, la yalbey mandal ta yalel

⁷ te mach'atic ticunbil tele: —Albeyaic te muc' ajwalil yu'un Judá te la sticunex ta ajojc'obelone, te bayal soldadoetic yu'un faraón te ayiquix tel ta be ta swenta scoltaybelexe, sujt'iquix bael ta Egipto.

⁸ Te caldeoetic ya me xcha'sujt'ic xan tel ta stenel ta guerra te lum Jerusalén, ya me x'och ta sc'abic soc ya me xchiq'uic jilel.

⁹ Jo'on Ajwalilon, ya me cac'beyex ana'ic, te ma me xawac' abaic ta lo'layel yu'un. Ma me yu'unuc jc'axel la sq'uej sbaic bael te caldeoetique, ya me xtalic xan.

¹⁰ Manchuc me ya atsalic spisil te soldado-caldeoetic te yac ta yaq'uel guerra, jtul cheb xanix ya xjil ta ejch'en stuquelic ta scampamentoic; ja'uc me to, te soldado-caldeoetic ya me sjajch'ic tel, soc ya me xchiq'uic jilel te lume —xi'.

Chujc' Jeremías

¹¹ C'alal te soldado-caldeoetic te yacalic loq'uel bael ta stojol te Jerusalén, te la yaiyic stojol te yaq'uix ta talel te bayal soldadoetic yu'un faraón,

¹² jich yorail te loc' bael ta lum te Jeremías. Yu'un ya xbajt' ta sq'uinal Benjamín, ta yich'el ta sc'ab te sq'uinal te la yich' puquele.

¹³ Te c'alal c'ot ta yochibal Jerusalén te Benjamín sbiile, ay jtul winic Irías sbiil, snich'an te Selemías, te smam Hananías, ja' jwolwanej yu'un te jcanantaywanejetique, la scom te Jeremías, jich la yalbey: —Te ja'ate yacat me ta c'axel bael ta stojol caldeoetic ya quil —la yut.

¹⁴ Te Jeremías la sjac': —Ma meleluc, ma ba ya xboon ta bay caldeoetic —xi'. Ja'uc me to, te Irías ma la sc'an yaiy stojol, ja' nax la yac' ochel ta chuquel te Jeremías soc la yic' bael ta stojol te mach'atic ay yat'elique.

¹⁵ Ja'ic ilin yo'tanic ta stojol Jeremías, soc la yalic mandal ta majel, soc la yaq'uic ta chuquel ta sna Jonatán te cronista, te ja' c'atp'ujem ta chucjibal te snae.

¹⁶ Te Jeremías c'ot ta mero yet'al lum ta chuquel, tey jalaj bayal c'aal a.

¹⁷ Te muc' ajwalil Sedequías la yal mandal ta iq'uel tel ta spalacio te Jeremías. C'alal c'otix ta stojol a, te muc' ajwalil la sjojc'obey ta muquen: —¿Ay bal yaloj sc'op te Cajwaltique? —xi'. Te Jeremías la sjac': —Ay, ja' in to: “Ja'at muc' ajwalil, ya x'ochat ta sc'ab te muc' ajwalil yu'un Babilonia” xi' me —la yut.

¹⁸ Ja'uc me to, te Jeremías la yalbey te muc' ajwalil Sedequías: —¿Ay bal bila ma lecuc jpasoj ta atojol, muc' ajwalil, soc ta stojol te yantic te ay yat'elic awu'une, o ta stojol te lum, te ochemon ta chuquel yu'une?

¹⁹ ¿Banti ayic te j'alwanejetic te lec la yalbeyic sc'oplal te ma xtal yac'beyex guerra te muc' ajwalil yu'un Babilonia, ni te ja'exe, ni te jlumaltique?

²⁰ Aiybon awaiy stojol yo'tic, ac'bon te bila ya jc'anbat ta atojole: Ma xawac' te ya yic'onic xan bael ta sna Jonatán te ja' cronistae, teme ayuc bit'il lajucon tey a —xi'.

²¹ Jich yu'un te muc' ajwalil Sedequías la yal mandal te ac'a yich' maquel te Jeremías ta yamac'ul te chucjibale, soc te jujun c'aal ac'a yich' ac'beyel jpejch' waj pasbil ta calle yu'un te jpas-wajetique. Jich la yich' pasel ja' to c'alal ma'yuquix we'elil ta spamal lum. Jich a jil ta bay amac' yu'un soldadoetic te Jeremiase.