Jeremías 35 - Bible in Tzeltal de Oxchuc y Tenejapa

Jeremías soc recabitaetic

¹ Ta yorail te ay ta ajwalil Joacim snich'an Josías te ay ta muc' ajwalil ta Judá, te Cajwaltic la sc'oponon, jich la yalbon:

² —Baan ilawil te recabitaetic, c'opojan soc. Ic'a bael ta jun cuarto ta templo, soc ac'beya vino yuch'ic —xi'.

³ Jich yu'un jo'on te Jeremíason, ba jle te Jaazanías (snich'an te yan Jeremías, ja' smam te Habasinías) soc te yermanotac, te snich'nab soc ta spisil te recabitaetique.

⁴ La quic' bael ta templo, ta scuarto te snich'nab Hanán, te snich'an Igdalías, te ja' j'alwanej yu'un te Diose. Ja' in cuarto to, tey ay a ta sts'eel scuartoic te jtsobwanejetic yu'un templo, soc ta sba scuarto te Maasías te snich'an Salum, ja' te jcanan-ti'nail yu'un templo.

⁵ La cac'bey te recabitaetic jarroetic soc vasoetic te nojelic ta vino, soc jich la calbey: —Uch'aic jtebuc vino —la cut.

⁶ La sjaq'uic: —Te jo'otic ma ba ya cuch'tic vino, melel te Jonadab snich'an Recab, te antiguo jme'-jtatique, tulan mandal la yalbotic te ma ba ya cuch'tic vino jo'otic, soc te jts'umbaltique.

⁷ Soc ma la sc'an te ya jpastic jnatic, ni ts'unbajel ta q'uinal, soc ni sts'unel ts'usubiltic. La yalbotic mandal te ac'a jnaintic nailpac' te jayeb c'aal cuxulotic, swenta yu'un ya me xcuxinotic bayal c'aal ta lumq'uinal, ta bay c'axel nax ayotic jichuc jyanlumetique.

⁸ Te jo'otic jch'uunejbeytic spisil smandal te Jonadab te antiguo jme'-jtatique, jich yu'un ma xcuch'tic vino te jo'otic, soc te quinamtic, soc te jnich'nabtique,

⁹ soc ma jpastic jnatic, ma'yuc jts'usubiltic, soc ma'yuc bi jts'unojtic ta lumq'uinal.

¹⁰ Nainemotic ta nailpac', jich c'oem ta ch'uunel cu'untic spisil smandal te Jonadab te ja' antiguo jme'-jtatique.

¹¹ Ja'uc me to, c'alal och tel ta bay in lumq'uinal to te Nabucodonosor te muc' ajwalil yu'un Babilonia, la jnoptic te tey talotic ta anel ta Jerusalén yu'un te soldado-caldeoetic soc te yu'un siriaetique; jich yu'un nainemotic ta Jerusalén —xiic.

¹² Ja' yu'un te Cajwaltic la sc'opon te Jeremías, jich la yalbey:

¹³ —Jo'on Ajwalilon te Spisil ya xju' cu'une, te Dioson yu'un Israel, ya jpasat ta mandal te ya xba awalbey te ants-winiquetic ta Judá soc ta Jerusalén: “Ac'a anopic te p'ijubtesel, soc ac'a ach'uunic te mandaliletic cu'une. Jo'on yacon ta yalel te Ajwalilone.

¹⁴ Te sts'umbal Jonadab snich'an Recab, c'oem ta pasel ta ch'uunel yu'unic te smandal la yac'bey te ma xyuch' vino, soc asta c'alal ora yo'tic ma ba ya yuch'ic, melel xch'uunejbeyic smandal te antiguo sme'-statique. Jo'on uuc cac'ojbeyex mandalil bayal buelta; ja'uc me to, ma ba ach'uunejic.

¹⁵ Spisil ora la jticunbeyex ta atojolic spisil j'alwanejetic te abatetic cu'une, swenta yu'un ya yalbeyex te yacuc awijq'uitayic te amen awo'tanic soc te amen at'eliletique. Soc te manchuc ya xbaex ta stojol te lotil diosetique, te ma xaquejan abaic ta stojole, te jich ya xju' xcuxinex bael ta bay lumq'uinal te cac'ojbeyex soc te antiguo ame'-atatique. Ja'uc me to, te ja'exe ma la awich'ic ta muc', ni ma la ach'uunic.

¹⁶ Te sts'umbal Jonadab te snich'an Recab, la sc'otesbeyic ta ch'uunel smandal te xchich smamic te ac'botic jilel yu'une, yan te lum Israel ma ba xch'uunejbon te jc'ope.

¹⁷ Jich yu'un te jo'on Ajwalilon te Spisil ya xju' cu'une, te Dioson yu'un Israel, ya cal: Ya me cac' te ya xjul ta stojolic Judá soc te mach'atic yajwal Jerusalén, ta spisil te woclajel te calojbey sc'oplale. Melel calojbeyex, ja'uc me to, te ja'exe ma'yuc bay awich'ojbonic ta muc'; la jc'oponexix, ja'uc me to, ma'yuc bay la ajac'bonic jc'op”, uta me —xi' me te Cajwaltique.

¹⁸ Te Jeremías la yalbey xan ta yan buelta te recabitaetique: —Te Cajwaltic te Spisil ya xju' yu'une, te Dios yu'un Israel, ya yal: “Ja' yu'un te bit'il ach'uunejbey mandaliletic yu'un te Jonadad te ja' antiguo ame'-atatique, soc la ana'iquix te p'ijubtesel yu'une, soc c'oemix ta pasel awu'un spisil te bila la yalbeyex ta mandale,

¹⁹ jo'on te Ajwalilon te Spisil ya xju' cu'un, soc te jo'on Dioson yu'un Israel, ya calbat ta jamal te ma me xch'ay jtuluc sts'umbal Jonadab te ay ta abatinel cu'un spisil ora”, xi' me —xi'.