Jeremías 34 - Bible in Tzeltal de Oxchuc y Tenejapa

Sc'oplal muc' ajwalil Sedequías

¹ Te Nabucodonosor, muc' ajwalil yu'un Babilonia soc spisil te soldadoetic yu'une, ja'ic te mach'atic loq'uemic tel ta yantic nacionetic te ayic ta sc'abe, yacalic ta stenel ta guerra te Jerusalén soc spisil te lumetic te nopol ayic soque. Te Cajwaltic la sc'opon te Jeremías, jich la yalbey:

² —Jo'on Ajwalilon, Dioson yu'un Israel, ya jpasat ta mandal te ya xba awalbey te Sedequías, muc' ajwalil yu'un Judá: “Jich ya yalbat te Cajwaltique: ‘Ya me cac'bey spas te muc' ajwalil yu'un Babilonia te ya yochintay te lum soc te ya xchic' jilele.

³ Te ja'ate ma xju' xcolat loq'uel ta sc'ab, ya me xchucat soc ya me x'ac'otat ta stojol. C'alal ya xlaj yo'tan te ya stejc'anat ta stojol, ya me yic'at bael ta Babilonia.

⁴ Sedequías, muc' ajwalil yu'un Judá, aiya me awaiy stojol te bila ya cal jo'on te Ajwalilone: Ma ba ya xlajat ta ye puñal.

⁵ Jun nax me awo'tan ya xlajat, soc ya me xchic'bat perfume c'alal ya xmujc'at, jich bit'il la xchic'beyic c'alal mujq'uic te antiguo ame'-atatic te neel mandalaj awu'une. Soc ya me yalic: “Ay, cajwal, ayon ta mel-o'tan awu'un”, xiic me. Jo'on Ajwalilon jich yacon ta yalel’, xi' te Cajwaltic”, uta me —xi'.

⁶ Te j'alwanej Jeremías la yalbey spisil te muc' ajwalil Sedequías ta Jerusalén.

⁷ Ja' yorail te yac ta stenel ta guerra a te Jerusalén, te Laquis soc Azeca te soldadoetic yu'un te muc' ajwalil yu'un Babilonia. Ja'ic nax te oxpam lum te jilemic to xane, te tulan to sts'ajc'ulic ta sq'uinal Judá.

Xc'axintayel trato te ya xjil ta libre hebreoetic

⁸ Te Cajwaltic la sc'opon Jeremías c'alal lajix yo'tan ta xchapel c'op te muc' ajwalil Sedequías soc spisil te yajwal te Jerusalén, te ya xjil ta libre te mach'atic smozoinejique.

⁹ Te bila chapal, ja' ya yalbey sc'oplal te mach'atic te ay ta mosoil yu'unic, chican teme winic o ants, te ya yaq'uic ta libre, swenta yu'un ma me ayuc mach'a yac'oj ta mosoil te slumalique.

¹⁰ Spisil te jtsobwanejetic soc spisil lum te lec yo'tanic yu'un te bila chajbaje. Jich la yaq'uic ta libre te mosoetic yu'unique, ma la sujiquix ta abatinel.

¹¹ Ja'uc me to, patil la xcha'na'ic xan te la yaq'uic ta libre, jich la xcha'sujic xan ta abatinel ta yan buelta ta mosoil.

¹² Jich yu'un te Cajwaltic la sc'opon Jeremías, jich la yalbey:

¹³ —Jo'on Ajwalilon, te Dioson yu'un Israel, la jpas trato soc te antiguo ame'-atatic te c'alal la jloq'ues tel ta sq'uinal Egipto, ta bay la yich'ic abatinel ta mosoinele. La calbey mandal:

¹⁴ Ta sjuquebal ja'wil ya yaq'uic ta libre te mach'auc hebreoil te xchonoj sba ta stojolique, teme la yac' sbaiquix ta abatinel c'alal ta waqueb ja'wile. Ja'uc me to, te antiguo ame'-atatic ma la yich'bonic ta muc', ni ma la sc'an xch'uunbonic.

¹⁵ Ta ora yo'tic te ja'exe yanajemix te awo'tanique. Ta neelal la apasic te bila ya smulan te co'tane, melel la awaq'uic ta libre te alumalic te ayic ta mosoile. La awalic ta jamal ta jtojol ta templo te ac'bilon ta jtojole.

¹⁶ Ja'uc me to, ta patil yanaj te awo'tanique, la aboltesbonic te jc'oplale; la acha'sujic ta abatinel ta mosoil te mach'a la awaq'uix ta libre, jich jajch'ic ta abatinel ta yan buelta ta mosoil.

¹⁷ Ja' yu'un yo'tic, jo'on Ajwalilon ya cal: Ja'ex ma la ach'uunbonic jc'op, ma la awaq'uic ta libre te alumalic te ayic ta mosoile. Ta ora yo'tic, ja' ya caq'uex ta libre te ja' ya x'at'ej ta atojolic te guerra, chamel soc wi'nal, swenta yu'un ya me spas ta atojolic bila te ya xjajch' ta nijq'uel yo'tanic yu'un spisilic te mach'atic ya xmandalajic ta balumilal. Jo'on Ajwalilon, jich ya cal.

^18-19 Te jtsobwanejetic yu'un Judá soc ta Jerusalén, soc te mach'atic abatetic ta palacio, soc te sacerdoteetic soc spisil te yantic winiquetic te la xchap sc'opic ta jtojole, ja' bi, olil la sjawic ta bojel te alal wacaxe, c'axic ta yolilal ta xcha'jawal. Ja'uc me to, la xc'axintayic te bila xchapojique, jich ma c'ot ta pasel yu'unic.

²⁰ Jich yu'un, ya me cac' x'och ta sc'abic te scontroic te ya yac' lajel. Te sbaq'uetalic te lajem ya me swe'elinic te jti'awal mutetic soc te yantic jti'awal chambalametique.

²¹ Te Sedequías te muc' ajwalil yu'un Judá soc te sjo'tac ta ajwalil ya me cac' ochuc ta sc'ab scontroic te ya yac' lajel, ja' te soldadoetic yu'un te muc' ajwalil ta Babilonia te comeniquix ta yaq'uel guerra.

²² Ya me calbey mandal te ya xcha'sujt'ic tel ta stojol te lum ta yaq'uel guerra. Ya me stsaquic, soc ya me yac'beyic sc'aal. Ta bay yantic lumetic ta sq'uinal Judá, ya me jpas te ya xjojch'aj ta jyalel, ma'yuc yajwal ya xjil. Jo'on Ajwalilon, jich ya cal —xi' te Cajwaltique.