Jeremías 33 - Bible in Tzeltal de Oxchuc y Tenejapa

Sc'oplal te bila lec ta maliyel

¹ C'alal ay to ta chuquel a te Jeremías ta bay amac' yu'un soldadoetic, te Cajwaltic la sc'opon ta yan buelta, jich la yalbey:

² —Jo'on Ajwalilon te la jpas balumilal, la jchajban soc tulan la jwolan ta bay yawil, jo'on ya calbat:

³ Awtayawon, ya jac'bat. Soc jich ya calbat bitic muc' sc'oplal soc te bitic ma xju' ta na'el awu'une.

^4-5 Jo'on Ajwalilon, te Dioson yu'un Israel, ay me jc'op ya cal yu'un te nanatic ta Jerusalén soc te nanatic yu'un muc' ajwaliletic ta Judá te ya yich'ic tijel coel. Te yacuc xloq'uex bael ta guerra soc puñal ta stojol te caldeoetic, te yacalic ta sbut'el moel te ts'ajc' ta swenta yac'bel guerra te lume, ja' nax me ya xtuun te ya xnoj ta nanatic yu'un te sbaq'uetalic te ya xlaje. Jo'on, te xiweltic sba quilimba, ya cac' ta lajel, melel la jq'uejix bael sit ta stojol te lum ta scaj te spasojic bayal te bila amene.

⁶ Ja'uc me to ya jpoxtay, ya cac' lecubuc q'uinal yaiyic, soc ya me cac' yaiybeyic yutsilal ta lec te lamal-o'tanil, soc ya me cac' te jun yo'tanique.

⁷ Ya cac'bey xan yutsilal Judá soc Israel, soc ya jcha'pas xan, swenta yu'un jich ya xcha'c'otic te bit'il ayic ta xjajch'ibale.

⁸ Ya jlecubtes yu'un spisil te smulic la spasic ta jtojol; ya jpasbey perdón yu'un spisil te bitic amen la spasique, soc te la stoy sbaic ta jtojole.

⁹ Te Jerusalén ya me yac'bon yutsil co'tan, ya me yac'on ta ich'el ta muc' soc cutsilal, ta stojol spisil nacionetic ta balumilal. C'alal ya yaiyic stojol ta alel spisil yutsilal te ya cac'bey tel yajwal Jerusalén, soc spisil te ya cac' esmajuque, ya me xnijc' yo'tanic yu'un xiwel —xi'.

¹⁰ Te Cajwaltic ya yal: —Te ja'ex ya awalic te jocholix jilel ta jyalel in q'uinal to, te ma'yuc ants-winiquetic ni chambalametic ta ac'opique; te calleetic ta Jerusalén soc te lumetic yu'un Judá te jojch'ajiquix ta jyalele, te ni ma'yuc bi ya x'ain tey a, ni ants-winiquetic, ni chambalametic cuxulic tey ae, te xaexe. Lec ay, ya me awaiy xan stojol

¹¹ c'ayojetic yu'un q'uin, soc sbujts-o'tanil, soc te c'ayojetic yu'un nujbinel, soc ya me xchicnaj ta alel: “Albeyaic wocol te Cajwaltic te Spisil ya xju' yu'une, melel te Cajwaltic lec yo'tan stuquel, te xc'uxul yo'tan stalel ay sbajt'el q'uinal”, xiic me. Yu'un ya me yich'ic tel majt'anil ta templo yu'un yalel wocol. Melel ya cac'bey xan yutsilal in lumq'uinal to, swenta yu'un jich ya xcha'c'ot xan te bit'il ay ta xjajch'ibale. Jo'on Ajwalilon, jich ya cal —xi'.

¹² Te Cajwaltic te Spisil ya xju' yu'une, ya yal: —Ja' te lumq'uinal te jochol yo'tique, te ni ma'yuc ants-winiquetic ni chambalametic, soc ta spisil te lumetic yu'une, ay me aquiltic ta yan buelta te bay ya yic' bael tsojboltsojp chijetic yu'un te jcanan-chijetique.

¹³ Asta te lumetic ta toyol witstiquil soc ta peq'uel witstiquil, ta Néguev, ta sq'uinal sts'umbal Benjamín, ta sjoylejal Jerusalén soc ta bay te yantic lumetic yu'un Judá, ay me jcanan-chijetic ya yajtay xchijic tey a. Jo'on Ajwalilon te ya cale —xi'.

¹⁴ Te Cajwaltic jich ya yal: —Ya me xc'ot sc'aalelal te ya xc'ot ta pasel cu'un te bendición te la calbey sc'oplal ta stojol te lum Israel soc Judá.

¹⁵ C'alal yorail soc sc'aalelal, ya me jpas te ay jtul mero sts'umbal ya xc'ot te David, te ya spas te lequil chajbanwanej, soc toj ya x'at'ej ta lumq'uinal.

¹⁶ Te bi yorail ya cale, te Judá ya me xcol soc Jerusalén, jun nax me yo'tan ya xcuxinic. Ja' me sbiil ya awalbeyic: “Cajwaltic te toj ya yaiy tsalaw cu'untique”, xi' me.

¹⁷ Jo'on Ajwalilon ya cal: Ma spas falta te ya xc'ot ta pasel te ay jtul sts'umbal David, te ja' ya xnajc'aj ta muc' nactijibal yu'un Israel,

¹⁸ soc ma spas falta te ay sacerdoteetic te sts'umbal Leví te spisil c'aal ya yac'bon chic'bil majt'anil ta scojt'ol, ya xchic'bonic jmajt'anin harina ta swenta quich'el ta muc', soc ya yat'elin spasel yantic milbil majt'anil ta jtojol —xi' te Cajwaltique.

¹⁹ Te Cajwaltic la yalbey te Jeremías:

²⁰ —Jo'on Ajwalilon ya cal: Ma xju' te ya xquejch'aj ta pasel te trato jchapoj soc te c'aal soc te ajc'ubale. Ma xquejch'aj te trato jpasoj soc, te ya xjul ta yorail.

²¹ Ja' nix jich ma xju' te ya xquejch'aj ta pasel te trato cu'un soc te cabat David, te ay me sts'umbal stuquel te ya xmandalaj ta smuc'ul nactijibe. Ja' nix jich ma xju' te ya xquejch'aj ta pasel te trato jpasoj soc te abatetic cu'une, ja' te sacerdoteetic te sts'umbal Leví.

²² Soc te sts'umbal te cabat David soc te yantic abatetic cu'une, ja' te mach'atic sts'umbal Leví, ya me quesmantesbey yajtalul, jich bit'il eq'uetic ta ch'ulchan soc jich bit'il sji'al mar, te ma'yuc mach'a ya xju' yu'un yajtayele —xi' te Cajwaltique.

²³ Te Cajwaltic la sc'opon Jeremías, jich la yalbey:

²⁴ —¿Yu'un bal ma x'ana' stojol te yacalic ta yalel ants-winiquetic, te jch'ojoj bael ta co'tan ta sc'opic te cha'chajp alnich'an Israel soc Judá, te jo'onix la jtsae? Jich ma ba lec ya yilic te lum cu'une, soc jich c'oemix ta yo'tanic te ma nacionuquixe.

²⁵ Jo'on te Ajwalilon ya cal: Jo'on jchajbanej bit'il ya xbeen te c'aal soc ajc'ubal, cac'oj mandalil te bit'il ya x'at'ej te ch'ulchan soc te balumilal.

²⁶ Jich yu'un, ma'yuc bi ora ya jch'oj bael ta co'tan sts'umbal Jacob soc David te cabate; ma xch'ay cu'un ta tsael loq'uel ta yolilic te mach'atic ya xmandalajic ta stojol te sts'umbal Abraham, Isaac soc Jacob. Melel te jo'one ya me jna'bey yo'bolil sbaic, soc ya me cac'bey xan yutsilalic —xi' te Cajwaltique.