Jeremías 32 - Bible in Tzeltal de Oxchuc y Tenejapa

La sman q'uinal Jeremías

¹ Te Cajwaltic la sc'opon Jeremías ta slajunebal ja'wil yat'el ta ajwalil ta Judá a te Sedequías; ja' swaxaclajunebal ja'wil yat'el ta ajwalil a te Nabucodonosor.

² Ja'ix yorail a te soldadoetic yu'un te muc' ajwalil ta Babilonia te yacalic ta stenel ta guerra te Jerusalén; te j'alwanej Jeremías macal ta chuquel ta amac' yu'un soldadoetic, ta spalacio te muc' ajwalile.

³ Te muc' ajwalil Sedequías yalojix mandal ta chuquel a, melel te Jeremías la yal ta jamal te sc'op te Cajwaltic te la yal: —Ya me cac' ta sc'ab muc' ajwalil yu'un Babilonia in lum to.

⁴ Te muc' ajwalil Sedequías ma xju' ya scoltay sba ta sc'ab te caldeoetique, ya me x'och ta sc'ab te muc' ajwalil yu'un Babilonia, ya me stejc'an sba ta stojol.

⁵ Te Nabucodonosor ya yic' bael te Sedequías ta Babilonia, tey me ya x'ain a ja' to me te c'alal ya cat'elin xan sna'ele. Manchuc me ya atsac aba soc caldeoetic te ja'exe, ma ba lec ya xc'oex. Jo'on Ajwalilon, jich ya cal —xi'.

⁶ Soc la yal te Jeremías: —Te Cajwaltic la yalbon:

⁷ “Aiya awaiy, te Hanameel te snich'an atajun Salum, ya xtal yalbat te yacuc amanbey sq'uinal te ay ta Anatot. Jich yu'un, ay me ta awenta smanel, melel ma yanuc, pajal abiil soc”, la yuton.

⁸ Jich nix te bit'il la yalbon te Cajwaltique, tal yilon te Hanameel ta bay amac' yu'un te soldadoetique. Jich la yalbon te yacuc jmanbey te sq'uinal te ay yu'un ta Anatot, te bay sq'uinal sts'umbal Benjamín, te melel yu'un ay ta jwenta smanel soc te ya cu'unin jilele, ta scaj te mero jun sme'-stat soc te jtate. C'alal la jna' te ja' smandal te Cajwaltique,

^9-10 la jmanbey sq'uinal te Hanameel. La cac'bey juclajuneb ta jsejp plata, te jich trato la jchap soc yu'un te stojole. Te contrato la cac' ta ts'ibuyel, la yich' maquel ta sello, soc la yac' sfirmaic te testigoetique.

¹¹ Ta ora nax la jtsac xchebal te copia yu'un te contratoe, jlejch' te macal te ts'ibubil sc'oplal tey a te q'uinale, soc jlejch' te jamale.

¹² Ja' la cac'bey te Baruc te snich'an Nerías te ja' to smam te Maasías, la cac'bey ta sc'ab Baruc ta sit te Hanameel, ta sit te testigoetic te la yac'bonic sfirmaic yu'un te contratoe, soc ta sit spisilic te judioetic te nacalic ta amac' yu'un te soldadoetique.

¹³ Jich la calbey te Baruc ta stojol spisilic:

¹⁴ —Te Cajwaltic te Spisil ya xju' yu'une, te Dios yu'un Israel, la yal: “Tsaca ta xcha'lejch'el ta bay ts'ibubil te contrato, te macale soc te jamale, q'ueja ta pac'bil oxom, swenta yu'un ya me xjalaj bayal c'aal.

¹⁵ Melel te Cajwaltic te Spisil ya xju' yu'une, te Dios yu'un Israel, la yal: Ta bay in q'uinal to, ya to me yich' manel naetic tey a, soc q'uinaletic soc ts'usubiltic”, xi' te Cajwaltique —la cut.

La sc'opon Dios Jeremías

¹⁶ C'alal laj co'tan yac'bel ta sc'ab contrato te Baruc snich'an Nerías, ta swenta te q'uinal la jmane, jich ochon ta sc'oponel te Cajwaltique:

¹⁷ —Ja'at Cajwal, ta smuc'ul awu'el la achicnantes ta pasel ch'ulchan balumilal. Ma'yuc bila ma xju' awu'un atuquel.

¹⁸ Te ja'ate ya awac' ta ilel xc'uxul awo'tan jmil ta caj te alnich'anetique; ja'uc me to, ya awac'bey castigo ta scaj smulic te me'il-tatiletique. Ja'at muc' Diosat soc bayal awu'el, te abiile ja' “Ajwalil te Spisil ya xju' yu'un”.

¹⁹ Te ja'ate c'ax muc'at yu'un te bila achapoje soc bayal awu'el ta spasel te at'eliletic awu'une. Te ja'ate ya awil spisil te bitic ya spasic te ants-winiquetique, soc ya awac'bey stojic juju-jtul te yat'elic te bit'il ya sc'ane.

²⁰ Ja'at la apas jchajp at'eliletic soc señailetic ta Egipto, soc ja' nix jich yacat ta spasel yo'tic ta stojol Israel soc ta yolilal spisil te ants-winiquetique. Ja' me swentail te c'ax pujq'uemix ta jyalel te ac'oplale.

²¹ Ta smuc'ul awu'el la aloq'ues tel ta Egipto te lum Israel awu'une; la apas jchajp at'eliletic soc señailetic, soc la anojesbey xiwel ta yo'tanic ta spisilic.

²² La awac'bey israeletic in lumq'uinal to, te bay ya x'oquin leche soc chab c'oeme, jich nix bit'il awalojbey sc'oplal te antiguo sme'-statique.

²³ Ja'uc me to, c'alal ochic bael ta lumq'uinal te la yu'uninic, ma la xch'uunbat te ac'ope, ni ma la spasic te p'ijubtesel la awac'beye, ni ma la spasic jtebuc te amandal la awalbeye. Jich yu'un la aticunbey tel ta stojolic te bila amene.

²⁴ “Ta ora yo'tic, te caldeoetic sbut'ojiquix moel lum ta bay sts'ajc'ul te lum ta swenta yac'beyel guerra. Ja' ya x'ochic ta sc'abic a te scontrotac, yu'un guerra, wi'nal soc chamel. Cajwal, ya awilix te ya xc'otix ta pasel te bit'il awalojbonix sc'oplal a.

²⁵ Ja'uc me to, Cajwal, ja'at la awalbon mandal te ya jman soc te ya jtoj te q'uinal ta stojol testigoetic, manchuc teme ya x'och ta sc'ab caldeoetic te lume —xoon ta sc'oponel te Cajwaltique.

²⁶ Ja' yu'un te Cajwaltic la sjac'bey sc'op te Jeremías:

²⁷ —Jo'on Ajwalilon, te Dioson yu'un spisil te mach'atic cuxajtic ta q'uinale. Ma'yuc bila ma xju' cu'un spasel.

²⁸ Jich yu'un ya calbat: Ya me cac' ta sc'ab Nabucodonosor te lume, ja' te muc' ajwalil yu'un Babilonia, soc ta sc'ab te caldeoetique.

²⁹ Te caldeoetic yacalic ta yaq'uel guerra te lume, ya me x'ochic tel ta jyalel li'to, soc ya me yac'beyic jilel sc'aal. Ya me xchiq'uic te nanatic, yu'un la sbolc'optayonic a te la xchic'beyic pom ta sba nanatic te Baal, soc la yac'beyic vino tey a te lotil diosetique.

³⁰ Xjajch'ibal nix tel a, te lum Israel soc te lum Judá spasojic nix tel a te bila ma smulan co'tane; te israeletic ma ba yijq'uitayej ta sbolc'optaybelonic ta swenta te yajcananic te ja'ic nix spasoj stuquelique. Jo'on Ajwalilon, jich ya cal.

³¹ Ja' in jpam lum to, c'alal jajch' ta pasel, ja' to c'alal ora yo'tic, ja' nax yacalic ta spasel te ya sjachbon quilimba soc te ya yac' xc'ajc'ubone. Jich yu'un ya cac' ch'ayuc ta jc'axel,

³² ta swenta spisil smulic staojic ta jtojol, ta scaj sbolil yat'elic te lum Israel soc te lum ta Judá. Jich nix te muc' ajwaliletic, te jtsobwanejetic, te sacerdoteetic, te j'alwanejetic yu'unique, soc spisil te ants-winiquetic Judá soc Jerusalén.

³³ Ja' la yac'bonic quil te spatique, ma ja'uc te yelawique. Manchuc me ma ba laj co'tan ta sp'ijubtesel, ma la yich'bonic ta muc', ni ma la sc'anic tojtesel.

³⁴ La sboltesbonic sc'oplal te templo te ch'ultesbil cu'une, la yaq'uic tey a te yajcananic te c'ax amen ta jsite.

³⁵ La spasbeyic scajtijib smajt'an lotil dios Baal ta Xatal yu'un Ben-hinom, yu'un tey ya xchiq'uic a te ch'in queremetic soc ach'ixetic yu'unic, ta swenta milbil smajt'an te lotil dios Moloc. Jich la yaq'uic ta mulil te Judá, ja' te c'ax amen ta jyalele, te ma'yuc la calbey mandal, soc ni ayuc ta co'tan.

Bila albil sc'oplal ya xc'ot ta pasel ta patil

³⁶ “Jo'on Ajwalilon, te Dioson yu'un Israel, ya calbey sc'oplal te lume. Awalojix te ya x'och ta sc'ab te muc' ajwalil yu'un Babilonia ta scaj guerra, wi'nal soc chamel.

³⁷ Ja'uc me to, ya jtsob tel spisil yajwal te alumal ta bay la jpuquex bael c'alal noj ta co'tan quilimba soc sc'ajc'al co'tan te xiweltic sbae. Ya me quiq'uex sujt'el li' ta bay in q'uinal to, swenta yu'un jun nax me awo'tanic ya x'ainex tey a.

³⁸ Ja'ic me lum cu'un ya xc'ot, soc jo'on me Dioson yu'unic.

³⁹ Ya me cac' te ayuc yutsil yo'tanic ta jtojol, soc te jc'axel ya yich'onic ta muc' ta spisil xcuxlejal, ta swenta slequilal soc te sts'umbalique.

⁴⁰ Ya me jpas trato soc ta sbajt'el q'uinal: Ya me cal ta jamal te ma'yuc bi ora ya xquejch'aj ta pasel cu'un ta stojolic te bila leque, soc ya jnojesbey ta yo'tanic ta yich'belonic ta muc', soc te ma'yuc bi ora q'uejel ya yac' bael yo'tanic.

⁴¹ Bin nax me co'tan ta yaq'uel yutsilalic. Ta spisil co'tan soc ta smelelil, ya cac' ainuc li' ta q'uinal to —xi' te Cajwaltique.

⁴² Te Cajwaltic la yal xan: —Jich bit'il muc' bila amen la jticun ta stojol te lume, ja' nix jich ya jticunbey tel spisil yutsilal te calojix ta jamale.

⁴³ Ja' te lumq'uinal te ya awal te jochol ya xjil ta jc'axele, te ma'yuc mach'a ya xjil tey a, ni chambalametic, soc te ya x'och ta sc'ab te caldeoetique; ja'uc me to, ya xc'ot sc'aalelal te ya yich' manel xan q'uinaletic li'to.

⁴⁴ Puersa me ya yich' manel, ya me yich' pasel contratoetic ta ts'ibuyel sc'oplal, ya me yich' maquel ta sello, soc ya me yac' sfirmaic te testigoetique. Tey me ya xc'ot ta pasel ta sq'uinal sts'umbal Benjamín, ta sjoylejal Jerusalén soc ta bay lumetic yu'un Judá, ta toyol witstiquil, ta peq'uel witstiquil, soc ta bay lumetic ta Néguev. Melel ya sta sc'aalelal te ya cac'bey xan te yutsilale. Jo'on Ajwalilon, jich ya cal —xi' te Cajwaltique.