Jeremías 31 - Bible in Tzeltal de Oxchuc y Tenejapa

Ya sujt' tel israeletic ta slumal

¹ Te Cajwaltic jich ya yal: —Ya me sta yorail te jo'on me Dioson yu'un spisil ta jchajp sts'umbal Israel, soc ja'ic me lum cu'un —xi'.

² Te Cajwaltic ya yal: —Ta jochol taquin q'uinal la cac'bey yil yutsil co'tan ta stojol te lum colic xan ta lajele. C'alal la sleic ta bay ya xcux yo'tan Israel,

³ ta c'ubul tal cac' jba ta ilel yu'unic. Jo'on c'uxbajemat ta co'tan sbajt'el q'uinal; ja' yu'un jich nix yutsil co'tan ta atojol ta ora to.

⁴ Israel, ya jcha'pasat xan ta yach'il. Ya me xtalat yan buelta ta ajc'ot soc panderoetic ta yutsil awo'tanic.

⁵ Ya xba ats'unic xan ts'usubiltic ta witstiquil ta Samaria, soc te mach'atic ya sts'unic ts'usubiltic, bin nax me yo'tanic yu'un te site.

⁶ Melel ya me sta sc'aalelal te ya x'awunic te j'il-q'uinaletic, ta witstiquil yu'un Efraín, ya me x'awunic: “La'ic, ya xbootiquix ta Sión, ta stojol Cajwaltic te Dios cu'untique”, xiic me —xi' te Cajwaltique.

⁷ Te Cajwaltic ya yal: —Binuc nax awo'tanic ya xc'ajinex soc yutsil awo'tanic ta swenta te lum yu'un Jacob; ja' cajal sc'oplal ta yolilic ta spisil te nacionetique. Ac'aic ta aiyel stojol yutsilal sc'oplal, soc jich ac'a yalic: “Te Cajwaltic la scoltay te lum yu'une, te jayeb xan a jilic yu'un te lum Israele”, xiic me ta yalel.

⁸ Ya cac' sujt'uc tel ta lum te ay ta norte, soc ya jtsob tel ta bay c'alal sti'il te balumilale. Ya me xtalic ta stojol te ma'sitetic soc te coxoetique, soc nix te antsetic te yic'oj alal ta xch'ujt'ic soc te antsetic te ayinemix yalique. ¡C'ax muc' me yajtalul ya sujt'ic tel!

⁹ Ya me xtal sc'opononic soc oq'uel. Jo'on ya quic' bael ta beja'etic soc ta pamal be, ta bay ma sc'ojch'in te yacanique. Melel jo'on Staton te Israele, soc te jnich'an Efraín, te ja' banquilale.

¹⁰ “Nacionetic, aiybeya awaiyic sc'op te Cajwaltique; soc albeyaic sc'oplal ta c'ubul ta bay sti'il mar: “Te Cajwaltic la spuc bael Israel; ja'uc me to, ya me stsob soc ya me scanantay jich bit'il ya scanantay chijetic te jcanan-chije”, xaex me.

¹¹ Melel te Cajwaltic la yic' loq'uel te lum Jacob, la scoltay ta libre te ay ta sc'ab nación te bayal yipe.

¹² “Ya me xtalic soc ya me xc'ajinic yu'un yutsil yo'tanic ta sba wits Sión, ay me sbujts' ya yaiyic te utsilal yu'un te Cajwaltique: ja' te trigo, te vino soc aceite, te chijetic soc te wacaxetique. Jich me c'oemic yilel te bit'il awalts'unubil te bueno ya yich' malel ta ja'e, soc ma me xch'ayix te yipique.

¹³ Te ach'ixetic bin nax yo'tan ya x'ajc'tajic, ja' nix jich te queremetic soc te mamaletique. Jo'on ya jmuc'tesbey yo'tanic; ya jc'atp'unbey ta yutsil q'uinal te yoq'uele, soc ya cac'bey muc' yutsil yo'tanic yu'un te xc'uxul swocolique.

¹⁴ Ya me cac'bey te sacerdoteetic te ya swe'elinic te mero lequil we'eliletique; soc te lum cu'une ya me yaiybeyic lec yutsilal ta c'axem to xan te lequil biluquetic cu'une. Jo'on Ajwalilon, jich ya cal —xi'.

¹⁵ Te Cajwaltic ya yal: —Ay chicnaj c'op ta Ramá, yu'un ay mach'a c'axem to xan yacal ta oq'uel. Ja' te Raquel ya yoq'uetay te yalataque. Ma sc'anix te ya xmuc'tesbot q'uinal yaiye, melel lajemiquix te yalataque —xi'.

¹⁶ Ja'uc me to, ya yalbey te Cajwaltique: —Raquel, ma x'oc'at xan; ma xamalix loq'uel ya'lel te asite. Melel te mel-o'tanil awu'une, ya me awich'bey stojol; te awalataque ya sujt' loq'uel tel ta slumal te scontroe. Jo'on Ajwalilon, jich ya cal.

¹⁷ Ay me bila ya amaliy bael ta patil te ja'ate: te awalatac ya me sujt'ic tel ta slumal. Jo'on Ajwalilon, jich ya cal.

¹⁸ Ay caiyoj ajc'an ta c'axem to xan ta lum Efraín, jich la yal: “Jo'on jichon te bit'il jcojt' tat wacax te ma xju' ta pasel ta manso, yan te ja'ate la apason ta manso; ic'awon sujt'el ta atojol, melel ja'at Cajwalat te Diosat cu'une.

¹⁹ La jq'uej jba bael ta atojol, bayal ya jna' ta ora to; la jna'ix te jmule, ya jmajulay co'tan yu'un; ay q'uexlal ya caiy ta co'tan soc peq'uelon ta swenta te muliletic cu'un te c'alal jch'ielon to ae”, xi' ta ajc'an.

²⁰ “Te lum Efraín, ja' te jnich'an te c'ux ta co'tane; ja' te jnich'an te bayal sc'anoj te co'tane. Manchuc me ya cac'bey tulan comel, ma ba ya quijq'uitay ta sna'ulayel; ya stij sba co'tan yu'un, c'ax muc' ya jna'bey yo'bolil sba. Jo'on Ajwalilon, jich ya cal.

²¹ “Israel, ac'beya señail te be, swenta yu'un ma ba wocol ya ata ta yan buelta; p'ijan me yu'un te be bay beenemate. Sujt'an tel lum Israel, sujt'an tel tey a ta bay lumetic awu'une.

²² ¿Bi ora ya xlaj awo'tan te bayuc ya xbaate, te jich jowejemat te bit'il jtul ach'ix te jowejeme? Jo'on Ajwalilon, ay bila jchicnantesej yach'il ta balumilal: Ay jtul ants ya xba sta xan sba soc te smamlale —xi'.

Ya x'esmaj ta patilal Israel

²³ Te Cajwaltic te Spisil ya xju' yu'une, te Dios yu'un Israel, ya yal: —C'alal ya cac'bey xan yutsilal te ants-winiquetic yu'un Judá, te ayiquix ta yan buelta ta sq'uinalic soc ta lumetic yu'unic, jich me ya yalic ta yan buelta: “Te Cajwaltic ac'a yac'bey bendición te ch'ul wits te bay ya xnain te stojil chajbanele”, xiic me.

²⁴ Te ants-winiquetic ta sq'uinal Judá, soc te ay ta lumetic yu'une, te j'at'eletic ta lumq'uinal soc te jcanantaywanejetic yu'un tsojboltsojp chijetique, tey me ya x'ainic a.

²⁵ Ya me cac'bey bayal swe'el yuch'elic te mach'atic lubenic soc te ma'yuquix yipique —xi'.

²⁶ Jich ora wijc' jsit, soc la quil te q'uinale. Te jwayele bujts'an nax la caiy.

²⁷ Te Cajwaltic jich ya yal: —Ya me xtal sc'aalelal te ya cac' esmajuc te winiquetic soc chambalametic ta bay Israel soc ta bay Judá.

²⁸ Jich bit'il jun co'tan la jpas ta swenta sbulel, ta stijel coel, ta xch'ojel ta lum, ta sjinel, soc ta yac'beyel swocolic, ja' nix jich co'tan ta spasel soc ta sts'unel xan. Jo'on Ajwalilon, jich ya cal.

²⁹ “Te bi ora ya xc'ote, ma ba ya yalic xan: “Te sme'-statique la slo'ic pajal ts'usub; te yal-snich'anic ya stsic'bot yeic yu'un uuc”, te xi' ta alele.

³⁰ Melel te mach'a ya slo' te pajal ts'usube, ja' ya xnijq'uesbot yeic yu'un. Juju-jtul ya x'ac'otic ta lajel yu'un te smulique —xi' te Cajwaltique.

³¹ Te Cajwaltic jich ya yal: —Ya me xtal sc'aalelal te ya jpas yach'il trato soc Israel soc Judá.

³² Te trato ya jpase, ma jichuc te bit'il la jpas soc te antiguo sme'-static, c'alal la jtsacbey tel sc'abic te la jloq'ues tel ta Egipto. Melel ma la sc'otesic ta ch'uunel te trato cu'une, manchuc teme jo'on yajwalonique. Jo'on Ajwalilon, jich ya cal.

³³ Ja' in to ja' te trato ya jpas soc Israel c'alal ya sta sc'aalelal: Ya jts'ibubey ta yo'tanic te jmandale, soc ya me cac'bey ta sjolic. Jo'on me Dioson yu'unic, soc ja'ic me lum cu'un. Jo'on Ajwalilon, jich ya cal.

³⁴ Ma'yuquix mach'a ya xp'ijubtesot yu'un sjo'tac ni spat-xujc' ta swenta sna'belonic jba, melel spisilic me, bay muc'-biq'uit, ya me sna'bonic jba. Ya jpasbey perdón te bila amen spasoje, soc ma ba ya jna'bey xan te smulique. Jo'on Ajwalilon, jich ya cal —xi' te Cajwaltique.

³⁵ Te Cajwaltic la yac' te c'aale, swenta yu'un ya sacub q'uinal yu'un; soc la yac' te u soc te eq'uetique, swenta yu'un ya xojobaj ta ajc'ubal; soc ya yac'bey stij sba soc sbul te mar te ya xc'opoj soc te yipe. Ja' me sbiil te Ajwalil te Spisil ya xju' yu'une, ja' ya yal:

³⁶ —Teme ay bi c'aalil ya xch'ay yip te mandaliletic chajbanbil cu'une, ja' ni me jich sc'aalelal ya xjil ta co'tan te lum Israele. Jo'on Ajwalilon, jich ya cal.

³⁷ Te ayuc bi c'aalil ya xju' ta p'isel te ch'ulchane soc te ya xju' ta ilel c'alal ta yiptajib te balumilale, jich me c'aalil ya jch'oj bael ta co'tan Israel ta swenta spisil te bila spasoje. Jo'on Ajwalilon, jich ya cal —xi' te Cajwaltique.

³⁸ Te Cajwaltic jich ya yal xan: —Ya me sta sc'aalelal te ya yich' cha'pasel te lum cu'une, c'alal ta toyol ts'ajc' swenta iljibal q'uinal yu'un Hananeel ja' to ta Yochibal te banti yac'oj buelta te sts'ajc'ule.

³⁹ Te sts'ajc'ule toj nax ya xbajt', c'alal ta ch'in wits yu'un Gareb, ta ora ya xjoybej tel ta stojol Goa.

⁴⁰ Spisil te xatlejal te bay ya yich' muquel te animaetic soc te bay ya yich' ch'ojel bael te c'ajc'al tane, soc spisil te q'uinal ay ta sba beja' yu'un te Cedrón, ja' to ta bay la spas tel buelta, ta Yochibal Caballoetic, ta stojol sloq'uib c'aal, ac'bilon cu'unin. Soc spisil ma ba ya yich' xan tijel, ni jinel —xi' te Cajwaltique.