Jeremías 25 - Bible in Tzeltal de Oxchuc y Tenejapa

Contro ya xtal ta norte

¹ Ta xchanebal ja'wil yat'el ta ajwalil a te Joacim te snich'an Josías ta Judá, te Cajwaltic la yalbey te Jeremías te sc'oplal spisil lum Judá. Ja' sbabial ja'wil yat'el ta muc' ajwalil a te Nabucodonosor ta Babilonia.

² Te j'alwanej Jeremías la sc'asesbey sc'op Cajwaltic spisil te lum Judá soc te yajwal Jerusalén. La yal:

³ —C'alal to ta yoxlajunebal ja'wil yat'el ta ajwalil a te Josías te snich'an Amón ta Judá asta ora yo'tic, ja' te ayix oxeb xcha'winic ja'wil, te Cajwaltic la sc'oponon. Ta jujun buelta la calbeyex awaiyic te ja'ex ta jujun buelta; ja'uc me to, ma la awich'bonic ta muc'.

⁴ Manchuc teme bayal buelta la sticun te yabat te j'alwanejetic yu'une, te ja'exe ma'yuc bay la awich'ic ta muc', ni ma la ac'an la awaiyic stojol, soc ni ma la ach'uunic.

⁵ Ja'ic la yalbeyex awaiyic: “Ijq'uitaya jilel te amen-o'tanil soc te amen at'eliletic awu'une; yu'un jich me ya xju' ya x'ainex ta lumq'uinal te la yac'beyex awu'unin sbajt'el q'uinal te Cajwaltic te ja'ex soc te ame'-atatique.

⁶ Ma xbaex ta stojol lotil diosetic; ma xach'uunic, soc ma xaquejan abaic ta stojol. Ma xawac' x'ilin yo'tan Cajwaltic ta scaj xch'uunel awu'unic te diosetic te apasojic ta ac'abic te ja'exe, jich ma'yuc bila amen ya xtal ta atojolic yu'un”, xiic ta yalel.

⁷ Ta ora yo'tic te Cajwaltic ya yal: “Te ja'exe ma x'ac'an awich'bonic ta muc' te jc'ope; ya awac' ilinuc co'tan yu'un te ach'uunejic lotil diosetic te ja'ex nix la apasique. Jich me ya xtal te bila amen ta atojolique”, xi'.

⁸ “Jich yu'un, ya yal te Cajwaltic te Spisil ya xju' yu'une: “Te bit'il ma la awich'bonic ta muc' te sjultesjibal awo'tanic cu'une,

⁹ ya quic' tel spisil te lumetic ta norte, soc te cabat Nabucodonosor te muc' ajwalil yu'un Babilonia, swenta yu'un ya me xtal yac'beyic guerra in lum to, soc ta spisil te yajwale, soc ta spisil te nacionetic te ayic ta sts'eele. Ya me jin ta jc'axel. Ya me jc'atp'un ta jinem ts'ajq'uetic te ya yac' xiwel soc nijq'uel.

¹⁰ Ya me jpas te ma ba ya cac' ta aiyel stojol c'ayojetic yu'un q'uin, soc sbujts-o'tanil, soc te c'ayojetic yu'un nujbinel, ni ma me xchicnaj sc'op te cha' yu'un juch'majel, ni ma ba xchicnajix xojobil te c'ajq'uetic tey a.

¹¹ Spisil te lum ya xjin jilel, ya xc'atp'uj ta jinem ts'ajq'uetic. Lajuneb me xchanwinic (70) ja'wil ja' in nacionetic to ya me yac' sbaic ta xch'uunel smandal te muc' ajwalil yu'un Babilonia.

¹² Te c'alal ya sts'aquej te lajuneb xchanwinic (70) ja'wile, ya quich'bey sc'op yu'un smul te muc' ajwalil yu'un Babilonia soc te nación yu'une, ja' te slumal caldeoetic, soc ya jin ta sbajt'el q'uinal. Jo'on Ajwalilon, jich ya cal.

¹³ Ya cac' c'otuc ta stojol te Babilonia te bila albil sc'oplal soc te ts'ibubil li' ta libro to, spisil te bila yaloj te Jeremías ta jwenta ta scontroinel spisil te nacionetique.

¹⁴ Muc'ul nacionetic soc muc' ajwaliletic te ay yipique ya me yac'bey xch'uunic mandal te babiloniaetique. Jich me ya cac'bey stoj te bit'il ya sc'an yu'un te yat'elique”, xi' te Cajwaltic —xi' te Jeremiase.

Castigo ta stojol nacionetic

¹⁵ Te Cajwaltic te Dios yu'un Israel, la yalbon: —Ilawil te copa te nojel yu'un vino, ja' te quilimbae. Tsaca soc ac'beya yuch' spisil te nacionetic ta bay ya jticunat baele.

¹⁶ C'alal ya yuch'ic c'oem te copa, ya me xjajch'ic ta xenel. Jich me ya xc'otic te bit'il jowil joletic ta scaj te guerra ya jticun tele —xi' te Cajwaltique.

¹⁷ La jtsac te copa ay ta sc'ab te Cajwaltic, la cac'bey yuch'ic spisil te nacionetic te banti la sticunon baele.

¹⁸ La cac'bey yuch' te Jerusalén, te lumetic yu'un Judá, te muc' ajwaliletic yu'une, soc te jtsobwanejetique, ta swenta sjinelic soc te ya xc'atp'ujic jilel ta jinem ts'ajq'uetic te ya yac' xiwel soc nijq'uel. Ja' me seña te boloben sc'oplalic asta ora to.

¹⁹ Ja' nix jich la cac'bey yuch' faraón muc' ajwalil yu'un Egipto soc te sjo'tac ta ajwalil, te jtsobwanejetic soc spisil te lum yu'une,

²⁰ soc nix te ants-winiquetic te yantic sts'umbal te ayic tey a. Soc la cac'bey yuch'ic spisil te muc' ajwaliletic ta sq'uinal Uz, soc ta bay sq'uinal filisteoetic, ja' te lum Ascalón, Gaza, Ecrón soc te bay jilem xan ta Asdod;

²¹ soc ja' nix jich te Edom, Moab soc Amón;

²² soc nix spisil te muc' ajwaliletic yu'un Tiro soc Sidón; soc nix spisil te mach'atic muc' ajwaliletic yu'un te lumetic ta ti'mar Mediterráneo;

²³ soc ta chajbalchajp sts'umbal Dedán, Tema soc Buz, soc te lumetic te ya sjox sjolique,

²⁴ soc ta spisil te muc' ajwaliletic yu'un Arabia; soc nix ta spisil te muc' ajwaliletic te yantic sts'umbal te nainemic ta jochol taq'uin q'uinal;

²⁵ soc nix ta spisil te muc' ajwaliletic yu'un Zimrí, Elam soc Media;

²⁶ soc ta spisil te muc' ajwaliletic ta norte, nopolic o c'ubul ayic juju-jchajp, ja' bi spisil mach'atic ya xmandalajic ta balumilal. Ta slajibal ya yuch' te muc' ajwalil yu'un Babilonia.

²⁷ Soc la yalbon te Cajwaltique: —Albeya yaiyic te jo'on Ajwalilon te Spisil ya xju' cu'une, te Dioson yu'un Israel ya calbey mandal: “Uch'aic me ja' to te c'alal ya xyacubex ta jyalel, te ya xenex soc te ya xyalex ta lum, swenta yu'un ma xjajch'ex ta scaj te guerra te ya jticun tele”, xoon me.

²⁸ Teme ma sc'an ya stsacbat yuch' te copa, albeya: “Te Cajwaltic te Spisil ya xju' yu'une ya yal: ‘Ya me yuch'ic ta puersa.

²⁹ Ya me xjajch'on ta yaq'uel tel te castigo ta stojol te lum te cu'unineje. ¿Ya bal acuy te ma ba ya staex te castigoe? Ma'yuc mach'a ma xtaot yu'un, melel ya jticun tel guerra ta stojol spisil te mach'atic ayic ta balumilal. Jo'on Ajwalilon te Spisil ya xju' cu'une’, xi' sc'op”, uta me.

³⁰ “Ja'at, Jeremías, ala me loq'uel ta jwenta ta spisil in bitic to. Albeya: “Te Cajwaltic tulan ya xc'opoj tel jichuc chawuc c'alal ta toyol, c'alal ta ch'ul awilal ta bay nainem. Ya x'awun, jich bit'il te mach'atic ya steq'uic ts'usub, ta scontroinel te jtsojp chijetic yu'une, soc ta scontroinel spisil mach'atic yajwal te balumilale.

³¹ Te yip sc'ope ya xc'ot c'alal to ta sti'il te balumilale, melel te Cajwaltic ya yilbey yat'elic te nacionetique; ya yic' tel ta chajbanel spisil te ch'ich'-baq'uetetique, ya yac'bey yil swocolic ta lajel te mach'atic amenique. Te Cajwaltic jich ya yal”, uta me —xi' te Cajwaltique.

³² Te Cajwaltic te Spisil ya xju' yu'une, jich ya yal: —Te tulan woclajel ya xjulix tel ta stojol jujun nación; xiweltic sba jichuc tulan yic'al ja'al ya xjajch' c'alal ta sti'il te balumilale —xi'.

³³ Te mach'atic ya yac' ta lajel ta bi c'aalil te Cajwaltique, limilic me ta lum ya xjil ta juju-jejch' sti'il te balumilale. Ma me ayuc mach'a ya x'oc' yu'unic, ma'yuc mach'a ya yich'beyic bael sbaq'uetal ta muquel; limil ya xjilic ta lum jichuc stsa' chambalam.

³⁴ Awunanic, jcanan-chijetic, awunanic yu'un xc'uxul; ja'ex te ya xneelajex yu'un te jtsojp chijetic, balana abaic ta lum. Yu'un c'otix yorail te miltombae; te ja'exe jich ya smilex te bit'il jujp'en chijetique.

³⁵ Te jcanan-chijetic ma xju' yu'unic te ya x'anique; te j'ic'awanejetic yu'un te jtsojp chijetique ma xju' ya scoltay sbaic.

³⁶ Te jcanan-chijetic ya x'awunic, te j'ic'awanejetic yu'un te jtsojp chijetique ya x'awunic yu'un xc'uxul, melel te Cajwaltic la yac' lajuc te swe'elique.

³⁷ Ilin te Cajwaltic, jich la sjinbey te t'ujbil aquiltic ta q'uinale.

³⁸ Jich loc' tel te bit'il león-choj ta bay xch'en; te slumalic c'atp'uj jilel ta jinem ts'ajq'uetic. Yu'un til jichuc c'ajc' te yilimba Cajwaltic, jich la sticun tel guerra te xiweltic nax sbae.