Jeremías 23 - Bible in Tzeltal de Oxchuc y Tenejapa

Smaliyel bi lec ta patil

¹ Te Cajwaltic jich ya yal: —Obol sbaic te jcanan-chijetic te ya yijq'uitayic te chijetic cu'un, te ya xch'ayic soc te ya xpujq'uic baele —xi'.

² Te Cajwaltic, te Dios yu'un Israel, ya yalbey te jcanan-chijetic te ya xmandalajic ta stojol te slumale: —Ja'ex la apucbonic bael te chijetic cu'une, la axiwtesbonic bael, ma ba la acanantaybonic. Ja' yu'un ya me cac'bat tulan castigo yu'un te amen awat'elique. Jo'on Ajwalilon, jich ya cal.

³ Jo'onix ya quic' tel te jayeb xan chijetic te bay la cac' anuc bael ta lumetique, ya jtsob tel, soc ya cac' sujt'uc tel ta bay te swe'elique, swenta yu'un ya me yac' bayal yalatac.

⁴ Ya cac'bey jcanantaywanej yu'un te ya scanantayic ta lec, swenta yu'un ma me ayuc xiwel ya yaiyic, ni ma me xch'ay jcojt'uc. Jo'on Ajwalilon, jich ya cal —xi'.

⁵ Te Cajwaltic jich ya yal: —Ya me sta sc'aalelal te ya cac'bey tel jtul mero sts'umbal David, ja' me jtul muc' ajwalil te ya xmandalaj soc sp'ijil, soc toj me ya x'at'ej ta chajbanwanej ta stojol te lume.

⁶ Ta yorail te ay ta at'el ta muc' ajwalile, te Judá ya me xcol; jich nix te Israel, jun nax me yo'tan ta q'uinal. Ja' me sbiil ya awalbeyic in to: “Cajwaltic te toj ya yaiy tsalaw cu'untique” xaex me ta yalel —xi'.

⁷ Te Cajwaltic jich ya yal: —Ya me xtal sc'aalelal te ma ba ya awaliquix: “Ta swenta bit'il cuxul te Cajwaltic, jich la sloq'ues tel ta Egipto te israeletique”, ma me xauquex;

⁸ ja'uc me to, jich me ya awalic: “Ta swenta bit'il cuxul te Cajwaltic, jich la sloq'uesbey tel sts'umbal Israel ta bay norte, soc ta spisil te lumetic ta bay la spuc baele”, xaex me. Tey me ya xba ainuquic ta bay mero te slum-sq'uinalique —xi'.

Sc'oplal j'alwanejetic

⁹ Te bit'il ay sc'oplal te j'alwanejetic, jich ay: Lajemon ya caiy soc te co'tane; spisil jbaq'uetal ya xnijc'. Jichon yilel te bit'il jyacubele; jich bit'il jtul winic u'uninbil yu'un vino. Ja' ta scaj te Cajwal soc te xch'ul-c'ope.

¹⁰ Te lume nojel ta yo'tanic mulwej; ja' te ants-winiquetic buen animal ya xbajt'ic ta spasel te bila amene, mero ya stuuntesic yip sbaq'uetalic ta spasel te bila ma stojiluque. Ja' swentail te la yut jilel Cajwaltic te q'uinale, jich a taquej te lumq'uinale, c'ajq'uem yilel a jil te aquiltic ta jochol taquin q'uinal.

¹¹ Te Cajwaltic jich ya yal: —Te j'alwanejetic soc te sacerdoteetic ma tojuc yo'tanic, ta templo cu'un yacalic ta spasel te bila amen la jta tey a.

¹² Jich yu'un, te sbe ijc'uben me, soc biluben me; ya me cac' te ya scotp'inic, jich me ya xyalic. C'alal ya quich'bey ta wenta yat'elic, ya me cac' tel tulan woclajel ta stojolic. Jo'on Ajwalilon, jich ya cal.

¹³ “Jo'on quiloj te j'alwanejetic yu'un Samaria, ya spasic te bitic ma smulan co'tan; melel j'alwanejetic yu'un Baal, jich la sjowtesbonic te lum Israel cu'une.

¹⁴ Quiloj te j'alwanejetic ta Jerusalén, ya spasic bitic ilaybil: ya spasic mulwej soc lo'laywanej, ya sjajch'bey xan yo'tanic mach'atic amenic te ma'yuc mach'a ya yijq'uitay sba yu'un te bila amen ya spase. Ja'ic soc te mach'atic yajwal te lume jich c'oemic ta co'tan te bit'il Sodoma soc Gomorra.

¹⁵ Jich yu'un, te jo'on Ajwalilon te Spisil ya xju' cu'une, ya cal ta stojolic te mach'atic j'alwanejetique: Ya cac'bey swe'ic te bila bayal xch'aale; ya cac'bey ja' yuch'ic te yich'oj veneno. Melel te mach'atic j'alwanejetic ta Jerusalén pujq'uemix yu'unic te bila amen ta spamal te lumq'uinale —xi' te Cajwaltique.

¹⁶ Te Cajwaltic te Spisil ya xju' yu'une, ya yal: —Israeletic, ma x'awich'ic ta muc' te bila ya yalbeyex te mach'atic ya scuy sbaic ta j'alwanejetique. Te bila ya yalique, ja' nax puro lot; te bitic ya yalique, ja' nax ya xchicnantesic stuquelic, ma'yuc bay calojbey jc'op.

¹⁷ Te j'alwanejetic ya yalbey te mach'atic ya yilaybonic te jc'ope: “Spisil lec ya xc'oex ta loq'uel yu'un”, xiic. Soc ya yalbey te mach'atic tulan ya yac' sbaic bael ta q'uejel soc te yo'tanique: “Ma'yuc bila amen ya xtal ta atojolic”, xiic ta yalel —xi' te Cajwaltique.

Tulan c'opoj Jeremías

¹⁸ Ja'uc me to, ¿mach'a sna'oj te bila muquen ay ta yo'tan te Cajwaltique? ¿Mach'a yiloj soc mach'a yaiyojbey stojol te sc'ope? ¿Mach'a la yaiybey stojol?

¹⁹ Te yilimba Cajwaltic, jich bit'il tulan yic'al ja'al, jich bit'il tulanil ic' ta c'axem to xan te ya syuq'uilay te mach'atic amenique.

²⁰ Te yilimba Cajwaltic, ma xcom, ja' to chican teme c'ot ta pasel yu'un te bila ay ta yo'tane. Ya me sta yorail te ya anop ta awo'tanic soc ya xc'ot ta awo'tanic in bitic to.

Sc'oplal yu'un Cajwaltic lotil j'alwanejetic

²¹ Te Cajwaltic ya yal: —Ma jo'ucon la jticun te j'alwanejetic to, ja'uc me to, loq'uic ta animal; soc ma jo'ucon la jc'opon; ja'uc me to, bajt'ic ta c'op ta jwenta ta sc'opic.

²² Te yu'unuc la sna'ic te bila ay ta co'tane, la yalbonic jc'op ta stojol te lum cu'un te jichuque; la yac'beyic yijq'uitay te amen be st'unojic te jichuque soc la yijq'uitayic te sbol at'elique —xi' te Cajwaltique.

²³ Te Cajwaltic jich ya yalbat: —Teme najt' ay, o teme nopol ay, jo'on Dioson jtuquel.

²⁴ ¿Mach'a ya xju' ya snac' sba ta jsit? Melel te jo'one ayon ta ch'ulchan soc ta balumilal. Jo'on Ajwalilon, jich ya cal.

²⁵ “Caiyojbey slotic te j'alwanejetic to te ya xjelawic, te ja' ya xc'opojic ta jwenta ta sc'opique, soc te la jc'opon ta swaichic ta sc'opique.

²⁶ ¿Bi to ora ya xcomic ta yalulayel lotil c'opetic te j'alwanejetic, te stuquel ya snop ta sjolique?

²⁷ Te swaichic ya yalbey sbaic juju-jtul, ay ta yo'tanic te yacuc xch'ayon ta yo'tan a te lum cu'une, jich nix te bit'il ch'ayon ta yo'tanic te antiguo sme'-static, te bajt'ic ta stojol Baal.

^28-29 Teme ay jtul j'alwanej ay swaich, ac'a yal te ay swaiche; teme yu'unix yaiyojbon te jc'ope, jich toj ta alel yu'un. Ma pajaluc soc taquin ac te trigoe. Te jc'ope jich bit'il c'ajc', soc jich bit'il martillo te ya swuy te tone. Jo'on Ajwalilon, jich ya cal.

³⁰ “Jich yu'un, ya cal ta jamal te ya jcontroin te j'alwanejetic to, te ya slo'lay sbaic a te bitic scuyoj ta jc'ope. Jo'on Ajwalilon, jich ya cal.

³¹ Ya me cal ta jamal te ya jcontroin te j'alwanejetic te ya scuybonic ta jc'op, te ya sc'asesic te bitic stuquel snopojique.

³² Ya me cal ta jamal te ya jcontroin te j'alwanejetic to te ya xcholic slotil waichique; ta swenta te lotetic soc c'opetic te ya spasic te ya sjowtesbonic te lum cu'une. Ma'yuc bay jc'oponej, ni ma'yuc bay jticunej, ni ma'yuc bay calojbey mandal jtebuc, jich ma xju' yu'unic scoltayel te lume. Jo'on Ajwalilon, jich ya cal.

Bit'il ya sc'an alel sc'op Cajwaltic

³³ “Jeremías, teme ay jtul yajwal te lume, jtul j'alwanej, o jtul sacerdote te ya sjojc'obate: “¿Bila a te c'op mero al awentainej yu'un te Cajwaltique?” teme ya yutate, albeya: “Te Cajwaltic ya yal te alex jichuc ijc'atsil te ja'exe, te jich ya xch'ojex bael”, ya me awut.

³⁴ Ay wan ya yal jtul j'alwanej, jtul sacerdote, o jtul yajwal te lume: “Mero al te ijc'atsil yu'un te Cajwaltic”, teme xie, ya cac'bey castigo yu'un soc te mach'atic ay yu'une.

³⁵ C'alal ay mach'a ya sjojc'obat, me jtul ajoy, o ja' te mach'a ay awu'une, ya wan yal: “¿Bi sujt'ib aiyej yu'un te Cajwaltique? ¿Bi la yal?” teme xie,

³⁶ ma me ja'uc xawal xan: “Mero al te ijc'atsil yu'un Cajwal.” Melel teme ay ya awal loq'uele, ya me cac' te ya xc'atp'uj ta awijc'ats te c'op ya awale. Melel la ayantesic te jc'op jo'on te cuxul Dioson, te Dioson awu'un, te Ajwalilon te Spisil ya xju' cu'une.

³⁷ “Jeremías, jojc'obeya te j'alwanejetique: “¿Bi sujt'ib sc'op te Cajwaltique? ¿Bi la yal?” uta me.

³⁸ Teme ya yalic: “Mero al ijc'atsil yu'un te Cajwaltic”, teme xie, sujt'esbeya: “Te Cajwaltic ya yal: ‘Te bit'il yacalex ta stuuntesel te c'op te ma la cac' ta tuuntesele,

³⁹ ya me jachex jichuc ijc'atsil, te ja'exe soc te muc'ul lum la cac'beyex soc te antiguo ame'-atatique, c'ubul to me ya jch'ojex bael ta jtojol.

⁴⁰ Ta swenta sbajt'el q'uinal ya jpejc'anex soc ya caq'uex ta q'uexlal, te ma'yuc bi ora ya xch'ay ta o'tanile’, xi' me”, uta me —xi' te Cajwaltique.