Jeremías 20 - Bible in Tzeltal de Oxchuc y Tenejapa

Sc'oplal Pasur, scontro Jeremías

¹ Te Pasur snich'an Imer, te ja' sacerdote soc swentainej te templo, c'alal la yaiy te bila la yal te Jeremías,

² la yal mandal te ya yich' majel, soc te ya yich' xojel jilel yacan ta te' te ay ta Cajal Yochibal yu'un Benjamín, te nopol yiloj sba soc templo.

³ Ta yan c'aal ta patil la yal mandal ta loq'uesel te Jeremías ta bay xojol te yacane. Jich yu'un te Jeremías la yal: —Te Cajwaltic la sjelbatix abiil, Magor-misabib c'otix.

⁴ Melel te Cajwaltic ya yalbat: “Ya me cac' te ja'at nix ya axiwtes aba atuquel soc ta spisil te ajo'taque. Ta mero asit atuquel, te ajo'tac ya me xlajic ta spuñal te scontrotaque. Ya me cac' ta c'abal spisil yajwal te Judá ta sc'ab te muc' ajwalil yu'un Babilonia, te ya x'ic'otic bael ta Babilonia, o teme ya xlajic ta milel ta cuchillo.

⁵ Ja' nix me ya cac'bey ta sc'ab scontrotac spisil sc'ulejal te lume, spisil bila yu'uninej, soc te bitic bayal sc'oplal, soc spisil yawil sc'ulejal te muc' ajwaliletic yu'un Judá, swenta yu'un ya me yich'ic bael ta Babilonia.

⁶ Te ja'at Pasur, ya me x'ic'otat bael ta Babilonia soc spisil mach'atic ay awu'un. Tey ya xlajat a, soc tey me ya xmujc'at a soc spisil te ajo'tac, te la awalbey lotil c'op ta j'alwaneje”, xi' ac'oplal yu'un te Cajwaltique —xi' te Jeremías.

La sc'an parte ta stojol Cajwaltic te Jeremías

⁷ Cajwal, ja'at la alo'layon; jich te jo'one la cac' jba ta lo'layel awu'un. Mero c'ax tulanat te ja'ate, jich la atsalon. Ta spisil ora xjajch'ibalon tse'ej; spisilic ya slabanonic.

⁸ Melel spisil ora te c'alal ya xc'opojone, ya calulay te ya xtal bayal wocol soc jinel. Spisil ora ya yixtac'optayonic soc ya slabanonic, ja' yu'un te ya cal loq'uel te ac'ope.

⁹ Teme ya cal: “Ma'yuquix ta co'tan te Cajwale, ma ba ya calbeyix sc'oplal”, teme xoone, jich yu'un te ac'op ta yutil co'tan ya xc'atp'uj ta c'ajc'. Jich ya xc'ajc'on ta jc'axel, ya me sol ochel c'alal ta jbaquel. La jnop te c'an jcom jba ta yalel te ac'ope; ja'uc me to, ma ba ju' cu'un.

¹⁰ La caiy stojol te sajlajan ta c'op te ants-winiquetique: “Ay xiwel ta spisil ta bayuc”, xiic. Ya yalic: “La'ic, ya xba jlebetic smul”, xiic. Asta te jo'taque ya smaliy yilic te yacuc cal loq'uel jtebuc te lotil c'ope. Ya yalic: “Yacuc yac' sba ta lo'layel; jich me ya jtsaltic soc ya me jsutbeytic spacol”, xiic.

¹¹ Yan te ja'at Cajwal, ajoinejon jich bit'il jtul guerra-winic te ma'yuc ta tsalele. Te mach'atic ya snutsonique, ya me xyalic, jich ma'yucon ta tsalel yu'unic. Ma'yuc bi ya xju' yu'un, ja' nax ya xjilic ta q'uexlal; peq'uel ya xjilic ta jyalel, ma xch'ay ta na'el sbajt'el q'uinal.

¹² Cajwalat te Spisil ya xju' awu'une, ja'at te stojil ya atsajtay o'tanil atuquel, ja'at te ya awilbey c'alal ta yutil yo'tan te winique, ac'bon quil bit'il ya awac'bey castigo te ants-winiquetique. Melel cac'ojbat ta ac'ab te jwocole.

¹³ C'ajintayaic te Cajwaltic, albeyaic yutsil sc'oplal; melel ja' stuquel ya scoltay te mach'a ay swocol yu'un te mach'atic amenique.

¹⁴ Mero c'ax amen te bi c'aalil ayinone; te bi c'aalil ayinon ta swenta te jme'e, ma me ayuc yutsil.

¹⁵ Mero ma me lecuc sc'oplal te mach'a la yac'bey yutsil yo'tan te jtate, te la yalbey yaiy te ayinemix te ch'in querem te snich'ane.

¹⁶ Ja' me winic to jichuc me te bit'il lumetic te Dios ya sjin sbajt'el q'uinale. Ac'a chicnajuc awetic ta sab yu'un xc'uxul, soc señail guerra ta olil c'aal.

¹⁷ Melel te Diose ma la yac' lajucon ta xch'ujt' te jme'e. Ja' jmuquenal c'ot te xch'ujt' jme' te jichuque, jich ma ba ayinon.

¹⁸ ¿Bi yu'un te loc'on tel ta xch'ujt' te jme'e, te ja' nax tal caiy xc'uxul mel-o'tan ta q'uinal, swenta yu'un potsbilon ta q'uexlal ya xch'ayon bael ta q'uinal soc jcuxlejal?