Jeremías 15 - Bible in Tzeltal de Oxchuc y Tenejapa

Sc'oplal castigo

¹ Te Cajwaltic la yalbon: —Manchuc me ya xtal stejc'an sbaic ta jtojol li'to te Moisés soc Samuel, te jo'one ma ja'uc ya jna'bey yo'bolil sba yu'un a te lume. Albeya, ac'a loc'uc bael ta jtojol, ac'a bajt'uquic.

² Teme ya sjojc'obat te banti ya xbajt'ique, albeya te bila ya cale: “Te mach'atic chapal sc'oplal te chamel ya yaiy xlaje, jich nix me ya xlaj abi; te mach'atic chapal sc'oplal ya xlaj ta guerra, jich nix me ya xlaj abi; te mach'atic chapal sc'oplal te wi'nal ya yaiy xlaje, jich nix me ya xlaj abi; te mach'atic chapal sc'oplal ya x'ic'otic bael ta mosoinel, ya nix me xbajt'ic abi”, uta me.

³ “Jo'on Ajwalilon, jich ya cal: Ya jticunbey tel chanchajp castigo: Ay ya xmilotic ta guerra, ay me ya yich'ic tasel bael yu'un ts'i'etic, ay me ya xti'otic yu'un te xulemetic soc ay me ya xbic'otic yu'un te jti'awal chambalametique.

⁴ Te nacionetic ya cac'bey xiwel ta yo'tanic yu'un te bila ya jpas ta stojolique, ta scaj yat'el te muc' ajwalil yu'un Judá, te Manasés te snich'an Ezequías, te bila spasoj ta Jerusalén.

⁵ “¿Mach'a c'an sna'bat yo'bolil aba, Jerusalén? ¿Mach'a c'an sna'bat ac'uxul te ja'ate? ¿Mach'a c'an smel yo'tan yu'un te ayat ta chamele?

⁶ Ja'at la awijq'uitayon ta awo'tan, sujt'at bael ta apat. Jo'on Ajwalilon, jich ya cal. Jich yu'un lubenonix ta maliybelex; jich la jtoy jc'ab ta swenta cac'belat castigo, soc la jinat.

⁷ La jpuc bael te ants-winiquetic jich bit'il taquin ac; la jloq'ues tel ta lumetic te ay ta slumalique. Ma'yuc snich'nab la quijq'uitaybey te lum cu'une, la jlajin ta spisilic. Melel ma la yijq'uitayic te bol cuxlejal yu'unique.

⁸ C'axem to xan me'ba antsetic la quijq'uitay a, te jich yipal te bit'il sji'al mar. Ta mero olil c'aal a te la cac' tel lajel ta stojol te me'iletic soc te yalataque; ora nax la cac' tel mel-o'tan soc xiwel ta stojolic.

⁹ Te me'iletic bayal yalatac ya xcom q'uinal yaiyic, ma xyich'iquix ic'; ya xq'uexawic soc ya xpejc'ajic, te xojobil c'aal ya sujtp'ej ta ijc' q'uinal ta stojolic. Teme ay to mach'a cuxul ya xjilique ya me cac' milotuc yu'un te scontroique. Jo'on Ajwalilon, ya cal te jc'ope —xi'.

Tulan c'opoj te j'alwaneje

¹⁰ ¡Ay, te jo'one, me', obol jba te la awac' ayinucon ta q'uinale! ¡Ja' nax ayon ta yilel puro c'op soc tsactomba ta spamal balumilal! Ma'yuc mach'a jmajanejbey staq'uin, ni ma'yuc mach'a smajanejbon jtaq'uin; ja'uc me to, spisilic ya sbolc'optayonic.

¹¹ Ac'a c'otuc ta pasel yu'unic te sbol-c'opic, Cajwal, teme ma ba lec cac'oj jba ta abatinel awu'une, teme ma ba calojbat wocol ta xc'uxtayel te jcontrotac, c'alal ayic ta wocol soc mel-o'tan.

Cajwaltic ya yalbey sc'oplal castigo ta stojol Israel

¹² Te Cajwaltic la yal: —¿Ay bal mach'a ya xju' yu'un sc'asel te hierro ya xtal ta norte, soc nix te bronce?

¹³ Ta scaj spisil te amul, Israel, ya cac'bey ta sc'ab acontrotac te ac'ulejal soc te bay aq'uejoj, spisil te bila ay awu'un ta q'uinal, swenta yu'un ya me yich'ic bael ta majt'anil.

¹⁴ Ya cac'at ta mosoil yu'un te acontrotac, ta yan q'uinal te bay ma ba awiloj; melel te quilimba tilemix jich bit'il c'ajc' te ya slajinate —xi' te Cajwaltique.

J'alwanej la sc'opon Cajwaltic

¹⁵ Cajwal, ja'at te ya ana' spisil atuquele; na'awon te jo'one, soc la', coltayawon. Ac'beya spacol te mach'atic ya yuts'inonique. Ma me ja'uc te c'axem to xan ya ats'icbeye; ma me x'awac'on jilel ta lajel te jo'one. Ya me awil te jts'icoj ixtac'optayel ta awentae.

¹⁶ C'alal la ac'oponon, la jwe'elinbat te ac'ope; jamal q'uinal la caiy yu'un soc bin nax co'tan yu'un, melel jo'on awu'uninejon, Cajwal, te Diosat te Spisil ya xju' awu'une.

¹⁷ Jo'on ma ba sc'anoj co'tan ta sjoinel te mach'atic ja' nax ya xbajt' ta yo'tanic spasel sbujts' q'uinal yaiyic. Ja' to c'alal la awu'uninon, jich cuxinon tel ta jtuquel nax, melel la awac' te ma la smulan co'tan te bila ay ta pasel.

¹⁸ ¿Bi yu'un te ma xcom te bila c'ux ya caiye? ¿Bi yu'un te ma'yuc ta poxtayel te quejch'ene, te ma xch'uun te jayebuc te poxtayele? Jich c'oemat ta jtojol te bit'il beja' te ya xlo'laywan, te ma staleluc ay ya'lele.

Cajwaltic la sjac'

¹⁹ Jich yu'un te Cajwaltic la sjac'bon jc'op: —Teme ya sujt'at tel ta jtojole, ya jcha'quic'at xan soc ya xju' ya awac' aba ta abatinel cu'un. Teme ya acom aba ta puro c'op, te ja'uc nax ya awal te bila ya sc'an alele, ja'at me ya xc'opojat bael ta jwenta abi. Ja'ic me te ya sc'an sujt'ic tel ta atojole, ma ja'ucat te ya sc'an sujt'at bael ta stojolic.

²⁰ Ya me cac' te jichucat ta swenta in lum to te bit'il ts'ajc' pasbil ta bronce te wocol ta jinele. Ya yac'bat guerra, pero ma ba ya stsalat. Melel joinejat, ya jcoltayat soc ya cac'at ta libre. Jo'on Ajwalilon, jich ya cal.

²¹ Ya cac'at ta libre yu'un yipic te mach'atic amen yo'tanique; ya jcoltayat yu'un yipic te mach'atic bayal ya yuts'inate —xi'.