Jeremías 14 - Bible in Tzeltal de Oxchuc y Tenejapa

Taquej ta jyalel te q'uinal

¹ Ta scaj te taquej te q'uinale, te Cajwaltic la sc'opon Jeremías, jich la yalbey:

² —Te Judá ya x'oc' yu'un mel-o'tan, te lumetic yu'une ay swocolic, te ants-winiquetic limilic ta lum. Te Jerusalén ya xtoyix yawic yu'un te xc'uxule.

³ Te jc'ulejetic ya spas bael ta mandal te abatetic yu'un ta sliquel ja'. Ya xbajt'ic ta pozo, ja'uc me to, ma'yuquix ja' ya staic tey a, jochol ya sujt' tel soc te sq'uibique. Ay swocolic soc bayal q'uexlal ya yaiyic, ya smuc sjolic yu'un.

⁴ Te mach'atic ya x'at'ejic ta c'altic ay swocol ya yaiy ta yo'tanic, soc ya smuc sjolic yu'un. Melel ma'yuc te ja'ale, te lumq'uinale jc'axel bacuben ta jyalel.

⁵ Asta ja'mal chijetic ya yijq'uitay jilel yalatac te jtojq'uelic toe, melel ma'yuc aquiltic ya swe'elinic.

⁶ Te ja'mal burroetic, ya xcojt'ajic ta t'axal witstiquil, ya yich'ic ic' jich bit'il ja'mal ts'i'etic; ya x'ijc'ub q'uinal ya yilic, melel ma'yuc aquiltic ya swe'elinic —xi' te Cajwaltique.

La sc'opon Cajwaltic te lume

⁷ La yal te lume: —Cajwal, manchuc teme ja' nix ya yalotic te jmultique, at'ejan ta swenta te bit'il ay ta ich'el ta muc' te abiile. Bayal buelta ma junuc co'tantic ta atojol, jtaoj jmultic ta atojol.

⁸ Ja' smuc'ulat yo'tan te Israel, jcoltaywanejat cu'untic c'alal bi ora ay jwocoltic. ¿Bistuc ya acuy aba ta jyanlum ta yutil te lum cu'untique? ¿Bistuc te jichat nax te bit'il beom te ja' nax ya xc'ax ajc'ubal awu'un?

⁹ ¿Bi yu'un jichat te bit'il jtul winic te jajch'ix xiwel ta yo'tane? ¿Bi yu'un jichat te bit'il jtul soldado te ma xju' yu'un coltaywaneje? Ja'uc me to, Cajwal, ayat ta coliltic; spisilic ya sna'ic te jo'otic lumotic awu'une. Ma me xapijt'esotic —xiic.

¹⁰ Te Cajwaltic jich ya yalbey sc'oplal te lum Israele: —Ja' in lum to ya smulan te bayuc nax ya xbajt' ta spisil ora ta stojol yan, jich yu'un ma ba lec ya quil. Ora yo'tic ya me jna'bey te smulique, soc ya me quich' ta c'op yu'un —xi'.

¹¹ Te Cajwaltic la yalbon: —Ma me xawalbon wocol ta sc'anel yutsilal in lum to.

¹² Manchuc teme bayal ya spas ayuno yu'un, ma ba ya quich'bey ta wenta te ya sc'anbonic coltayele. Manchuc me bayal chic'bil majt'anil ta scojt'ol soc te ya yac'bonic majt'anil harina ya yich'bonic tel, ma ba ya jtsacbey sc'op yu'un. Ya me jin ta guerra, ta wi'nal soc te chamel ya xmilawane —xi' te Cajwaltique.

¹³ Te jo'one la sujt'esbey te sc'ope: —Ja'uc me to, Cajwal, te j'alwanejetic yacalic ta yalel ta stojol te lume te ma xtal guerra ni wi'nal. Ya yalic te ja'at ya awac'bey xlamaj q'uinal yaiyic bayal c'aal tey ta bay q'uinal to —la cut.

¹⁴ Jich yu'un te Cajwaltic la sjac'bon te jc'ope: —Teme jich yacalic ta yalel ta jwenta te j'alwanejetique, yacalic ta lot abi. Ma'yuc bay jticunej, soc ma'yuc bay calojbey mandal, soc ma'yuc jc'oponej. Tojol nax ya yalic te ay bila cac'ojbey yil ta sc'opic, stuquel nax la slomic ta alel. Ja' ya yal te j'alwanejetic abi.

¹⁵ Ja'uc me to, te jo'on Ajwalilon, ya calbey sc'oplal te j'alwanejetic te ya xjelawic ta c'op te ya stabonic ta alel jbiil, te ma'yuc jticunej te ya yalic te ma xtal guerra soc te ma xtal wi'nal li' ta lum to. Jich yu'un ya me xlajic ta guerra soc wi'nal.

¹⁶ Te lum te ba sc'opone, ya me xlajic ta guerra soc ta wi'nal, soc nix te yinamic, te snich'nabic queremetic soc ach'ixetique. Te sbaq'uetalic te lajeme ya me yich'ic ch'ojel loq'uel ta calleetic ta Jerusalén, ma me ayuc mach'a ya smucbeyic. Ja' me jich ya cac'bey stojic te smulique.

¹⁷ Albeya yaiyic in lum to: “Ya me jmal loq'uel ya'lel jsit, c'aal ajc'ubal, ma xcom, ta scaj te xiweltic nax sba woclajel ta stojol te lum cu'une, ta scaj te bats'ejem te yejch'ene.

¹⁸ Ya xloc'on bael ta aquiltic, ya quilbey te sbaq'uetalic lajem te mach'atic lajic ta guerra; ya x'ochon bael ta lum, ya quil te ants-winiquetic te yacalic ta lajel ta wi'nale. Ja' nix jich te j'alwanejetic soc te sacerdoteetic, ya xbajt'ic ta yan lum te ma xyilique”, uta me —xi' te Cajwaltique.

Te j'alwanej ya sc'opon Cajwaltic

¹⁹ Cajwal, ¿jc'axel bal la ach'oj bael ta spisil te Judá? ¿Lubat balix yu'un te lum Sión? ¿Bi yu'un la awejch'entesotic te ma'yuc ta poxtayele? La jmaliytic te ya x'esmajotique; ja'uc me to, ma'yuc bila lec la jtatic. La jmaliytic te ay yutsil q'uinal caiytic ta poxtayele; ja'uc me to, ja' nax ay xiwtesel.

²⁰ Cajwal, ya jna'tiquix te bila amen jpasojtique soc te smul te antiguo me'il-tatiletic cu'untique; jtaoj jmultic ta atojol te ja'ate.

²¹ Ta swenta xch'ul yutsilal ac'oplal, ma xach'ojotic loq'uel, ma me jc'axeluc ya awilay te lume, ja' te bay amuc'ul nactijib te bayal yutsilale. Na'a me te trato la apas ta jtojoltique, ma me xch'ay ta awo'tan.

²² ¿Ay laj bal ta yolilic te lotil diosetic te ay jtuluc te ya xju' yu'un yaq'uel tel te ja'ale? ¿Stuquel nax laj bal ya sticun tel chawuquil ja'al te ch'ulchane? Ma jichuc, Cajwal, Dios cu'untic. Ja'at nax atuquel te ya aticun tele, ja'at nax atuquel te ya apas ta spisile; jich yu'un ya jmaliytic te bi ora ya awac'botique.