Jeremías 13 - Bible in Tzeltal de Oxchuc y Tenejapa

Señail ma junuc yo'tan Israel

¹ Te Cajwaltic la yalbon: —Baan, mana tel xchujq'uil ach'ujt' pasbil ta lino, soc chuca ach'ujt' a; ja'uc me to, ma xamul ta ja' —la yuton.

² La jman jich bit'il la yalbon mandal te Cajwaltique, soc la jchuc jch'ujt' a.

³ La to sc'oponon xan te Cajwaltique, jich la yalbon:

⁴ —Tsaca te xchujq'uil ach'ujt' la amane, te achucojix ach'ujt' a, baan ta bay muc'ja' Éufrates, tey xba anac' jilel a ta bay jatem te tone —xi'.

⁵ Jich boon ta muc'ja' Éufrates, tey la jnac' jilel a, jich bit'il yalojbon mandal te Cajwaltique.

⁶ Bayal c'aal ta patil te Cajwaltic la yalbon: —Baan ta muc'ja' Éufrates, ich'a tel te xchujq'uil ach'ujt' la calbat te la anaq'ue —xi'.

⁷ Boon ta muc'ja' Éufrates, la jle ta bay jnac'oj; ja'uc me to, c'a'emix, jc'axel ma xtuunix ta jyalel.

⁸ Jich yu'un la yalbon xan sc'op Cajwaltic ta yan buelta,

⁹ jich la yalbon: —Jich me ya xc'ot te ya jinbey stoybail te Judá soc Jerusalén.

¹⁰ Ja' in lum to te amen yo'tane ma sc'an xch'uunbon te jmandale, q'uejel yac'oj sbaic bael soc stulanil te yo'tanique. Bajt'ic ta stojol lotil diosetic, yac'oj sbaic ta abatinel yu'un soc ta xch'uunel. Pajalic soc te xchujq'uil ach'ujt' te ma'yuquix yutsil ta jyalele.

¹¹ Jich bit'il te mach'a tulan ya xchuc xch'ujt' ta xchujq'uil, jich ta co'tan spisil te lum Israel soc spisil lum Judá, jun nax c'oem ta jtojol. Ja' lum cu'un ta neelal, te sc'oplal la yac'onic ta na'el stojol, soc ya yalbonic wocol yu'un cutsilal te jichuque. Ja'uc me to, ma la xch'uunbonic c'op. Jo'on Ajwalilon, jich ya cal —xi'.

Yan señail castigo ya xtal

¹² Te Cajwaltic te Dios yu'un te Israel, ya yal: —Albeya xan: “Biluc oxomil ya xju' ya yich' nojesel ta vino”, xaat me ta stojol. Te israeletic ya sujt'esbat te ac'ope: “¿Yu'un bal ya acuy te ma jna'tic te biluc oxomil ya xju' ya yich' nojesel ta vinoe?” xiic me.

¹³ Te ja'ate ya me asujt'esbey: “Te Cajwaltic ya yal: ‘Ya me cac' xyacubic spisilic te mach'atic nainemic tey ta lum to: Te muc' ajwaliletic te ya xnajc'ajic ta smuc'ul nactijib David, te sacerdoteetic, soc te j'alwanejetic, soc spisilic te mach'atic nainemic ta Jerusalén.

¹⁴ Ta ora nax ya me jwuy jichuc oxometic, ya me cac' swuy sbaic ta stuquelic nax, tatiletic soc nich'aniletic pajal me. Ma ba ya jna'bey yo'bolil sbaic; ni ma me ayuc xc'uxul co'tan soc slequil co'tan ta stojolic. Jo'on Ajwalilon, jich ya cal’, xi' me”, uta me —xi' te Cajwaltique.

Sjultesel yo'tan israeletic

¹⁵ Israeletic, te Cajwaltic c'opojix. Junuc me awo'tanic ya awaiybeyic sc'op, ma xatoy abaic.

¹⁶ Ich'aic ta muc' te Cajwaltic te Dios awu'unique, te c'alal ma to xtal yu'un te ijc' q'uinal te ya ac'ojch'in awacanic ta bay ijc' q'uinal ta witstiquil; c'alal ma to sc'atp'un ta ijc' q'uinal, c'alal ma to sc'atp'un ta mero pimil ajc'ubal te saquil q'uinal ya amaliyic te ja'exe.

¹⁷ Teme ma x'awaiybeyic stojole, ya me x'oc'on ta muquen ta scaj te atoybailique; ya me x'oquin te ya'lel jsite, melel ya yiq'uic bael ta mosoil te jtsojp chijetic yu'un te Cajwaltique.

Sc'op Dios tal ta stojol muc' ajwalil

¹⁸ La yalbon te Cajwaltic: —Albeya te muc' ajwalil soc sme': “Coanic ta amuc'ul nactijibic, naclanic ta lum, melel ch'ayemix coel ta ajol te acorona te xch'alojate”, uta me.

¹⁹ Te lumetic ta Néguev, joytaybilix yu'un scontro, ma'yuc mach'a ya xju' xc'axix tey a. Spisilic te ants-winiquetic yu'un Judá ic'otic bael ta yan lum, spisil bajt'ic ta jyalel.

²⁰ Toya asitic soc ilawilic ya xtal ta bay norte te acontro. ¿Banti ay te jtsojp chij la cac'bat awentainbone, ja' te jtsojp chijetic te toyem nax q'uinal la awaiy yu'une?

Pujq'uem sc'oplal ta iq'uel bael ta yan lum Israel

²¹ “¿Bi ya awal, Jerusalén, c'alal ya awich' wentainel yu'un winiquetic te ja'at nix la ap'ijubtese? Ya me yac'beyex xc'uxul, jich bit'il te ants te ya x'ayin yale.

²² Teme ya awal ta awo'tan: “¿Bi yu'un te jich yac ta c'oel ta pasele?”, ja' me x'ana' te scaj bayal mulil awu'une; ja' swentail te la st'ananatixe soc te la yuts'inate.

²³ ¿Ya bal xju' yu'un ya sacubtes sba te ijc'al winique? ¿Ya bal xju' ya xch'aytes spintoil te leopardo-choje? Ja' nix jich te ja'exe, awat'elinejic spasel te bila amene, ma xju'ix awu'unic spasel te bila leque.

²⁴ Jich yu'un ya me jpuquex bael jich bit'il taquin ac te ya xlicot bael yu'un tulan ic' ta jochol taquin q'uinal.

²⁵ Jich me ya xc'ot ta awenta, Israel, jich ya sc'an te ya jpasbate. Jo'on Ajwalilon, jich ya cal. Melel la ach'ayon ta awo'tan, ja' ba awac' smuc'ulin awo'tan te lotil diosetic awu'une.

²⁶ Jich yu'un te jo'one ya me jt'ananat ta jc'axel, jich me ya cac'at ta q'uexlal.

²⁷ Quiloj te toyol awo'tan yu'un te mulweje, q'uexlaltic sba te awat'el yu'un te chijil jolobele, ma lecuc awat'el ta witstiquil soc ta aquiltic. Obol aba, Jerusalén. ¿Jayeb to c'aal ya xbolob bael te ac'oplale? ¿Jayeb to c'aal ya apasulay bael te bila ilaybile? —xi' te Cajwaltique.