Jeremías 12 - Bible in Tzeltal de Oxchuc y Tenejapa

Sc'op j'alwanej ta stojol Cajwaltic

¹ Cajwal, teme ay bila ya xjajch' calbate, ja' smelelil ya awalbon atuquel. Ja'uc me to, ay nix bila ya jc'an jojc'obat a ta swenta in bitic to: ¿Bi yu'un lec ayic te mach'atic amenique? ¿Bi yu'un jun nax yo'tanic ta cuxinel te ay bila muquen ya xchapique?

² Ja'at ya ats'un, ja' ya yac' yisimic ta lum, ya xmuc'ubic soc ya sitinic. Ta puro c'op nax ta yolq'uinal ya yich'at ta muc'; ja'uc me to, ma'yucat ta mero yutil yo'tan.

³ Yan te ja'at, Cajwal, ya ana'bon jba; ya awilon te ja'ate, soc ya ana'bon te bit'il ayon soc co'tan ta atojol. Ic'a bael te ants-winiquetique, jich bit'il chijetic ta bay miljibal; ac'beya smarcaic ta swenta te bi c'aalil ya xlaje.

⁴ ¿Jayeb to c'aal ya xjalaj te taquejem te lumq'uinale te ya xtaquej te aquiltique? Te chambalametic soc te ja'mal mutetic yacalix ta lajel ta scaj amen te yajwal te lumq'uinale, te ya scuyic te ma x'awil te bila ya spasique.

Sujt'ib c'op yu'un Cajwaltic

⁵ Te Cajwaltic la yalbon: —Teme ya xlubat yu'un animal soc winiquetic te ya xbeenic ta yacane, ¿ya to bal xju' awu'un stsalel te mach'atic ya xbeenic ta caballo? Ta bay senel nax te q'uinale, jun nax awo'tan ya awaiy tey a; ¿ja'uc me to, bila ya apas yu'un te pimil ja'mal ta Jordán?

⁶ Asta te mero awermanotaque, te jun ana soque, ya yac'at ta c'abal, soc ya yawtayat ta ixta c'op ta apat. Ma xawac' smuc'ul awo'tan yu'unic, manchuc teme lec nax sc'op te ya sc'oponate.

La smel yo'tan Cajwaltic yu'un swocol te lume

⁷ “Jpijt'esejix jilel te lum cu'une, la jq'uejix bael ta co'tan te bila cu'unineje. La cac'beyix ta sc'ab scontrotac te lum te bayal c'uxbaj ta co'tane.

⁸ Ja' in lum to, te ja' cu'un ta neelale, jich c'oemix ta co'tan te bit'il león-choj ta ja'mal; awun ta jtojol, jich yu'un la quilay.

⁹ Te lum cu'une, jich c'oem te bit'il t'ujbil ja'mal mut, te ay yantic mutetic ya stsac sbaic soc ya smil sbaic. La'ic apisilic ja'mal chambalametic, tsoba abaic tel, we'anic.

¹⁰ Bayal jtsobwanej-controinwanejetic la sjinbonic te ts'usubile, la spech'bonic jilel ta teq'uel. La sc'atp'unbonic ta jochol taquin q'uinal, ja' te q'uinal te jmulanej ta leque.

¹¹ Jochol taquin q'uinal la yijq'uitaybonic, soc t'axal a jil, oq'ueltic sba ya quil. Spamal te lumq'uinale, jochaj jilel ta jyalel, ma'yuc mach'a ya xc'opoj yo'tan yu'un.

¹² Spisilic te ch'in witsetic te jocholixe, talic j'ixta-winiquetic tey a. Melel jo'on Ajwalilon, ay puñal cu'un te ya jin a te lum ta xcha'jejch'el, soc ma me ayuc lamal q'uinal yaiy ni jtuluc.

¹³ La sts'unic trigo, pero jch'ix la stulic loq'uel; spisil te yat'elique tojol nax. La staic falta soc te trigo ta scaj sc'aal stulanil quilimba —xi' te Cajwaltique.

Bi yalojbey Cajwaltic ta stojol lumetic jun sts'acan soc Israel

¹⁴ Te Cajwaltic jich ya yalbey sc'oplal te lumetic te amene, te jun sts'acan soc Israel, te la sjinic te q'uinal te la yac'bey yu'unin Israel te lum yu'une: —Jo'on ya jbul loq'uel ta sq'uinalic, soc ya jloq'ues ta yolilic te Judae.

¹⁵ C'alal bulbiliquix loq'uel cu'un a, ya jcha'na'bey xan yo'bolil sbaic, soc ya jcha'sujt'es tel ta bay nix sq'uinalic, ja' te bay nix te slumalique.

¹⁶ Ta smelelil la sp'ijubtesic te lum cu'un ta yalel sbiil te Baal. Pero ta ora yo'tic ya xju' xnajc'ajic ta yolil te lum cu'une, teme ya xch'uun yo'tanic ta melel te bi xch'uunejic te lum cu'une, soc teme ya stabonic ta alel te jbiile: “Cuxul te Cajwaltic”, teme xiique.

¹⁷ Ja'uc me to, te nación te ma xch'uunbon jc'ope, ya me jbul loq'uel, soc ya me jin. Jo'on Ajwalilon, jich ya cal —xi'.