Jeremías 1 - Bible in Tzeltal de Oxchuc y Tenejapa

Ic'ot ta at'el te Jeremiase

¹ Ja' te sc'op soc yat'el Jeremías, te snich'an Hilcías. Te Jeremías ja' sts'umbal te sacerdoteetic te nainic ta lum Anatot te ay ta sq'uinal sts'umbal Benjamín.

² Te Cajwaltic la sc'opon te Jeremías te c'alal yoxlajunebal ya'wilal te ay ta muc' ajwalil ta Judá te Josías, te snich'an Amón.

³ Ja' nix jich c'oponot yu'un Cajwaltic te jayeb ja'wil ay ta muc' ajwalil ta Judá te Joacim snich'an Josías, ja' to ta yorail Sedequías, te ja' nix snich'an Josías, te bulucheb ja'wil ay ta muc' ajwalil ta Judá. Te c'alal ic'otic bael ta chuquel ta yan lum te bay ac'ot ta nainel te yajwal Jerusalén, ja'ix te yo'ebal u yu'un a te sbuluchebal ja'wil te ay ta ajwalil te Sedequías.

Cajwaltic la yic' ta at'el Jeremías

⁴ Te Cajwaltic la sc'oponon, jich la yalbon:

⁵ —C'alal ma to ayucat ta xch'ujt' ame' a, tsabilatix cu'un a; c'alal ma to x'ayinat a, na'bilatix cu'un a, te ya cac'at ta j'alwanej yu'un te nacionetique —la yuton.

⁶ La jac': —¡Ay, Cajwal. Jo'on mero alalqueremon, ma to jna' c'op! —la cut.

⁷ Ja'uc me to, te Cajwaltic la yalbon: —Ma me xawal te mero alalqueremate. Tey me ya xbaat a te bay ya calbat bael mandale, soc ja' me ya awal te bila mandal ya calbate.

⁸ Ma me ayuc mach'a ya axi' jtuluc, joinejat me, ya me xc'opojon awu'un. Jo'on Ajwalilon te jich ya cale —xi'.

⁹ Jich yu'un te Cajwaltic la yac' tel sc'ab, la spicbon que soc jich la yalbon:

¹⁰ —Jo'on ya cac'bat jc'op ta awe. Yo'tic ya cac'bat awich' tulan awat'el ta bay ya xmandalaj ajwaliletic soc nacionetic, ta swenta sbulel soc swuyel coel, ta swenta sjinel soc ta slilanel, soc nix ta swenta spasel soc sts'unel —la yuton.

¹¹ Tal sc'op Cajwaltic ta jtojol, jich la yalbon: —Jeremías, ¿bila a te ya awile? —xi'. —Sc'ab almendro ya quil —xoon ta stojol.

¹² —Melel nix a. Ya me cac' puersa swenta yu'un ya me xc'ot ta pasel te jc'ope —xi'.

¹³ Te Cajwaltic la sc'oponon ta xchebal buelta, jich la sjojc'obon: —¿Bi ya awil? —la yuton. —Ya quil oxom te yac ta bul soc ya'lel ya quil. Ya sc'an xmalix tel yilel ta stojol norte —xoon ta stojol.

¹⁴ Jich yu'un te Cajwaltic la yalbon: —C'alal ta stojol norte ya xmal tel te uts'inele, ya xmal tel ta stojol spisil yajwal te lume.

¹⁵ Jo'on Ajwalilon, smelelil ya calbeyex: Ya quic' tel spisil jmandalteswanejetic yu'unic te mach'atic ayic ta norte. Ya me xtalic te muc' ajwaliletic yu'unic, soc ya me yaq'uic smuc'ul nactijibic ta bay nix stojol yochibal Jerusalén, ta bay stojol sts'ajc'ul te ay ta sjoyobale, soc ta stojol spisil te lumetic yu'un Judá.

¹⁶ Ja' te castigo ya jticun ta stojol jmulawiletic te la yijq'uitayon ta yo'tanique, te la xchic'beyic pom soc la xch'uunic te lotil diosetic yu'un jyanlumetic te ja'ic nix la spasique.

¹⁷ Te ja'ate, chajbana aba, ich'a smuc'ul awo'tan; baan soc albeya spisil te bila ya calbate. Ma me x'axi', melel teme jich ya apase, jo'on ya cac' te ya xnijc'at ta stojolic abi.

¹⁸ Jich me ya cac'at yo'tic te bit'il lum te ay tulan sts'ajc'ule, jich bit'il oy-taq'uin, jich bit'il ts'ajc' pasbil ta bronce. Jich tulan me ya awac' aba ta stojol spisil ta spamal sq'uinal Judá: ja' te muc' ajwaliletic yu'unic, te jtsobwanejetic soc te sacerdoteetic, soc spisil te yajwale.

¹⁹ Ja'ic ya yac'bat guerra, pero ma xju' yu'unic te ya stsalat, melel ya joinat soc ya jcanantayat. Jo'on Ajwalilon te ya cal te jc'ope —xi' te Cajwaltique.