Isaías 9 - Bible in Tzeltal de Oxchuc y Tenejapa

Ya x'ayin soc ya xmandalaj te Ajwalil yu'un lamal q'uinal

¹ Ta xjajch'ibal Dios la spejc'an te Galilea, ja' te sq'uinal sts'umbal Zabulón soc te sts'umbal Neftalí, ja' te q'uinal te nopol ay soc te mach'atic ma'yuquic ta stojol Dios, ja' te q'uinal te ay ta jejch' ja' Jordán ja' to ta sti'il mar. Ja'uc me to, ta patil la yac'bey bayal yutsilal.

² Te lum te ay ta beel ta ijc' q'uinal a, la yilix muc'ul saquil q'uinal; xojobajix luz ta stojol te mach'atic ayic ta ijc' q'uinale.

³ Cajwal, la awac'beyix smuc'ul sbujts' q'uinal ya yaiyic; mero muc' sbujts' yo'tanic. Spisilic ya xbujts'naj yo'tanic ta atojol jich bit'il ta yorail te c'ajoje, soc jich bit'il te mach'atic ya spucbey sbaic te muc'ul c'ulejalile.

⁴ Melel la alajinbey sc'oplal te mosoil te la sten ta uts'inel a te lume, te uts'inel te la yac'bey swocol, te sbol yat'el te ajwalil ac'botic spase. Jich la alajinbey sc'oplal te bit'il la ajin te Madián.

⁵ Te soldadoetic, tulan ya xc'opoj ta beel te zapatoique, soc te sc'u'-spaq'uic bolobenic yu'un te ch'ich'e, ya me yich'ic chiq'uel ta c'ajc'.

⁶ Melel ayinemix jtul alal cu'untic, Dios la yac'botic jtul nich'anil, ja' te ac'bil yu'el ta mandalteswanej. Ja' me sbiilic ya xc'ot: “Jchajp nax Jtojteswanej”, “Dios te bayal yip”, “Tatil sbajt'el q'uinal”, soc “Ajwalil yu'un lamal q'uinal”.

⁷ Ya me xjalaj ta bay smuc'ul nactijib David, ya me xpujc' bael yu'el yat'el ta ajwalil ta bayuc; te lamal q'uinal ma me xlaj sc'oplal. Te yat'el ta ajwalil buen nacal me ya xjil ta jyalel; te yiptajibe ja' me te toj-o'tanil soc te bit'il toj ya xwentainwan c'alal ora yo'tic soc ta sbajt'el q'uinal. Ja' ya spas soc yutsil xc'uxul yo'tan te Cajwaltic te Spisil ya xju' yu'une.

Yilimba Cajwaltic ta stojol Israel

⁸ Te Cajwaltic ay la sticun bael sc'op ta lum Israel, ja' te lum yu'un Jacob;

⁹ spisil te lum Efraín te nainemic ta Samaria yaiyojic stojol. Stoyoj sbaic ya xc'opojic, jich ya yal:

¹⁰ —Ch'ayemiquix coel te ladrilloetique; ja'uc me to, ya me jpastic ta ton. La sbojbeyiquix te sts'amte'al te pasbil ta sicómoro-te', pero ya cac'beytic sjelolin ta cedro —xiic.

¹¹ Te Cajwaltic la yac' mach'atic la scontroinotic te xiweltic nax sbae, ja' nix yaloj mandal te ya yaq'uic guerra.

¹² Ta sloq'uib c'aal tal te siriaetic, ta smalib c'aal tal te filisteoetique. Ta jun nax buelta la sbiq'uic te Israele. Ja'uc me to, ma to xlamaj yilimba a te Cajwaltique; ya to xtoy xan bael sc'oplalic yu'un te Cajwaltique.

¹³ Ja'uc me to, te lume ma ba la sujt'es yo'tanic ta stojol Dios yu'un te castigo la yac'beye; ma la sc'an sleic te Cajwaltic te Spisil ya xju' yu'une.

¹⁴ Jich yu'un te Cajwaltic jajch' spasbey te lum Israel jich bit'il mach'a ya set'bey loq'uel sne soc ya sbojbey loq'uel sjol te chambalame. Ja' pajal soc te ya yich' limanel ta bojel te q'uinale. Ta jun nax c'aal la spas ta spisil.

¹⁵ (Te sjole, ja' seña te mamaletic soc te jtsobwanejetique, te sne, ja' seña te j'alwanejetic te ya yaq'uic ta nopel te lotetique.)

¹⁶ Te jtsobwanejetic, ja' la sjowtesic te lume; te mach'atic la xch'uunbey sc'opic, ch'ayic ta jc'axel.

¹⁷ Jich yu'un te Cajwaltic ma ba la sna'bey yo'bolil sba te mach'atic ach'ix-queremetique, ni ma'yuc c'uxtayel ta stojol te me'ba alaletic soc te me'ba antsetique. Melel ta spisil te lum ma tojuc yo'tanic ta jyalel; ay mulil ta yo'tanic, spisil ya yalic ixta c'op. Ja'uc me to, ma to xlamaj yilimba a te Cajwaltique; ya to xtoy xan bael sc'oplalic yu'un.

¹⁸ Melel te mulile, ja' ya xjinawan jich bit'il tojc'al te ora ya xlaj ta c'ajq'uel a te ch'ixetic soc te pimil wanc'altique, soc ora ya xchic' te te'etic ta ja'male, te ya xjajch'ic bael ta wilesel yu'un te iq'uetique, te sutu-ic' ta yolil te ch'aile.

^19-20 Ta swenta yilimba te Cajwaltic te Spisil ya xju' yu'une, te lumq'uinal yaquix ta tilel sc'aal. Te c'ajc' ya me sjin te ants-winiquetique, ya me sti'beyic sbaq'uetal te mero yal-snich'anique, soc ma me ayuc ya sna'beyic yo'bolil sba te yermanotaque. Ay me li'to te mach'a ya sbic' coel te we'elile, pero stalel me ay ta wi'nal ya xjil, ay me xan yan lum to te ya xwe', xujt' ma xnoj xch'ujt' ya yaiy yu'un.

²¹ Te Manasés ya sjin te Efraín, te Efraín ya sjin te Manasés; soc pajal ya xjajch'ic ta yilbeyel yo'tan te Judá. Ja'uc me to, ma to xlamaj yilimba a te Cajwaltique; ya to xtoy xan bael sc'oplalic yu'un.