Isaías 8 - Bible in Tzeltal de Oxchuc y Tenejapa

Señail sbiil snich'an Isaías

¹ Te Cajwaltic la yalbon: —Lea junuc ch'ujte', ts'ibuya tey a in biilil to: “Maher-salal-hasbaz”, te xie, ta letraetic te ya xju' ta ilele.

² Ic'a cheb testigo te ya smuc'ulin awo'tan, ja' te sacerdote Urías soc te sacerdote Zacarías te snich'an Jeberequías —xi'.

³ Ta patil la join ta wayel te quinam, te ay ta j'alwaneje. La yic' yal, jich la sta jtul ch'in squerem-al. Jich yu'un te Cajwaltic la yalbon: —Ac'beya sbiilin Maher-salal-hasbaz.

⁴ Melel te c'alal ma to sna' yalel: “Tat, me'”, te xie, te Damasco soc Samaria ya me yich' pojbeyel loq'uel sc'ulejalic, ya me x'ich'ot bael ta stojol te muc' ajwalil ta Asiria —xi'.

⁵ La yalbon xan yan buelta te Cajwaltique:

⁶ —Ta scaj nax xiwel yu'un te Rezín soc te snich'an Remalías, te lum ya yilay te ja' te ay ta Siloé, te lamal nax ya x'oquine.

⁷ Jich yu'un te Cajwaltic ya smuc ta ja', ya smuc ta yip muc'ul ja' Éufrates (ja' sc'oplal te muc' ajwalil yu'un Asiria soc spisil te yipe). Ya xmal loq'uel ta sti'il yoc te ja'e, ya me xloc' bael spisil ta sti'il,

⁸ ya xc'ax bael ta stojol Judá, ya xmucot jilel ta ja', ya me xc'ot c'alal ta snuc' te ja'e. Jich me ya xc'ot te bit'il mut te slich'oj te xiq'ue, ya me snojesbat spisil te aq'uinale, ja'at Emanuel —xi'.

⁹ Te ja'ex nacionetic, tsoba abaic tel, nojuc me xiwel ta awo'tanic; aiya awaiyic stojol, ja'ex ta apisilic, lumetic te c'ubul ayexe: manchuc me chapalex soc awat'ejibic, ya me staex bayal xiwel; ta mero melel, manchuc me chapalex soc awat'ejibic, ya me staex bayal xiwel.

¹⁰ Manchuc me chapal te ac'opique, ja'uc me to, ya me yich' ch'ayel ta jc'axel; manchuc me ya awal loq'uel te bila ya sc'an awo'tanic, ja'uc me to, ma xc'ot ta pasel awu'unic. Melel te jo'otique sjoinejotic Dios jtuqueltic.

Te Cajwaltic ja' me ya sc'an xi'el stuquel

¹¹ Te Cajwaltic tulan la stsacon ta sc'ab, la yac'bon jna' te ma jnopbey stalelic in lum to. La yalbon:

¹² —Ja' in lum to ya yalic te ay bila muquen chapbile, yan te ja'exe ma me xawalic jich. Ma me xiwex yu'un, ni ma me xnijc' awo'tanic yu'un te bila ya xi'ique.

¹³ Te Cajwaltic te Spisil ya xju' yu'un ja' me mero ch'ul ajwalil stuquel, ja' me ay ta xi'el. Ayuc me xiwel ta awo'tanic ta stojol stuquel.

¹⁴ Jich me c'oem ta atojolic te bit'il pejts'e; jich c'oem ta atojolic te bit'il ton ya ac'ojch'in abaic a, ja' me ya yac' xyalic a te cha'chajp muc' ajwaliletic yu'un Israel; jich me c'oem te bit'il pejts' ta bay ya xyalic te yajwal Jerusalén.

¹⁵ Bayal me ya sc'ojch'in sbaic a, ya me xyalic, soc ya me xlajic; bayal me ya xyalic ta pejts', ya xjilic ta chuquel —xi'.

Isaías la yalbey te ya stsajtay sbaic te jnopojeletic yu'une

¹⁶ Canantaya ta awo'tanic te jc'op la calbeyexe; nac'a ta awo'tanic te bitic la cac'beyex anopique, ja' te p'ijubtesel cu'un ta awentaic.

¹⁷ Manchuc me ya snac' sba Cajwaltic ta stojol te lum yu'un Jacob, ja' ya smuc'ulin co'tan stuquel. Ja' cac'oj ta co'tan smaliyel stuquel.

¹⁸ Te jo'one soc te jnich'nabe te la yac'bon te Cajwale, ja' jchajp señail ta stojol Israel, te la yac' te Cajwaltic te Spisil ya xju' yu'un te tey nainem ta wits Sión.

¹⁹ Te ants-winiquetic ma ba wocol ya yalbeyex te ja'exe: —Jojc'obeya awaiyic te xch'ulel animaetic, soc te mach'atic ay bila ya sna'ic syoljoltayel te sajlajanic ya xc'opojique. Jojc'obeyic te diosetic yu'unic te lume. Puersa me ya sc'anbeyic tojtesel yu'un animaetic te mach'atic cuxajtique,

²⁰ swenta yu'un ya x'ac'botic sna'ic te bila ya yal —xiic me. Jich nix ya yalbeyex a, pero te bila ya yalique puro jowil c'op.

²¹ Te ants-winiquetic chican nax bay ya xbajt'ic ta juju-jmech', tenbilic me ta woclajel soc ta wi'nal; ta scaj te wi'nale, ya me yac' sc'ajc'al yo'tanic. Ya me yalbey bol sc'oplal te muc' ajwalil yu'unic soc te yajcananique. Ya me stoy moel yelawic ta toyol,

²² soc ta patil ya me yilic ta alan; ma me ayuc bila ya staic, ja' nax me ya staic me'bail soc ijc' q'uinal. Ajc'ubal me ya x'ainic soc mel-o'tan; ta spisilic ya me xmucotic ta ajc'ubal. Te mach'atic tenbilique, ma xju' te ya scoltay sbaique.