Isaías 7 - Bible in Tzeltal de Oxchuc y Tenejapa

Sbabial c'op la yal Isaías ta stojol Acaz

¹ Te muc' ajwalil yu'un Siria, ja' te Rezín sbiil, soc te muc' ajwalil yu'un Israel, ja' te Peka snich'an Remalías, ba yac'beyic guerra te Jerusalén. C'an yochintayic; ja'uc me to, ma ba ju' yu'unic. Ja' me a te c'alal ay ta muc' ajwalil ta Judá te Acaz te snich'an Jotam, te ja' smam te Uzías.

² Jich yu'un c'ot c'op ta stojol te muc' ajwalil Acaz soc te mach'atic ay yu'une: “Te siriaetic xchapojix sc'op soc Efraín”, xi'. Ja' yu'un te muc' ajwalil soc te lume jajch'ic ta nijq'uel, jich bit'il te'etic ta ja'mal yu'un te iq'ue.

³ Ja' yu'un te Cajwaltic jich la yalbey te Isaías: —Ic'a bael te anich'an Sear-jasub, baan, taa aba soc te muc' ajwalil Acaz ta bay slajibal bael te pasbil beja' yu'un te estanque te cajal ay, ta sbelal te aquiltic yu'un te mach'a yat'elinej saq'uel te yach'il paq'ue.

⁴ Jich me ya awalbey: “Tsajtaya me aba, ma me xiwat; mero ma me xiwat, ni ma me xnijc' awo'tan yu'un te cheb xutunte'etic xtomet xch'ailique, ja' te Rezín soc te soldado-siriaetic yu'une, soc te snich'an Remalías, te yac ta tilel sc'ajc'al yo'tanique.

⁵ Te siriaetic soc te lum Efraín, soc te snich'an Remalías, la xchajbanic te ya spasbat te bila amene. Jich la yalic:

⁶ ‘Ochucotic bael ta Judá, ya cac'beytic x'och xiwel ta yo'tanic; ya me cu'unintic, ja' ya cac'tic ta muc' ajwalil yu'unic te snich'an Tabeel’, xiic me.

⁷ Ja'uc me to, jo'on te Ajwalilon ya cal: Ma me xc'ot ta pasel.

^8-9 Te lum Damasco, ja' centro yu'un Siria, te Rezín, ja' ay ta muc' ajwalil ta Damasco; te lum Samaria, ja' centro yu'un te Efraín, te snich'an Remalías, ja' ay ta muc' ajwalil ta Samaria. Ja'uc me to, ta jo'eb xchanwinic (65) ja'wil te Efraín ma ba nación ya xc'ot; teme ma ba ts'unul ta lec te xch'uunjel awo'tanique, ma xju' xjalajat ta q'uinal”, uta me —xi' sc'oplal.

Xcha'cumul c'op la yal Isaías, ja' te ya x'ayin Emanuel

¹⁰ Te Cajwaltic jich la yalbey te Acaz:

¹¹ —C'anbeya te Cajwaltic te Dios cu'untique, ac'a spas jchajp at'elil ta swenta señail ta atojol, chican teme alan ta mero yet'al balumilal, o ja' to ta mero toyol —xi'.

¹² Te Acaz la sjac': —Ma jc'an quilbey yo'tan te Cajwal ta sc'anel jchajp at'elil —xi'.

¹³ Jich yu'un te Isaías la yal: —Aiya awaiy stojol ja'ex te sts'umbalex te antiguo muc' ajwalil David. ¿Ma bal tic'uc ya awaiy te ya awuts'in te ants-winiquetic? ¿Ya bal awuts'in uuc te Dios cu'une?

¹⁴ Jich yu'un, ja' nix me te Cajwaltic te ya yac'beyex awilic señail: Te ach'ixe yic'ojix yal, ya me x'ayin jtul squerem-al, Emanuel, sbiil ya xc'ot yu'un.

¹⁵ Te sbabial ja'wiletic xcuxlejal jajch'el te alale, ya me slo' tatal leche soc chab.

¹⁶ Te c'alal ma to sna' tsajtayel te bay lec soc te bay ma lecuque, ya me xjojch'aj jilel te sq'uinalic te cheb muc' ajwaliletic te ya yac'bat xiwele.

¹⁷ “Te Cajwaltic ya me yac' xtal wocol ta atojol, soc ta stojol te alumal, soc ta stojol te mach'atic ay awu'une, woclajel te ma'yuc bay jich c'oem ta pasel a ja' to c'alal la sloq'ues sba bael Efraín ta stojol Judá —xi'. (Ja' ya yalbey sc'oplal te muc' ajwalil yu'un Asiria.)

¹⁸ Te bi c'aalil ya xc'ot ta pasele, te Cajwaltic ya yic' tel jichuc jaetic te mach'atic nainemic ta bay te c'ubul ja'etic yu'un Egipto, soc jich me ya yic' tel jichuc xchanul chab te mach'atic nainemic ta Asiria.

¹⁹ Spisilic ya xtal yac' sbaic ta c'ubul stenlej xatal q'uinaletic, soc ta bay nailch'entiquil, soc ta bay ya yuch'ic ja' te chambalametique.

²⁰ Te bi c'aalil ya xc'ot ta pasele, te Cajwaltic ya yabatin te muc' ajwalil yu'un Asiria, jich bit'il majanbil navaja te talem ta sjelawel te muc'ja' Éufrates; ja' me ya sloq'uesbey sjolic te israeletic, ya me sjoxbey yisimic, soc ya me sjoxbey stsotsil sbaq'uetalic a.

²¹ Te bi ora jich ya xc'ot ta pasele, te mach'a ya xch'ijtes jcojt' me' wacax soc cha'cojt' me' chij,

²² ay me bayal slecheic te ya xju' ya swe'elin tatal leche. Spisilic te mach'atic ya xcolic yu'un te jinele, ya me swe'elinic tatal leche soc chab.

²³ Ta yorail a, te ts'usubiltic ta neelal te jmil ta pejt' soc te jmil ta jsejp saquil taq'uin te stojole; ja'uc me to, ya me xc'atp'uj ta ch'ixtiquil soc ta pimil wanc'altic.

²⁴ Ja' nax me ya xju' ya x'och tey a te mach'a jts'i'wej te ay st'im soc yat'ejibal, spamal me te lumq'uinal ya xc'atp'uj ta ch'ixtiquil soc pimil wanc'altic.

²⁵ Ta bay ch'in bujajtic te q'uinal te la yich' c'altayel soc azadón ta neelal, ay me bayal ch'ixetic ya xjajch' tey a soc pimil wanc'altic te ma'yuquix mach'a ya xju' x'och tey a. Ja' nax ya xtuun yu'un ya xwe'ic tey a te wacaxetic soc te chijetique.