Isaías 65 - Bible in Tzeltal de Oxchuc y Tenejapa

Ya x'ac'bot stoj smulic mach'a toybaetic

¹ Te Cajwaltic ya yal: —Te mach'atic ma'yuc bila sc'anojbonic jtebuc, ja'ic te talic ta jtojole; te mach'atic ma ba sleojonic, ja'ic te la staonique. Te mach'atic te ma ba sc'oponejone, ja' te la calbey: “Li' ayon to”, la cut.

² Sjunal c'aal bechel jc'ab ta yiq'uel tel te lum te toybae, te yac ta bael ta sbelal mulile, te yac ta spasel te stoybail yo'tane.

³ Ja' te lum te la slabanon ta mero jsit, spisil ora la yaq'uic ilinucon. La yac'beyic milbil majt'anil te lotil diosetic ta bay awalts'unubil, soc la xchic'beyic pom ta scajtijib te spasojbeyic ta ladrillo.

⁴ La snajc'an sbaic ta muquenaletic, tey c'ax ajc'ubal yu'unic a ta bay ma xchicnajic ta ilele. La sti'ic sti'balul chitam, soc la snojes yoxomic yu'un scaldoil ti'bal te ma ba lec sc'oplale.

⁵ La yalic: “Ainan tey a, ma me xnoptsajat tel; c'axem to xan ch'ulajemon, ma me xnoptsajat ta jtojol”, xiic. Te ants-winiquetic jich c'oemic te bit'il c'ajc' te ya xtil sjunal c'aal; jich ya yuts'inonic te bit'il ch'ail ta jni'tic.

⁶ Ja'uc me to, ta spisil ts'ibubil ta jtojol; ja' yu'un ma me jichuc nax jpetoj jc'ab ya xjilon, ya me cac'bey stoj te bit'il nix ya sc'ane,

⁷ te bitic amen mulil spasojic soc nix te smulic te sme'-statique. Ja'ic te la xchiq'uic pom ta sba witstiquil, soc la me sbolc'optayonic ta ch'in witsetic. Neel ya calbey te bi yilel te yat'elique, jich me ya cac'bey stoj te bit'il ya sc'ane —xi'. Jich la yal te Cajwaltique.

Jamal ya yal Cajwaltic ya yac' bendición

⁸ Te Cajwaltic ya yal: —C'alal ay bayal ya'lel te ts'usube, te ants-winiquetic ma ba ya xch'ayic ni jtebuc, melel ya me xju' sloq'uesic bayal vino. Jich nix me ya jpas te jo'one, ta swenta xc'uxul co'tan ta stojol te abatetic cu'une, ma ba ya jin spamal te nacione.

⁹ Ya me cac' te ayuc sts'umbal Jacob soc te ayuc ants-winiquetic ta Judá te ya x'ainic ta witstiquil cu'une. Te mach'atic tsabilic cu'une, ya me yu'uninic te q'uinale; te abatetic cu'une tey me ya xcuxinic a.

¹⁰ Te spamlej q'uinal Sarón ya me xnoj yu'un chijetic, soc te xatal q'uinal Acor tey me ya sta swe'elic a te wacaxetic te ay yu'unic te lum ya sleonique.

¹¹ Yan te ja'ex ya awijq'uitayon ta awo'tan, jo'on te Awajwalone, soc ya xch'ay ta awo'tanic te ch'ul wits cu'une. Ya awac'beyic we'elil soc trago te Gad soc Mení, te diosetic yu'un te c'ulejalile.

¹² Ja'uc me to, ma lequil yutsil q'uinaluc ya awich'ic; ya caq'uex ta lajel ta puñal. Melel la quiq'uex, ja'ex ma la ac'anic; la jc'oponex, ma la awaiybonic stojol. Ja' la apasic ta bay ma jichuc co'tan; ja' la atsaic spasel te bila ma la smulan co'tane —xi' te Cajwaltique.

¹³ Jich yu'un te Cajwaltic ya yal: —Te abatetic cu'un ay me swe'elic, yan te ja'ex ya xwoclajex ta wi'nal; te abatetic cu'un ay me ja' ya yuch'ic, yan te ja'ex ya xwoclajex ta taquinti'il; te abatetic cu'un bin nax me yo'tanic, yan te ja'ex ya xjilex ta q'uexlal;

¹⁴ bin nax yo'tanic ya xc'ajinic ta swenta yutsil yo'tanic, yan te ja'ex ya x'awunex soc ya x'oq'uex ta swenta mel-o'tan soc woclajel.

¹⁵ Te mach'atic tsabilic cu'un, ya me stuuntesbeyex abiilic ta swenta sc'anel castigo soc ta sc'anel lajel ta stojol yantic a; ja'uc me to, te abatetic cu'un ya me jelbey sbiilic.

¹⁶ Mach'auc a ta lumq'uinal te ya sc'an bendición, ja' me ya sc'anbey te Dios te jun yo'tan ta melele; soc mach'auc ta lumq'uinal te ya sta ta alel Dios a te bila ya xchape, ja' me jich ya spas ta swenta Dios te jun yo'tan ta melele. Te woclajeletic ta neelal to tele, ch'ayemix ta o'tanil, ch'ayiquix ta jc'axel ta jsit stuquel.

¹⁷ “Aiya awaiy stojol, ya me jpas yach'il ch'ulchan soc yach'il balumilal. Te bila c'axemixe ya me xch'ay jilel ta o'tanil, ma me ayuc jtuluc ya sna' xan.

¹⁸ Nojuc yutsil awo'tanic, soc binuc nax awo'tanic spisil ora ta swenta te bila ya jchicnantese; melel ya jchicnantes jun Jerusalén te bin nax yutsile, soc bin nax me yo'tan te lum te ya xnain tey a.

¹⁹ Te jo'one bin nax co'tan yu'un te Jerusalén, ay me yutsil co'tan yu'un te lum cu'une. Ma ba ya x'aiyot xan stojol oq'uel tey a, ni aw yu'un mel-o'tan.

²⁰ Ma me ayuc ya xlaj alaletic te jun cheb nax c'aal ay ta q'uinale, soc ma me ayuc ya xlaj ta ora mamaletic teme ma to sts'aquej c'aal te xcuxlejale. Teme ya xlaj ta jo'winic (100) ja'wil jtul winic, querem to abi, soc teme ma to sta jo'winic (100) ja'wil, castigo me abi.

²¹ Te ants-winiquetic ya me spas snaic, ya xcuxinic tey a, ya sts'unic ts'usubiltic soc ya slo'beyic sit.

²² Ma me ayuc ya xc'ot ta pasel te ya spas sna te jtule, te ay yan mach'a ya xnain tey a; soc te ya yaiy ts'unbajel te jtule, te ay yan mach'a ya swe'eline. Te lum cu'une najt' me xcuxlejal ya xc'ot, jich bit'il xcuxlejal jpejt' te'; te mach'atic tsabilic cu'un, ya me yaiybey yutsilal te yat'elic ta sc'abique.

²³ Ma me tojoluc ya x'at'ejic, ma me ayuc ya xlaj bael snich'nabic teme ma to sts'aquej sc'aalelale; melel ja'ic sts'umbalic te mach'atic yac'ojbey bendición te Cajwaltique, soc ja' nix sts'umbalic ya xjilic.

²⁴ Ma to bay ya yawtayonic a, te ya jac'bey te sc'opique; ma to bay ya xlaj yo'tanic ta c'op a, te ya caiybeyix stojol sc'opique.

²⁵ Te ja'mal jti'awal ts'i' soc te alal chije pajal me ya xwe'ic; te león-choj ya me slo' aquil jich bit'il wacax; te chan ya me smac'lin sba ta slo'el lum. Ta spisil ta bay ch'ul wits cu'une, ma me ayuc jtuluc mach'a ya xbolteswan —xi'. Jich la yal te Cajwaltique.