Isaías 64 - Bible in Tzeltal de Oxchuc y Tenejapa

¹ Ayuc laj bit'il ya ach'i' te ch'ulchan yu'un ya xcoat tel a, swenta yu'un tey me ayat to ta syuquel te witstiquile.

² Jich ya xc'ot te bit'il c'ajc' te ya xchic' te ch'ixtiquile o jich bit'il ya sbulantes te ja'e. Jich yu'un te acontrotac ya me sna'bat aba; ya me xnijq'uic ta atojol te nacionetique.

³ C'alal la apas te bitic xiweltic sba te ma la jna'tic te ya xc'ot ta pasele, te c'alal nax a coat tele, te witstiquil nijq'uic ta atojol.

⁴ Ma'yuc bay aiybil stojol, ni ma'yuc bay ilbil te ay yan Dios te bit'ilate, soc te ay bitic jchajp ya spas a ta swenta xc'uxtayel te mach'atic ya smuc'ulin yo'tane.

⁵ Te ja'ate jun awo'tan ya awic' te mach'a ya spas bila lec soc yutsil yo'tane, soc teme ya sna' ta yo'tan spasel te bila ya sc'an awo'tan te ja'ate. Ilinemat, melel jtaojtic jmultic; ayix bayal ja'wil te la cac'tic bolobuc awo'tan cu'untique.

⁶ Jpisiltic ma ba pocbilotic, jichotic te bit'il mach'a boloben. Spisil te lequil at'elil cu'untique jich c'oemic te bit'il xch'ailel c'a'pac'. Jpisiltic limilotic ta lum, jich bit'il yabenal te' ya xc'anub, ya xlubaj coel; soc te bitic amen jpasojtique, ja' ya stasotic bael jichuc ic'.

⁷ Ma'yuc mach'a te ya sc'oponate, ma'yuc mach'a ya spas tulan te ya sc'anbat coltayele. Ja' swentail te la anac' aba ta jtojoltic, soc la apijt'esotic ta scaj te bila amen jpasojtique.

⁸ Ja'uc me to, ja' jtaticat atuquel Cajwal; jo'otic ajch'alotic, ja'at jpac'jomat cu'untic, ta jpisiltic ja'at Jpaswanejat cu'untic atuquel.

⁹ Cajwal, ma me x'ilinat ta c'axem to xan; ma me x'ana'botic spisil ora te mulil cu'untique. Ila me awil te jo'otique, melel lumotic awu'un.

¹⁰ Te ch'ul lumetic awu'une, c'atp'ujiquix ta jochol taquin q'uinal; te lum Jerusalén jc'axel bolobix, jinbilix ta jyalel.

¹¹ Te ch'ul templo cu'untic te t'ujbil yutsile, te bay la yalbat lec ac'oplal te jme'-jtatique, la yich'ix jinel ta c'ajc'. Spisil te bitic bayal sc'oplal ta co'tantique bolob ta jyalel.

¹² Ta spisil, Cajwal, ¿ma bal ayuc bi ya apas yu'un? ¿Jich nax bal ch'abal q'uinal ya xjil awu'un? ¿Yu'un bal ya awac'otic ta pejc'anel ta c'axem to xan?