Isaías 61 - Bible in Tzeltal de Oxchuc y Tenejapa

Albeyel sc'oplal scolel Israel

¹ Te espíritu yu'un Cajwaltic ay ta jtojol. Melel te Cajwaltic stsaojon soc sticunejon tel ta yalel sc'oplal te lec yach'il c'op ta stojol te me'baetique, tal cac' lamajuc xchamelic te mach'a ay swocolique, tal calbey te ya x'ac'otic ta libre te mach'atic ayic ta mosoile, soc te ya xjilic ta libre mach'atic ayic ta chuquele.

² Tal jcholbey sc'oplal te ya'wilal c'uxtayel yu'un te Cajwaltique, ja' sc'aalelal yu'un te Dios cu'untic te ya yac'bey spacol te jcontrotique. La sticunon tel ta smuc'tesbeyel q'uinal yaiyic spisilic te mach'atic ayic ta mel-o'tane,

³ te mach'atic ay swocolic ta Sión tal cac'bey scorona swenta sjelol te c'ajc'al tane, tal cac'bey yutsil q'uinal yaiyic te mach'atic smeloj yo'tanique, tal jc'atp'unbey ta yutsilal c'ayoj te woclajel ya yaiy ta yo'tanique. Ya me x'ac'bot sbiilic: “C'antulan swenta toj-o'tanil”, te ja' nix sts'unoj te Cajwaltic swenta yu'un ya yac' ta ilel a te yutsilale.

⁴ Ya me yich' xan pasel te pocol ts'ajq'uetic te jinemiquixe, ya me yich' pasel te nanatic te namey la yich'ic jinele, soc ya me yich' xan jajch'esel te lumetic te jinemique.

⁵ Te jyanlumetic ja' me ya yac' sbaic ta scanantayel te chijetique, te c'alc'altique, soc te ts'usubiltic awu'unic te ja'exe.

⁶ Ya me yich' alel te sacerdoteex yu'un te Cajwaltique; soc ya me yich' alel te yabatex te Dios cu'untique. Ya me awaiybeyic lec yutsilal sc'ulejal te yantic nacionetique; ya me ach'al abaic soc te xojobil yutsilalique.

⁷ Melel te lum cu'une c'axemix te swocole; tulan c'ot ta scaj te ma'yuc ta ich'el ta muc', soc te ay ta ixtac'optayele. Ja' swentail te ya yich' ta bay slumal bayal te c'ulejalile, bin nax me yo'tan ya yaiybey yutsilal sbajt'el q'uinal.

⁸ Melel te Cajwaltic bin nax yo'tan yu'un te toj-o'tanile; ja' ya yilay te elec' soc te bila amen ta pasele. Jun yo'tan ta yac'beyel sjelol swocol; soc ya me spas trato soc ta swenta sbajt'el q'uinal.

⁹ Te sts'umbale muc' me sc'oplal ya xc'ot yu'un te nacionetique; spisil mach'atic ya yilic, ya me sna'ic stojol te ja' te lum yac'ojbey bendición te Cajwaltique.

¹⁰ ¡Bayal me yutsil co'tan ta c'axem to xan yu'un te Cajwale! Mero bin nax co'tan yu'un te Dios cu'une, melel la yac'bonix te jcoltayel yu'une, la yac'onix ta tsalaw. Jichon te bit'il mach'a ya xnujbin te ya yich' scorona; jichon te bit'il ach'ix te ya xnujbinix te ya xch'al sba ta c'anal taq'uinetique.

¹¹ Jich me te bit'il ya xmuc'ub te'etic ta lumq'uinal, soc te ya xpulinic te'etic ta yawil, ja' nix me jich ya xc'ot yu'un Cajwaltic te tsalaw ya spase; ya me xc'ajinic spisil nacionetic yu'un ta yalel wocol.