Isaías 60 - Bible in Tzeltal de Oxchuc y Tenejapa

Yutsilal yach'il Jerusalén

¹ Jajch'an, Jerusalén, xojobajan, melel julix tel te luz awu'un; ya xojobajix yutsilal Cajwaltic ta atojol.

² Te ijc' q'uinal smucoj balumilal; te ajc'ubal spotsoj te nacionetique. Ja'uc me to, te Cajwaltic ya xojobaj ta atojol; soc ta atojol ya xchicnaj te yutsilale.

³ Te nacionetic ya me xtalic tey a ta bay te luz awu'une; te muc' ajwaliletic ya me xtalic tey a ta bay axojobil te ya sacub tel q'uinal yu'une.

⁴ Toya me jajch'el te asite, ilawil ta sjoyobal te q'uinale; spisil ya stsob sbaic soc ya xtalic ta atojol. Te queremetic awu'un c'ubul me ya xtalic; te ach'ixetic awu'un petbil me ya xtalic.

⁵ Te c'alal ya awile, ya me xojobaj yutsil awo'tan, bin nax me awo'tan yu'un. Ya me yich'beyex tel sc'ulejalic te lumetic ta ti'mar; soc ya me yac'beyex sc'ulejalic te nacionetique.

⁶ Ya me awil te xcholoj sbaic ta beel ta aq'uinal te camelloetic te ya xtalic ta Madián soc ta Efá; ya me xtalic spisilic ay ta Sabá, scuchojic ya xtalic oro soc pom, soc ya me yalbeyic sc'oplal yutsil yat'el te Cajwaltique.

⁷ Spisil te chijetic yu'un Cedar ya me awu'unin; te tat chijetic yu'un Nebaiot, ja'ic me ya xtuun awu'un swenta yu'un ya me awac'bey smajt'anin Cajwaltic ta scajtijib, te buen bujts'anuc majt'anil ya awac'beyique. Te Cajwaltic ya me spas ta buen t'ujbil yutsilal te templo yu'une.

⁸ ¿Mach'atic a te ya xwilic bael jichuc tocale, te ya xbajt'ic jichuc stsumutetic ta snaique?

⁹ Barcoetic yilelic te pajal yacalic ta talele, soc te muc'ul barcoetic yu'un Tarsis te neel ay tel yu'une. Yacal ta yiq'uel tel ta c'ubul te anich'nab, soc oro soc plata, ta yich'el ta muc' te Awajwale, te Ch'ul Dios yu'un Israel, te mach'a t'ujbil awutsilal la spasate.

¹⁰ Jyanlum winiquetic ya xcha'pasbat te ats'ajc'ul ta sjoyobal; te muc' ajwalil yu'unique ya yac' sbaic ta abatinel awu'un. Manchuc me soc yilimba la yac'bat castigo te Cajwaltique, ta ora yo'tic soquix yutsil yo'tan ya sna'bat yo'bolil aba.

¹¹ Te yochibal ats'ajc'ule jamalic me spisil ora; ma ba ya xmajc' ta c'aaleltic, ni ta ajc'ubal, swenta yu'un ya xju' ya yich'beyex tel sc'ulejalic te nacionetique, soc ja' me ya x'ic'awanic ochel te muc' ajwaliletic yu'unic.

¹² Te lum te ma xyac' sba ta abatinel ta atojole, ya me xch'ay ta jc'axel; spamal me sq'uinal ya yich'ic jinel ta jyalel.

¹³ Te Cajwaltic ya yalbey te Jerusalén: —Te sc'ulejal Líbano ya me xtalic ta atojol: ja' te tajetic, abetoetic soc c'antajetic, swenta yutstesel te templo cu'une. Jich me ay cutsilal ya xc'ot ta bay ya cac' te cacane.

¹⁴ Te snich'nab te mach'atic la stenex ta uts'inele, ya me xtalic ta bic'tajel ta atojol; soc spisil mach'atic la yilayat ta yo'tanic, ya me xtal squejan sbaic ta awacan. Ya me yalbeyex: “Lum yu'un te Cajwaltique”, xi' me ac'oplal, soc: “Sión yu'un te Ch'ul Dios yu'un Israel”, xiic me.

¹⁵ Ma ba ya awich'ix pijt'esel, ni ilayel, soc ma ba atuquel xanix. Jo'on ya cac'batix awutsilal sbajt'el q'uinal, ja' me yutsil q'uinal ya awaiyic sbajt'el q'uinal.

¹⁶ Te nacionetic ja' me ya yac'bat te mero lequil we'eliletic ay yu'unique; te muc' ajwaliletic ya me yich'bat tel te sc'ulejalique. Jich me ya ana' stojol te jo'on Awajwalon te Jcoltaywanejon awu'une; te jo'on te Bayal Cu'el te Dioson yu'un Jacob, jo'on ya cac'at ta libre.

¹⁷ “Bronce c'an awich', oro ya cac'batix; hierro c'an awich', plata ya cac'batix; te' c'an awich', bronce ya cac'batix; tonetic c'an awich', hierro ya cac'batix. Ya me cac' xmandalaj ta atojolic te lamal-o'tanile; soc te bila stojil ta melel, ja' ya yic'at.

¹⁸ Ta alumal ma me x'aiyotix stojol te uts'inele; ni ma me ayuc xan jinel soc lajinel ta aq'uinal. Ja'uc me to: “Colel”, me ya xc'ot sbiil awu'un te ats'ajc'ule; te yochibalic ats'ajc'ule: “Bin nax yutsil te Diose”, xi' me sbiilic awu'un.

¹⁹ “Ma me xtuunix awu'un c'aal te ya xojobaje, soc te u te ya xojobaj ta ajc'ubale. Melel jo'on Awajwalon, ja' me ya xojobajon sbajt'el q'uinal; jo'on te Dioson awu'une, jo'on awutsilal ya xc'oone.

²⁰ Ja' c'aal c'oemon ma ba ya xtup'ix bael ta jyalel, ni ja'uc te u awu'une, ma xch'ayix bael xojobil. Melel jo'on Awajwalon, jo'on me luzon awu'un sbajt'el q'uinal; te jayeb c'aal te mel-o'tan awu'une, ya me xch'ay ta jc'axel.

²¹ “Spisil te alumale lec me yo'tanic ya xc'ot; ja' me yajwalic sbajt'el q'uinal te alumale. Ja' spulic te te' te jo'onix la jts'un jtuquele; ja' te at'el la jpas soc te jc'abe, yu'un jich ya cac' ta ilel te cutsilale.

²² Te ch'in jojpe ya me x'esmaj ta jmil; ja' te ch'in xujt' yajtalul ya me xc'atp'uj ta jpam nación te mero muq'ue. Jo'on Ajwalilon, ya me jpas spisil ta ora nax, te bi ora ya sta te sc'aalelale —xi'.