Isaías 6 - Bible in Tzeltal de Oxchuc y Tenejapa

La yich' iq'uel Isaías

¹ Ta ya'wilal te bit'il laj te muc' ajwalil Uzías, chicnaj ta jsit te Cajwaltic, nacal ta smuc'ul snactijib te mero najt' stoylejale. Te sti'il snajt'il sc'u'e nojel yu'un te temploe.

² Ay serafínetic ayic ta sba, te jich yilel bit'il c'ajc'. Ay waqueb xic' jujun: cheb xic' ya smac yelawic a, cheb ya smac coel sbaq'uetalic a, soc cheb ya xwilic a.

³ Jich yacalic ta yalel juju-jtul: —Ch'ul Dios, Ch'ul Dios, Ch'ul Dios, ja' te Cajwaltic te Spisil ya xju' yu'une; nojel ta spamal balumilal te yutsilale —xiic.

⁴ C'alal toy te sc'ope, cajic ta nijq'uel te ti'nailetic yu'un templo. Te templo noj ta ch'ail.

⁵ La cal ta co'tan: “¡Obol jba, ya xlajon! La quilix soc jsit te Muc' Ajwalil, ja' te Cajwaltic te Spisil ya xju' yu'une, te jo'one ma ba lecon ta winiquil soc que, soc nainemon ta yolil te lum te boloben yeique”, xoon.

⁶ Ora wil tel jtul serafín, tal ta jtojol. Slot'oj ta tenaza ac'al te tsajubene, tey la stsac tel ta sba te scajtijib smajt'an te Diose.

⁷ La scusbon ta que, jich la yalbon: —Aiya awaiy stojol, te ac'al la jcusbat ta ati'e. Te bitic ma lecuc apasoje, la yich'ix loq'uesel, jich pasbilatix perdón yu'un a te amule —la yuton.

⁸ Ja'uc me to, la caiybey stojol sc'op te Cajwaltique, jich yac ta yalel: —¿Mach'a ya jticun bael? ¿Mach'a ya x'och ta j'alwanej cu'untic? —xi'. Jo'on la jac'bey sc'op: —Li' ayon te jo'one, ticunawon bael —la cut.

⁹ Jich la yalbon: —Baan, jich me ya awalbey te lume: “Manchuc me ya awaiy stojol ta lec yilel, ma xc'ot ta awo'tan; manchuc me ya awilic ta lec yilel, ma xana'beyic swentail”, uta me.

¹⁰ Tulantesbeya yo'tan te lume; macbeya xchiquinic, soc macbeya sitic, swenta yu'un ma me xyilic, ni ma me xyaiyic stojol c'op, ni ma me xc'ot ta yo'tanic, swenta yu'un ma me sujt'ic xan ta jtojol, jich ma ba ya jlamantesbey xchamelic —xi' te Cajwaltique.

¹¹ La calbey te jo'one: —¿Jayeb me c'aal ya xjalaj, Cajwal? —la cut. La sjac'bon te jc'ope: —Ja' to me te c'alal ya yich'ic jinel te lumetic, te xujt' ma'yuc yajwal ya xjile; ja' to chican ma'yuc jtuluc yajwal ya xjil te nanatic, soc jochol ya xjil te sq'uinalique.

¹² Te Cajwaltic ya me sticun bael ta yan q'uinal te ants-winiquetique; te slumalic jochol me ya xjil ta jc'axel.

¹³ Teme ay jtul ya xjil ta lajlajuneb te lume, ja' ni me jich ya yich'ic jinel. Jich bit'il ya yich' ts'etel jijte', ja' nax ya xjil te xchumante'al —xi'. (Ja'uc me to, ta xchumante'al, ya me xloc' tel xch'ul spul.)