Isaías 59 - Bible in Tzeltal de Oxchuc y Tenejapa

Smul Israel soc castigo ta stojol

¹ Te yu'el te Cajwaltic ma ba pejc'ajem te ma xju' yu'un coltaywaneje; ma yu'unuc macal xchiquin te Cajwaltique te ma xyaiy stojol c'ope.

² Ja'uc me to, te amulic te c'oem ta pasel awu'unique, ja' smacojex ta stojol te Diose; smacojix sit yu'un te amulique, ja' ma xyaiybeyex stojol yu'un.

³ Te ja'exe boloben ac'abic yu'un ch'ich'; boloben sbic'tal ac'abic yu'un te milawe. Te awe'ic ya yal loq'uel lot; te awaq'ue ya yal loq'uel mulil.

⁴ Te mach'a ya sc'an parte, ma'yuc jtuluc te toj nax ya xc'opoje, ma'yuc mach'a toj yo'tan ya xbajt' ta chajbanel. Ja'uc me to, ja' muc'uben yo'tan yu'un te lot soc te jowil c'opetique; ja' muc'ubenix xch'ujt' yu'un te bila ma lecuque, ya me x'ayin yu'un te mulile.

⁵ Ya sluts'ic ston te chane, soc ya sjal snaic jichuc ametic. Te mach'a ya slo' te ston chane, ya me xlaj yu'un, soc teme ya yich' net'el ston te chane, ya me xloc' milawal chanetic tey a.

⁶ Te sna ametic ma xju' ta pasel c'u'iletic a; ma'yuc mach'a ya sc'u'inbey te bila ya sjalic. Spisil te yat'elique ma lecuc ta jyalel, te yat'el sc'abique, swenta uts'inwanej.

⁷ Te yacanique ja' ya xtuun yu'unic te ya x'animajic ta spasel a te bila amene; ja' ya x'animajic bael a ta smalbeyel xch'ich'el te mach'a ma'yuc smule. Te bila snopoj ta yo'tanic, ja' te bila ma lecuque; ja' ayic ta beel yu'un te jinwanej soc te ya xch'aywan ta jc'axele.

⁸ Ma sna'beyic sbelal te lamal-o'tanile; te yat'elic ma'yuc bila toj tey a. Ma ba toj te be st'unojique; te mach'atic ya st'unic, ma ba ya staic lamal-o'tanil tey a.

⁹ Ja' swentail te ma xtal te coltayele; te jilel ta libre ma xnoptsaj ta jtojoltic. Yacotic ta smaliyel saquil q'uinal, pero ja' nax yac ta toyel te ijc' q'uinale; yacotic ta smaliyel te xojobal q'uinale, pero yacotic beel ta ajc'ubal.

¹⁰ Yacotic maxlajanel ta beel ta ch'ujt' pajc', jichuc ma'sit; jich c'oemotic te bit'il ma'yuc jsitic. Manchuc me mero olil c'aal; ja'uc me to, ya jc'ojch'in cacantic; jich c'oem te bit'il ayotic ta ajc'ubale. Manchuc me ay yutsil q'uinal ya caiytic, pero lajemotic c'oem.

¹¹ Jpisiltic jich ya xc'opojotic bit'il osoetic; ya x'ajc'anajotic jichuc stsumutetic. Yacotic ta smaliyel te coltayele; ja'uc me to, ma xtal; yacotic ta smaliyel te ya xcolotic ta libre, pero c'ubul to xtal.

¹² Te jo'otique bayal la cac'tic bolobuc awo'tan ta jyalel; ja' nix jmultic te ya yalotic. La jna'tiquix stojol te jmultic; la jna'tiquix stojol te bitic ma lecuc jpasojtique.

¹³ Jelawotic soc ma tojuc co'tantic ta stojol Cajwaltic; ma la jc'an jt'untic te Dios cu'untique. La jpastic uts'inwanej soc muquen xchajbanel controinwanej; la jchajbantic aiyej ta swenta slo'layel a te yantique.

¹⁴ Ja' ilaybil c'ot te toj-o'tanile; c'ubul ayotic yu'un te bila toj ta pasele. Te smelelil la sc'ojch'in sba c'oem ta parque; te toj-o'tanile ma'yuc bay ya xju' ya xtal.

¹⁵ Te smelelil ch'ayix bael; te mach'a ma spas te bila amene, ya yelc'anbeyic te bila ay yu'une. Te Cajwaltic ma smulan yo'tan, melel ya yil te ma'yuc bila toj ya yich' pasele.

¹⁶ Te Cajwaltic cham nax la yaiy yu'un te la yil te ma'yuc mach'a yac ta yac'bel xpoxil c'oem; jich yu'un jajch' ta at'el soc te yu'ele, ja' nix la yaiy tsalaw stuquel.

¹⁷ La spots sba ta tsalaw, jichuc smajq'uil stan; la yac' ta sjol te colel, jichuc spixol-taq'uin. Bayal la yich'bey spacol, la slap c'oem jichuc najt'il c'u'il; soc la spots sba ta yilimba, jich bit'il te pac' te muc' xchiquine.

¹⁸ Te Cajwaltic ya me yac'bey stoj juju-jtul jich te bit'il ya sc'ane; ya me yac'bey castigo te scontrotaque. Te mach'atic ya yilay te Cajwaltic, ya me yac'bey stoj jich te bit'il ya sc'ane; soc me te ants-winiquetic te nainemic ta ti'mar.

¹⁹ Te mach'atic ayic ta spamal balumilal, c'alal ta sloq'uib c'aal ja' to ta smalib c'aal, ya me yich'ic ta muc' te Cajwaltic te c'alal ya yilbeyic yutsilal xojobil te yat'ele. Melel jich me ya xtal te bit'il snojel ja' te ya xtijot tel yu'un tulan iq'ue.

²⁰ Ya me xtal yac' ta libre Sión soc spisil mach'atic sts'umbal Jacob te ya sujt'es yo'tanic yu'un te smulique. Jich ya yal te Cajwaltique.

²¹ Te Cajwaltic ya yal: —Ya jpas jun trato soc te ja'exe, ya calbeyex ta jamal: Te cu'el soc te p'ijubtesel te la cac'beyexe jc'axel ma me xch'ay ta awo'tanic, soc ma me xch'ay ta yo'tanic te ats'umbal ta spisil bael ta sbajt'el q'uinal —xi' te Cajwaltique.