Isaías 55 - Bible in Tzeltal de Oxchuc y Tenejapa

Ma p'isbiluc nax bi ya yac' Cajwaltic

¹ Te Cajwaltic ya yal: —Ja'ex te taquin awo'tanique, la'ic, la' uch'aic ja'; ja'ex te ma'yuc ataq'uinique, la'ic, leaic trigo ta majt'anil, soc we'anic; leaic vino soc leche, ni ma'yuc ta tojel.

² ¿Bistuc ya alajin ataq'uinic yu'un teme ma we'eliluque? ¿Bistuc ya alajin aganaric yu'un teme ma ja'uc te bila ya xnoj ach'ujt'ic yu'une? Aiybon awaiyic stojol ta lec, jich me ya awe'elinic lequil we'eliletic, ya me awe'elinic bitic bujts'anic.

³ La'ic ta jtojol, soc aiya awaiyic, aiybon awaiyic stojol te jc'ope, yu'un jich me ya xcuxinex. Te jo'one ya jpas trato ta sbajt'el q'uinal ta atojolic, jich me ya xc'ot ta pasel te bit'il caloj ta swenta xc'uxul co'tan ta stojol David.

⁴ Ja' la cac' ta testigo ta stojol te nacionetique, la cac' ta jtsobwanej soc ta jp'ijubteswanej ta stojol te lumetique.

⁵ Te ja'ate ya me awic' tel te lumetic te ma na'biluc sbaique; te lumetic te ma sna'bat aba, animal nax ya xbajt'ic ta atojol. Melel ya me cac'at ta ich'el ta muc', jo'on Awajwalon, te Ch'ul Dioson yu'un Israel —xi'.

⁶ “Leaic me te Cajwaltic te ya to xju' ta taele; ic'a ta awo'tan te bit'il nopol to aye.

⁷ Te mach'a amen yo'tane ya sc'an te ya yijq'uitay te sbee; te mach'a ay mulil ta yo'tan, ya me yijq'uitay te bitic sna'oje. Sujt'anic tel ta stojol te Cajwaltique, jich me ya sna'beyex yo'bolil abaic stuquel; sujt'anic tel ta stojol te Dios cu'untique, te ma p'isbiluc nax yutsil yo'tan ta spasel perdón.

^8-9 Te Cajwaltic ya yal: —Melel ma pajaluc nax bila jna'oj soc te bila ana'oj atuquelique; te bit'il ya x'at'ejon jtuquele, ma pajaluc soc te bit'il ya x'at'ejex te ja'exe. Jich bit'il te ch'ulchane, ja' cajal yu'un te balumilale, ja' nix jich te bitic jna'oj, soc te bit'il ya x'at'ejone, ja' cajal cu'un a te bit'il awu'unique —xi'. Jich la yal te Cajwaltique.

¹⁰ —Jich bit'il te ja'al soc te toib te ya xcoic tel ta ch'ulchane, ma ba ya sujt'ic xan moel. Ja' ya yajch'esix te lumq'uinale, ya sc'ateswan soc ya xch'ijteswan, soc ya yac' esmajuc awalil ta swenta ts'unbajel soc ya yac' esmajuc te waj ya yich' we'ele.

¹¹ Ja' ni me jich te jc'op te ya xloc' tel ta que, ma ba ya sujt' tel teme ma ba ya x'at'eje. Ja' me ya spas te bi ya sc'an co'tan, soc ja' me ya spas te at'el te ya jticun bael yu'une.

¹² “Te ja'exe bin nax me awo'tanic ya xloq'uex tel tey a, lamal nax me q'uinal awaiyic ya sujt'ex bael ta alumal. C'alal ya yilex te toyol witstiquil soc te ch'in witsetic, ora nax ya xc'ajinic yu'un yutsil yo'tanic, soc spisil te te'etic ta q'uinal ya me spac' sc'abic awu'un.

¹³ Ta bay ch'ixtiquil, ya xch'i tel tajaltic tey a; ta bay ja' nax ch'iic ch'ix-te', ja' me ya xch'iiquix arrayanetic. Ja' t'ujbil yutsilal sbiil ya xc'ot yu'un te Cajwaltique; ja' me jun señail sbajt'el q'uinal te ma xju' ta jinele —xi' te Cajwaltique.