Isaías 53 - Bible in Tzeltal de Oxchuc y Tenejapa

¹ ¿Mach'a ya xch'uun te bi caiyojtic stojole? ¿Mach'a yac'ojbey sna' stojol Cajwaltic te yu'ele?

² Te Cajwaltic la sc'an yo'tan te jichuc ya xmuc'ub yabat te bit'il unin te' te wocol ya xme'in bael yisim ta bay taquin q'uinal. Ma t'ujbiluc, ma'yuc yutsil, ma'yuc ta mulanel, ni jtebuc;

³ te ants-winiquetique la yilayic, ma la yich'ic ta wenta. Jich yilel sit-yelaw te nojel ta yo'tan te bila c'uxe, c'aem ta woclajel. Jich c'oem te bit'il mach'a ma'yuc ta ilele, la quilaytic, ma la quich'tic ta wenta.

⁴ Ja'uc me to, ja' ay ta swenta scuchel te woclajel cu'untique, ja' yac ta sts'iquel te bila c'ux ya caiytique. Jo'otic la jcuytic te Dios te la yejch'entese te yu'un yac'ojbey castigo, soc te spejc'aneje.

⁵ Ja'uc me to, la yich' lowel ta scaj jtoybaeltic; c'ax swocol ta scaj te amen cat'eltique. Te castigo te c'ax swocol yu'une la yac' lamajuc q'uinal caiytic yu'un; ta swenta bit'il ejch'enaj stuquel te colotic yu'une.

⁶ Jpisiltic jowejemotic, jich bit'il ya spas chijetic, juju-jtul la jle jbetic jtuqueltic. Ja'uc me to, te Cajwaltic la yac' scuchbotic jmultic ta jpisiltic.

⁷ C'ax swocol ta uts'inel, la sts'ic. Peq'uel la yac' sba ta jyalel, soc jc'axel ma'yuc loc' c'op ta ye. La yiq'uic bael jich bit'il alal chij ta miljibal; ma'yuc bay c'opoj, ni jtebuc, jich bit'il chij te c'alal ya yich' joxel te stsotsile.

⁸ Ma'yuc swentail la yiq'uic bael, ma'yuc mach'a c'opoj yu'un; ma'yuc mach'a la smel yo'tan yu'un. La sloq'uesic bael ta q'uinal, la yaq'uic ta lajel ta swenta smulic te lum cu'une.

⁹ Tey la smuquic ta sts'eel te mach'atic amen yat'elic; bajt' ta muquel soc mach'atic ma ba lec te bitic la spasique, manchuc me ma'yuc ni jtebuc sleoj smul stuquel, soc ma'yuc bay la yaiy lo'laywanej.

¹⁰ Te Cajwaltic la sc'an yo'tan te ya sten ta uts'inel soc ta woclajel. Te bit'il la yac' sba ta milbil majt'anil ta swenta te mulile, ya me xnajt'ub xcuxlejal bayal c'aal, soc ya me xc'o yil te sts'umbale. Ja' me ta swenta te lec ya xc'ot te bitic chajbanbil yu'un te Cajwaltique.

¹¹ Te c'alal c'axix yu'un a te bayal swocole, ya me yil te saquil q'uinale, soc bin nax me yo'tan yu'un. Te tojil abat yu'un Cajwaltic, bayal mach'atic ya yac' ta libre, melel ja' ya scuchbey smulic stuquel.

¹² Jich yu'un te Dios ya yac'bey yawil ta yolilic te mach'a ich'bilic ta muq'ue; soc ya sjoin ta yaiyel tsalaw te mach'atic ay yipique. Melel la yac' sba ta lajel stuquel, soc la sjoin ta ajtayel te mach'atic amenique. Ta smelelil, la scuchbey smulic tsobol ta jtul, soc c'opoj yu'un te jmulawiletique.