Isaías 52 - Bible in Tzeltal de Oxchuc y Tenejapa

Ya xjil ta libre Jerusalén

¹ Wic'a asit, ja'at Sión, wic'a asit, chajbana aba soc awip; ja'at ch'ul lum, Jerusalén, lapa ac'u' te mero c'ax jelawen yutsile. Melel te ants-winiquetic te ma pocbiluc yo'tanic, te ma'yuquic ta stojol te Diose, ma ba ya xcha'ochic xan bael ta awolil.

² Ja'at Jerusalén, jajch'an, tijt'ana loq'uel te tane, naclan ta amuc'ul nactijib. Ja'at Sión, jchuquel ach'ixat, loq'uesa te yugo-te' ta anuq'ue.

³ Te Cajwaltic ya yal: —Ma'yuc ni junuc centavo la quich' te c'alal baex ta mosoinel te ja'exe; ja' nix jich ma xcac' ni junuc centavo te ya jcoltayat tele.

⁴ Ta xjajch'ibal te lum cu'un bajt' ta Egipto, jich cuxinic tey a te bit'il jyanlum. Ta patil te Asiria la stojol-tenbon ta uts'inel.

⁵ Ta ora yo'tic ¿bi yacon ta yilel? Te Babilonia tojol nax la yic'bon bael te lum cu'une. Te mach'atic ya xmandalajic ta stojolique, toyol nax q'uinal ya yaiyic ta aw; ma xcomic ta sbolc'optaybelonic.

⁶ Ja'uc me to, ya me sta sc'aalelal te ya sna'bonic jba te lum cu'une; ya me sna' te jo'on te yacon ta sc'oponele, jo'on te Yajwalone —xi'.

⁷ Bin nax yutsil te mach'a ya xjul ta witstiquil, te mach'a ya yich' tel te lequil c'ope, te mach'a ya yalbey sc'oplal te lamal q'uinale, te mach'a ya yalbey sc'oplal te ainel ta libre. Jich ya yalbey te Sión: —Te Dios awu'une muc' Ajwalil stuquel —xi' me ta aw.

⁸ Aiya awaiy stojol. Ya me stoyes sc'opic te j'il-q'uinaletic awu'une, soc jun nax ya x'awunic yu'un te tsalawe. Melel ta sitic nix ya yilic te bit'il ya sujt' xan ta Sión te Cajwaltique.

⁹ Jajch'an ta aw ta ora yu'un te tsalawe, ja'at Jerusalén te jinem ats'ajc'ule. Melel te Cajwaltic la sna'beyix yo'bolil sba te lum yu'une, la yaq'uix ta libre te Jerusalén.

¹⁰ Te Cajwaltic la yaq'uix ta ilel te yu'el ta sit spisilic te nacionetique. Spisil ants-winiquetic ta spamal balumilal ya me sna'ic te la scoltayotiquix te Dios cu'untique.

¹¹ Loc'aniquix, loc'aniquix bael ta Babilonia; ma me x'apiquic te bila ma lecuc sc'oplale, loc'aniquix bael ta Babilonia. Lecubenuquex me ta lec, ja'ex te ya awich'ic bael sbiluquil te templo yu'un te Cajwaltique.

¹² Ja'uc me to, ma animalticuc nax ya xloq'uex bael; ma me aneluc ya xloq'uex bael. Melel te Cajwaltic te Dios yu'un Israel ya me scanantayat ta bayuc.

Swocolil ta tsalaw yabat Cajwaltic

¹³ Te cabate, lec me ya xc'ot ta loq'uel; ya me xtoyesot jajch'el, muc' me ya xc'ot.

¹⁴ Ja'uc me to, bayal xiw yo'tanic yu'un te la yilique; melel te yelawe yanajem ta ilel, ma pajaluquix soc ch'ich'-baq'uet yilel.

¹⁵ Ja' nix jich bayal nacionetic jchajp nax me q'uinal ya yaiyic; te muc' ajwaliletic, te c'alal ya yilique, ma me xwejt' bi ya yalic yu'un. Melel ya yilic, soc ya xc'ot ta yo'tanic te bi jc'axel ma'yuc bay yaiyojic stojole.