Isaías 51 - Bible in Tzeltal de Oxchuc y Tenejapa

Smuc'tesel q'uinal Jerusalén

¹ Ya xc'opoj te Cajwaltic, jich ya yal: —Aiybon awaiyic stojol apisilic te mach'aex ya ac'anic te toj ya xcuxinex, soc te ya aleonique. Ilawilic te ton banti la awich'ic loq'uesel tele; ja' te yawil ton te bay la awich'ic bulel loq'uele.

² Ilawilic te Abraham, te atatique, soc te Sara, te la yaq'uex ta q'uinale. Te c'alal la quic' tel loq'uele, stuquel nax ay ta q'uinal a; ja'uc me to, la cac'bey bendición soc la cac'bey bayal sts'umbal.

³ Ay me yutsil co'tan ta stojol te Sión, ja' te lum te jinem sts'ajc'ul ta spisile. Ta bay taquin q'uinal ya jc'atp'un ta yaxal q'uinal, jich bit'il t'ujbil te'etic la sts'un Cajwaltic ta Edén. Tey me ay yutsil a te q'uinale, soc bin nax yo'tanic ya xc'ajinic ta yalel yutsilal Dios soc música.

⁴ “Ja'ex lumetic, aiybon awaiyic stojol; aiybon awaiyic stojol, nacionetic: Ya jpuc bael te p'ijubtesel cu'une; te mandaliletic cu'un ya sacub q'uinal ta stojol te lumetic yu'une.

⁵ Ya xnoptsaj tel ta ora te tsalaw cu'une; te cat'el ta jcoltaywanej ay meix tel ta be. Ta swenta cu'el ya me xmandalajon ta stojol te lumetique. Te lumetic ta ti'mar ya me smaliyonic, ja' me ya smuc'ulin yo'tanic te cu'ele.

⁶ Toya moel asitic ta ch'ulchan, soc ilawilic coel te lumq'uinale; te ch'ulchane ya xtup' jichuc ch'ail, te lumq'uinale ya xlaj jichuc c'u'il, soc te ants-winiquetic ya xlajic jichuc ch'iquil. Ja'uc me to, jo'on ya cac' ta libre sbajt'el q'uinal, te colel cu'une ma'yuc slajibal.

⁷ “Aiybon awaiyic stojol ja'ex, te ya ana'ic te bila toje, te ay sc'oplal ya xc'ot ta awo'tan te p'ijubtesel cu'une. Ma me x'axi'ic te bolc'optayel yu'un te ants-winiquetique; ma xawac' abaic ta pejc'anel yu'un te yixta-c'opique.

⁸ Melel ya me xch'ayic ta jc'axel jichuc c'u'il te ya xlajinot ta joch'e, jich bit'il tsots te ya xlajinot yu'un te yaljae. Ja'uc me to, te tsalaw cu'une, sbajt'el q'uinal ay stuquel; te colel cu'une ya xjalaj sbajt'el q'uinal —xi' te Cajwaltique.

⁹ Wic'a asit, wic'a asit, yu'el Cajwaltic, chajbana aba soc awip; wic'a asit jich bit'il la apas ta namey, ja' te mero namey q'uinale. Ja'at la asesan te Rahab, te muc'ul xi'bil chambalam ta mar.

¹⁰ La atup'bey ya'lel te mar, te ja' te smuc'ul na'bilale, la ac'atp'un ta taquin be te yolil mar, swenta yu'un c'axic bael tey a te mach'atic la awac' ta libre.

¹¹ Ja' nix jich ya sujt'ic tel te mach'atic la yich' loq'uesel tel yu'un te Cajwaltique, soc ya x'ochic bael ta lum Sión. Ya me x'awunic ochel yu'un yutsil yo'tanic; ya me staic yutsil yo'tanic soc bin nax yo'tanic tey a. Te bitic c'ux la yaiyic, soc mel-o'tan, ya me xch'ayic bael.

¹² Ya yal te Cajwaltic: —Jo'on nix me ya jmuc'tesbat awo'tan. ¿Mach'a ya awaiyic a te ya axi'e? ¿Ja' bal te winiquetique? ¿Ja' bal te winiquetic ya xlajic, te jich nax c'oemic te bit'il aque?

¹³ ¿Ya bal xch'ay ta awo'tan te Awajwal te Jpaswanej awu'une, ja' te mach'a la slim bael te ch'ulchan, soc te la yac'bey yiptajib te balumilale? ¿Ja' bal julel bael ya xnijc' awo'tan yu'un spisil ora te sc'ajc'al yo'tanic te j'uts'inwanejetic awu'une, te xchajbanej sbaic yu'un sjinbelate? Ja'uc me to, ¿banti ay te sc'ajc'al yo'tanique?

¹⁴ Melel te mach'a c'ax swocol yu'un te uts'inele, yo'tic ya xjilix ta libre; ma ba ya xlaj ta bay chucjibal, ni ma xch'ay te swe'ele.

¹⁵ “Jo'on Awajwalon te Dioson awu'une; te jbiile, ja' te Ajwalil te Spisil ya xju' yu'une. Jo'on la jyuc' te mare soc awun yu'un te sbule.

¹⁶ La jlim bael te ch'ulchan soc la cac'bey yiptajib te balumilale. Jo'on la cac'bat ta awe te jc'ope, soc la jcanantayat ta yaxinal te jc'abe. La calbey te Sión: “Ja'at lumat cu'un”, la cut —xi' te Cajwaltique.

¹⁷ Wic'a asit, wic'a asit, Jerusalén, jajch'an. Ja'at la awaiybey swocolil yilimba te Cajwaltic, jich me c'oem te mach'a ya yuch' junuc copa, te ya yuch' sjunal ta jyalele, ja' to c'alal ya xyacub jilel.

¹⁸ Ta spisil te alaletic ay awu'une, ma'yuc jtuluc j'ic'wanej yu'unic tey a; ta spisil te awalatac la amuc'tese, ma'yuc jtuluc te ya snitat bael ta sc'abe.

¹⁹ Ja' tal ta atojol cheb woclajel: ja' te la yich' jinel te alumal soc la yich' pojel loq'uel te sbiluquile, soc ja' te lajic yu'un wi'nal soc ta guerra te ajo'taque. ¿Mach'a a te ya sna'bat yo'bolil aba? ¿Mach'a a te ya smuc'tesbat q'uinal awaiye?

²⁰ Jich bit'il ja'mal chij te la yich' stsaquel ta chojac', te anich'nab mero ma'yuc yipic, limilic ta lum, bayuc nax ta xujc' calleetic. Ejch'enajemic yu'un yilimba te Cajwaltique, swenta stojtesel yu'un te Dios awu'une.

²¹ Jich yu'un, ja'at te lum ma'yuc yutsil q'uinal awaiye, aiya awaiy stojol, ja'at te ma vinouc yacubenat yu'une.

²² Te Awajwal te Dios awu'une, te ya xc'opoj ta scoltayel te lum yu'une, jich ya yal: —Ya jpojbat loq'uel ta ac'ab te copa te yacat ta yacubel yu'une; ma xju' ya awuch' xan te bila ay ta copa, ja' te quilimbae.

²³ Ja' ya cac'beyix te mach'atic la yac'bat c'axuc awocole, ja' te mach'atic jich la yalbate: “Pajc'ana aba ta lum, ya me xc'axotic ta aba”, la yutat. Jich la apajc'an aba ta lum swenta yu'un jich la stec'at jichuc tan —xi' te Cajwaltique.