Isaías 5 - Bible in Tzeltal de Oxchuc y Tenejapa

Te ts'usubiltic, seña-c'op ta stojol Judá

¹ Ya jc'ajintay c'ayoj ta swenta te mach'a jun co'tan jba soque, ja' sc'ayojil cu'un te ts'usubiltic yu'une: Te mach'a jun co'tan jba soque ay ts'usubiltic yu'un, ta bay mero lec te q'uinale.

² La swuy te lum, la sloq'ues te tontiquil, soc la sts'un ts'usubetic ta bay tsabil ta leque. Ta yolilal ta bay ts'unbil te ts'usube la spas jajch'el toyol sts'ajc' swenta iljibal q'uinal, soc la xchajbanbey yawil ta bay ya yich' pits'el loq'uel te ya'lel ts'usube. Te mach'a jun co'tan jba soque yac ta smaliyel te ya xchi'uc te sit ts'usube; ja'uc me to, te sit la yaq'ue, pajic.

³ Jich ya yal: —Yo'tic, ants-winiquetic ta Jerusalén, ants-winiquetic yu'un Judá, alaic ja'ex te mach'a a te ay smule: ¿Ja' bal te ts'usubiltic cu'une? o ¿jo'on bal?

⁴ ¿Ay to bal bila pasel ya sc'an xan ta bay te ts'usubiltic cu'une? ¿Ay bal bi ma jpasojuc? La jmaliy te chi'uc la yac' sit te ts'usubetique, ¿bi yu'un te paj la yaq'uic te site?

⁵ Lec ay jiche, ya calbeyex awaiyic te bila jnopoj spasel ta stojol te ts'usubiltic cu'une: Ya jloq'uesbey smajq'uil swenta yu'un ya sjinic te mach'atic ya xc'axique; ya jch'oj coel te sts'ajc'ul swenta yu'un ya spech'ic ta teq'uel;

⁶ ya jpijt'es jilel. Ma ba ya yich' c'abuyel, ni ma ba ya yich' aq'uentayel; ya me xnoj ta ch'ixtiquil soc ta wanc'altic. Ya me jpas ta mandal te tocaletic te ma me xyaq'uic ja'al ta stojol —xi.

⁷ Te ts'usubiltic yu'un te Cajwaltic te Spisil ya xju' yu'une, te ts'unbil yu'un te smulaneje, ja' te nación Israel, ja' te lum Judá. Te Cajwaltic la smaliy te yacuc yich'beyic ta muc' te mandaliletic yu'une, pero ja' nax la sta jmilawaletic tey a; la smaliy te tojuc ya x'at'ejique, pero ja' nax la yaiy stojol aw soc ajc'an.

Chapal sc'oplalic mach'atic amen yat'elic

⁸ Ya me awil awocolic ja'ex te ya amanulayic bayal naetic, te ya aleic bayal aq'uinalique. Ja' to ya ac'an te atuquel ya awentain spamal te q'uinale, te ma'yuc mach'a jtuluc ya awaq'uix tey a; soc jich ya anajc'an abaic te bit'il ja'ex nax yajwalex yilel te lumq'uinale.

⁹ Te Cajwaltic te Spisil ya xju' yu'une, yalojbonix ta jamal: —Bayal me naetic ya yich'ic jinel; manchuc teme muc' yutsilalic ta jyalel, xujt' ma'yuc yajwal ya xjil.

¹⁰ Te oxeb hectarea ts'unbil ts'usub, ja' nax me ya xloc' ta pits'el ya'lel jun ch'in barril. Te lajuneb coxtal ya yich' awel trigo, ja' nax me jun coxtal ya xloc' a —xi'.

¹¹ ¡Ya me awil awocolic ja'ex te ma to sacub q'uinal a te ya xyacubexe, soc te q'uixnajemex yu'un te uch'balil c'alal ta stoyel ajc'ubal!

¹² Te c'alal ayex ta we'el swenta q'uin, ay sc'op arpaetic, salterioetic, c'ayobetic soc amayetic, soc bayal uch'balil vinoetic. Ni ma x'ana'ic jtebuc te bila ya spas te Cajwaltique, ni ma'yuc ta wenta awu'unic te bitic yat'ele.

¹³ Jich yu'un, te bit'il ma sc'an xyaiyic stojol te lum cu'une, ya me x'ic'otic bael ta mosoil. Ta spisil te lum soc te ajwaliletic yu'un ya me xlajic ta wi'nal soc ta taquinti'il.

¹⁴ Jich c'oem te bit'il jti'awal chambalam te muquenale, ya sjam ye, ma p'isbiluc ya sjam sba, swenta yu'un ya sbic' bael te lum soc te ajwaliletic yu'une, ja' te ants-winiquetic te cuxulic ta puro yacubel soc te bitic bujts'an yo'tanic yu'une.

¹⁵ Te ants-winiquetic jc'axel me ya yich'ic pejc'anel; te mach'atic jtoybaetic ya me stinan sbaic coel.

¹⁶ Te Cajwaltic te Spisil ya xju' yu'un, ya me yac' ta ilel te smuc'ul yat'el ta chajbanwanej; te Ch'ul Dios ya yac' ta ilel te xch'ul yutsilal ta yaiyel chajbanwanej.

¹⁷ Te lumetic ya me yich'ic jinel; ta bay jinem nanatique, tey me ya sle swe'elic a te chijetic soc te tentsunetique.

¹⁸ ¡Ya me awil awocolic, ja'ex te ya awich'ic te bila amen ta swenta lot, ja'ex te ya awich'ic te mulil, jich te bit'il mach'a ya stas carreta!

¹⁹ Jich ya awalic te ja'exe: “Te Diose ac'a spas ta ora te yat'ele, swenta yu'un ya me quiltic; te Ch'ul Dios yu'un Israel ac'a sc'otes ta pasel ta ora te bitic xchapoje, swenta yu'un ya me jna'beytic sba”, xaex.

²⁰ ¡Ya me awil awocolic, ja'ex te lec c'oem awu'unic te bila ma lecuque, soc te ma lecuc c'oem awu'unic te bila leque. Ja' c'atp'ujem ta saquil q'uinal awu'unic te ijc' q'uinale, yan te ijc' q'uinale ja' saquil q'uinal c'oem awu'unic. Ya ac'atp'unic ta ch'a te bila chi'e, yan te bila ch'ae ja' chi' ta awo'tanic!

²¹ ¡Ya me awil awocolic, ja'ex te ya acuy abaic te p'ijexe, soc te ya ana'ic q'uinal ta lec ta ac'opique!

²² ¡Ya me awil awocolic, ja'ex te ya stsalwanex ta yuch'el vino, soc te ma'yuc mach'a ya spajat ta xchajbanel te tragoe!

²³ Te ja'exe, ta scaj taq'uin te ya awalbey sc'oplal te ma'yuc smul te mach'a ay smule, soc te ma ba toj ya achajbanic te mach'a ma'yuc smule.

²⁴ Ja' yu'un, jich te bit'il ya xc'ajc' te aque, soc ora ya xlaj bael ta c'ajq'uel te staquin yabenal te te'etique, ja' ni me jich ya xch'ayex bael te ja'exe. Ja' me pajalat soc te te'etic ya xc'a'ic te yisime, te jich ya xc'atp'uj te bit'il tan te sniche. Melel la awilayic te p'ijubtesel soc te mandaliletic yu'un te Cajwaltic te Spisil ya xju' yu'un, ja' te Ch'ul Dios yu'un Israel.

²⁵ Ja' swentail te ilin Cajwaltic ta stojol te lum yu'une, soc te la stoy sc'ab ta yac'beyel castigo. Te witstiquile nijq'uic; te mach'atic lajemique ch'ojbilic jilel ta calleetic, jich bit'il c'a'pal. Ja'uc me to, te yilimba Cajwaltic ma to bay lamajem; ya to me yac' sc'ab ta yaq'uel castigo.

²⁶ Te Cajwaltic ya stejc'an jun bandera, ta xuxub ya yic' jun nación te c'ubul aye, ta bay c'axem to xan c'ubul ta balumilal ya me yic'. Ya me xtal ta ora, ya xtal ta buen animal.

²⁷ Ma'yuc jtuluc te peq'uel yip, ni ma xlubic, ma'yuc te mach'a ma wiq'uiluc sit ta lec, ma'yuc mach'a ma chuculuc xch'ujt' ta lec, ma'yuc mach'a tuch'em sc'ab xanab.

²⁸ Te yat'ejibal st'imique, jayic nax ta lec, soc buen nitil ta lec te st'imique. Te yejq'uechul yacan scaballoique, jich bit'il tulanil tonetic, soc jich bit'il sutu-ic' yilel te yacan te carretaetique.

²⁹ Te yawique, jich bit'il ya x'awun león-choj, ya xc'ux ye yu'un sc'ajc'al, soc ya stsac ta ora te bila ya stae, ya yich' bael, ma'yuc mach'a ya xju' ya spojbey.

³⁰ Te nación ya cale, te c'alal ya xc'ot sc'aalelal a, jich me ya x'awun ta stojol Israel jich bit'il ya x'awun te mar. Teme ay mach'a ya yil te balumilale, ya me yil te potsbil ta ijc' q'uinal, ijc'ubenix q'uinal yu'un te pimil tocale.