Isaías 49 - Bible in Tzeltal de Oxchuc y Tenejapa

Te yabat Cajwaltic ya yac' sacubuc q'uinal ta stojol nacionetic

¹ Aiya awaiyic stojol, ja'ex lumetic ta ti'mar; aiybon awaiyic stojol, nacionetic te c'ubul ayexe. Te Cajwaltic la yic'on te c'alal ma to x'ayinon a; la yalbon loq'uel te jbiil c'alal ayon to ta xch'ujt' a te jme'e.

² Te que, jich la sc'atp'un te bit'il puñal te juxbile, la snac'on ta yaxinal te sc'abe; jich la sc'atp'unon te bit'il sjayal sni' yat'ejibal t'im, tey la sq'uejon ta yawil te scuchoj ta spate.

³ Jich la yalbon: —Israel, ja'at cabatat, ja' me ta awenta te ya cac' ta ilel te cutsilale —xi'.

⁴ Te jo'on la calix ta co'tan: “Tojol nax c'axon ta at'el, la jlajin quip, ma'yuc bi la jta jtebuc a”, xoon. Ta smelelil ayonix ta swenta te Cajwaltic; te stojol jc'ab ay ta sc'ab te Dios cu'une.

⁵ Quich'oj ich'el ta muc' ta stojol te Cajwaltic te Dios cu'une, yu'un nix ja' quip stuquel a. Te Cajwaltic ju' la xchicnanteson c'alal ta xch'ujt' jme', swenta yu'un yabat me ya xc'oon. Ja' la yac'bonix ta jwenta sujt'esel ta stojol te Israel, ja' te lum yu'un Jacob, te jun me ya xc'ot soque.

⁶ Jich ya yalbon: —Ma tic'uc a te ja' nax cabat yu'un te ya anajc'an xan te jayeb ta jchajp sts'umbal Jacob, soc te ya apas te ya sujt' xan tel te mach'atic cuxulic xan ta Israel. Jo'on ya jpas te ya sacub q'uinal awu'un ta stojol te nacionetique, ja' te ya awich'bon bael te colel cu'un ja' to ta bay c'ubul q'uinal bael yu'un te balumilale —xi'.

⁷ Te Cajwaltic te J'ac'wanej ta libre, ja' te Ch'ul Dios yu'un Israel, ya yalbey te lum te jc'axel yich'ojix ilayele, ja' te yilayejic te jyanlumetique, ja' te yich'oj mosoinel yu'un te j'uts'inwanejetique: —C'alal ya yilex te muc' ajwaliletic soc te biq'uit ajwaliletic, ya me xjajch'ic, soc ya me xtal squejan sbaic ta atojol. Melel jo'on Ajwalilon, te Ch'ul Dioson yu'un Israel, la jtsaat, soc ya me jc'otes ta pasel te jc'ope —xi'.

Ya yich' pasel xan Jerusalén

⁸ Te Cajwaltic ya yal: —Ja' yorail a te ya caiybat stojol te ac'ope; soc ja' yorail colel a te ya jcoltayate. Jo'on ya jcanantayat. Ja' ya cac'bat ta awenta te trato cu'un soc te lume, ta swenta spasel xan te lumq'uinale, swenta yu'un ya yu'uninic xan te lumq'uinal te jineme.

⁹ Swenta yu'un ya yich' albeyel te mach'atic ayic ta chuquele: “Loc'anic ta libre”, xi' me sc'oplalic; soc ya yich' albeyel te mach'atic ayic ta ijc' q'uinale: “Loc'anic ta saquil q'uinal”, ya x'utot. Ta xch'ixil bael te beetic, ya me sta aquiltic tey a, soc ta bayuc ay te witstiquil te t'axale, ay me swe'el xchamsbalamic tey a.

¹⁰ “Ma me ayuc wi'nal, soc ma me ayuc taquinti'il ya yaiyic; ma x'uts'inotic yu'un te c'aale, ni sq'uixnal te q'uinale. Melel c'uxic ta co'tan soc ya xneelajon yu'unic, soc ya quic' bael ta sloq'uibja'etic.

¹¹ Ya me jam te be ta bay ya xc'ax bael ta witstiquil, soc ya me cac' te ya yich' pamanel te beetique —xi' te Cajwaltique.

¹² Ilawilic, ya xtalic ta mero c'ubul q'uinal: ay ya xtalic ta stojol norte, ay ya xtalic ta stojol smalib c'aal, soc ay ya xtalic ta bay sq'uinal Asuán.

¹³ Ja'at ch'ulchan, awunan yu'un yutsil awo'tan. Ja'at lumq'uinal, nojuc me yutsil awo'tan. Ja'ex witstiquil, wilanic ta aw yu'un yutsil awo'tanic. Melel te Cajwaltic la smuc'tesbeyix q'uinal yaiy te lum yu'une; la sna'beyix yo'bolil sba yu'un te swocole.

¹⁴ Te Sión la yal: —Te Cajwaltic la spijt'eson jilel; te Dios cu'une ch'ayon ta yo'tan —xi' wan ta yalel.

¹⁵ Ja'uc me to ya yal te Cajwaltic: —¿Ya bal xch'ay ta yo'tan yal te antse? ¿Ya bal yijq'uitay ta yo'tan xc'uxtayel te mero yale? Repente ya xch'ay ta yo'tan yal te antse, yan te jo'one ma xch'ayat ta co'tan atuquel.

¹⁶ Jc'axel ayat ta co'tan, spisil ora ay ta co'tan te ts'ajq'uetic awu'une.

¹⁷ Te mach'atic ya xcha'pasbeyex, ya me yaq'uic bael puersa c'ax jich te bit'il te mach'atic la sjinexe; bajt'iquix te mach'atic jochol la yijq'uitayat jilele.

¹⁸ Toya moel te asite, ilawil ta sjoyobal, ilawil bit'il ya stsob xan sbaic spisilic soc ya sujt'ic tel ta atojol. “Jo'on Ajwalilon te cuxulone, ya cal ta jamal, ta spisilic jichic bit'il xch'alil ac'u' te ya alape, jich c'oem te bit'il xch'alil jtul ach'ix te ya xnujbinixe.

¹⁹ Puro jinbil ts'ajq'uix ta neelal te alumale; jinbil, jojch'ajem jilel awu'un te lumq'uinale. Ja'uc me to, ta ora yo'tic te aq'uinale ch'in me ya xc'ot, yu'un ta scaj te ants-winiquetique. Te mach'atic la sjinate c'ubul ayic.

²⁰ Te anich'nab la acuy te ch'ayemic baele, ya yalbeyex ta achiquinic: “Ja' lumq'uinaltic mero ch'in xujt' me cu'untic; pasbotic muc' cawiltic yu'un ya xnainotic tey a”, xiic me.

²¹ Jich wan ya awal ta awo'tan: “¿Mach'a la yac'bon te alaletique? Jo'on ma'yuc calatac, soc ma ba x'alajon. Q'uejel ic'bilon bael ta yan lum, q'uejel ayon. ¿Mach'a la xch'ijtes? Jtuquel yijq'uitayejonic jilel. ¿Banti talemic?” xaat me —xi'.

²² Te Cajwaltic ya yal: —Ya me jpas ta mandal te nacionetic, ya cac'bey seña yilic te lumetique, swenta yu'un ya spetbeyex tel te anich'nabic, soc te awantsil-nich'nabique ya me scajanic tel ta snejq'uelic.

²³ Te muc' ajwaliletic jich me ya xc'otic te bit'il atatique, soc te yantsil-nich'nabique jmon-alal me awu'unic. Ya me spajc'an sbaic ta lum ta atojolic; ya me slec'beyic stanil te awacanique. Jich me ya ana'ic te jo'on Ajwalilon; soc te mach'atic ya yac' smuc'ul yo'tanic ta jtojol jich ma ba ya staic q'uexlal —xi' te Cajwaltique.

²⁴ ¿Ya bal xju' ta pojel loq'uel ta sc'ab te c'ajc'al winic te bitic stsacoj ta guerra? ¿Ya bal xju' xcol loq'uel jtul jchuquel ta sc'ab te jtsalwaneje?

²⁵ Te Cajwaltic ya yal te jich nix ya xc'ote: —Te c'ajc'al winique ya me xpojbot loq'uel ta sc'ab te bila yich'ojixe; te jtsalwaneje ya xpojbot loq'uel ta sc'ab te bila yich'ojix ta guerra. Jo'on me ya quil jba soc mach'a ya sc'an sleat yu'un ya yac'bat guerra; jo'on nix jtuquel ya jcoltaybat te anich'nabe.

²⁶ Ya me jsuj te j'uts'inwanejetic awu'un te ya xjajch' sti'ic te sbaq'uetalique; soc ja' ya cac' te ya xyacubic soc te xch'ich'elique, jich me ta yo'tanic te bit'il trago. Jich me ya sna'ic spisil te ants-winiquetic ta balumilal te jo'on Ajwalilon te Jcoltaywanejon awu'une; te jo'one, ja' Yipon Jacob, jo'on J'ac'wanejon ta libre awu'un —xi' te Cajwaltique.