Isaías 48 - Bible in Tzeltal de Oxchuc y Tenejapa

Cajwaltic ya yalbey sc'oplal bitic ya xtale

¹ “Aiya awaiyic stojol te bi ya cale, ja'ex te sts'umbalex Jacob, te ja' abiilinej te Israel, soc sts'umbalex Judá. Teme ay bila ya awalic ta jamal, ja' nax ya awalic ta swenta te Cajwaltique; ya ac'oponic te Dios yu'un Israel, manchuc me ma'yuc bila smelelil ni stojil ta awo'tanic.

² Ya awalic te tey talemex a ta bay te ch'ul lume, soc te ja' ya x'ipajex a te Dios yu'un Israel, te ja' sbiil te Ajwalil te Spisil ya xju' yu'une.

³ C'alal ta xjajch'ibal la calbey sc'oplal te bitic c'axemixe; jo'onix la cac'beyex ana'ic stojol. Ora nax at'ejon, c'ot ta pasel ta melel.

⁴ Melel jna'oj stojol te mero tulan te awo'tanique, te jich tulanex bit'il hierro, ma xju'ex ta puxel jichuc bronce.

⁵ Jich nameyix te la calbeyex, ja' la cal tel a te c'alal ma to xc'otta pasel a. Ja' yu'un ma xju' ya awalic: “Ja' la spasbotic te jcajcanantique, te loc'omba te la jpastique, ja' la yal mandal”, ma me xauquex.

⁶ Te ja'exe awaiyojic spisil, p'ijanic me yu'un. Jich me ya xch'uun awo'tanic te melel te bila la cale. Ta ora yo'tic ya calbeyex awaiyic bitic yach'il, ja' te bitic muquen te ma ba ana'ojique,

⁷ ja' te bitic ya xchicnaj yo'tic, ma me ja'uc te nameyixe, ja' te ma'yuc bay awaiyojbey sc'oplal ta alel ta c'alal ora yo'tic. Ja' yu'un ma xju' ya awalic: “Jna'ojtiquix stuquel”, ma me xauquex.

⁸ Te ja'exe ma'yuc bay awaiyojbeyic sc'oplal ta alel, ni ma ba ana'ojbeyic sba, melel macal te achiquinique. Jo'on jna'oj te ma tojuc awo'tanic ta jtojol, soc te atalel jc'axin-c'opex te c'alal ma to x'ayinex ae.

⁹ “Ja'uc me to, ta swenta te xc'uxul co'tan jtuquele la jts'icbeyex; soc ta swenta te lec jc'oplale, ma la jinex.

¹⁰ Jo'on la cutstesex; ja'uc me to, ma jichuc te bit'il ya yich' utstesel te plata. Jich la cutstesex ta woclajel, ta swenta sc'aal horno c'oem.

¹¹ Jich la jpas swenta yu'un ya me xchicnaj cutsilal jtuquel, melel ma xju' ta boltesel te jc'oplale. Ma jc'an te yan mach'a ya yac'bey yutsilalin te cutsilale.

Cajwaltic ya scoltay te lum yu'une

¹² “Aiybon awaiy stojol, ja'at Israel te lumat yu'un Jacob, te ja'at la quic'ate. Jo'on nax jtuquel te jip jtul Diosone, jtalel ayon ta sbabial soc ta slajibal.

¹³ Ta jc'ab la cac'bey sta yip te balumilale, ta jc'ab la jlim bael te ch'ulchane; te c'alal la calbey sbiil, jich jajch'ic ta chicnajel.

¹⁴ Tsoba abaic apisilic te ja'exe, soc aiya awaiyic stojol: ¿Mach'aex la awalbeyic sc'oplal te bila ya xc'ot ta pasele? Te winic te jtsaojixe ja' me ya spas te bila jnopoj te ya xc'ot ta pasel ta Babilonia soc ta stojol te sts'umbal caldeoetique.

¹⁵ Jo'on te jich la cale, jo'on la quic', jo'on la cac' taluc; soc te bay ya xbajt'e, lec ya xc'ot ta loq'uel.

¹⁶ Noptsajanic tel ta jtojol, aiya awaiyic stojol: C'alal ta xjajch'ibal, ma'yuc bay muquen a c'opojon; soc te c'alal c'ot ta pasel spisil, tey ayon a. Jich yu'un ta ora yo'tic te jo'on Ajwalilon la cac'beyix te cu'ele, soc la jticunix bael —xi' te Cajwaltique.

¹⁷ Jich ya yal te Cajwaltic te J'ac'wanej ta libre awu'une, te Ch'ul Dios yu'un te Israele: —Jo'on te Ajwalilon te Dioson awu'une; jo'on ya jp'ijubtesat ta swenta te alequilale, jo'on ya quic'at ta be ta bay ya sc'an ya at'un baele.

¹⁸ Ja' mero lec te lajuc awich' ta muc' te mandaliletic cu'une. Te jichuque, te awutsil-alequile jich a muc'ub c'oem te bit'il snojel ja'; jich me lec c'oat ta loq'uel te bit'il xquechet ya xbeen yip te mar.

¹⁹ Te ats'umbale ma me p'isbiluc yajtalul te jichuque, ma xju'ix ta ajtayel jich bit'il sji'al mar. Jo'on ma'yuc bi ora la sc'an co'tan te ya jinat te jichuque; ni ma la sc'an co'tan te ya quijq'uitayate, te ya jch'ay jsit ta atojole —xi' te Cajwaltique.

²⁰ Loc'anic ta Babilonia, ananic bael ta stojol te caldeoetique. Pucbeyaic sc'oplal ta aw soc yutsil awo'tanic te c'ope, soc ac'aic ta na'el stojol c'alal ta sti'il te q'uinale. Jich me ya awalic: “Te Cajwaltic la yaq'uix ta libre te Jacob te yabate”, xaex me.

²¹ Manchuc me la yac' c'axel ta bay jochol taq'uin q'uinaletic, ma la yaiyic taquinti'il; ja' la stob te tone, la yac' t'omuc loq'uel ta oquinel ja' tey a.

²² Ya yal te Cajwaltique: —Yan te mach'atic amenique, ma'yuc yutsil-slequil stuquelic —xi'.