Isaías 47 - Bible in Tzeltal de Oxchuc y Tenejapa

Laj Babilonia

¹ Te Cajwaltic ya yal: —Coan, naclan ta ts'ubil lum, ja'at te ach'ix Babiloniaat te ma to ayuc amamlale; coan ta amuc'ul nactijib, ja'at te ach'ix Caldeaate, naclan ta lum. Melel ma me ayuc mach'a ya yalbat xan: “T'ujbilat soc jteb stael te awutsilale”, te xi' ac'oplale.

² Tsaca me te acha', juch'a te harina. Loq'uesa te smujq'uil ajole, nita moel te atseque, t'anana te awa'e, c'axan ta awacan ta bay te muc'ja'etic;

³ ac'a chicnajuc abaq'uetal, ac'a chicnajuc ta jc'axel. Ya me quich'bey spacol, ma'yuc mach'a ya xju' ya scomon, manchuc me ya yalbon wocol —xi' te Diose.

⁴ Te J'ac'wanej ta libre cu'untique, ja' te Ch'ul Dios yu'un Israel, te sbiile: “Ajwalil te Spisil ya xju' yu'une”, jich ya yal:

⁵ —Ch'aban nax me ta naclej, ja'at te ach'ix Caldeaate, nac'a aba ta ijc' q'uinal. Melel ma'yuc mach'a ya yalbat xan: “Ja' mero me'il yu'un te nacionetique”, ma xiuc xan ac'oplal.

⁶ C'alal ilinon ta stojol te lum cu'une, la cac' ta q'uexlal, la cac' ochuc ta ac'ab. Te ja'ate ma la ana'bey yo'bolil sbaic, soc la awac'bey ta stojol mamaletic te yalal yugo-te' awu'une.

⁷ Jich la awal: “Jo'on me'el ajwalilon sbajt'el q'uinal”, xaat. Ma ba c'opoj awo'tan yu'un, ma la anop te bit'il ya xc'oat ta loq'uel ta slajibale.

⁸ Ja' yu'un, aiya awaiy stojol ora yo'tic to, ja'at ants te toyol awo'tan yu'un t'ujbil c'ulejalile, te jun awo'tan ayat ta amuc'ul nactijibe, te jich yacat ta yalel ta awo'tan: “Jo'on nax jtuquel, ma'yuc yan jich te bit'ilone; jo'on ma ba xjilon ta me'ba antsil, ma me yu'unuc ma'yuc calatac ya xjilon”, te xaate.

⁹ Ajc' nax, ta jun nax c'aal ya me xc'ot xchebal te woclajel ta atojole: me'ba ants ya xjilat, soc ma'yuc awalatac, manchuc me bayal buelta ya apas ac'-chamel soc pic-c'abal.

¹⁰ Te ja'ate awich'oj aba ta muc' soc te bila amen ya apase; soc la anop ta awo'tan: “Ma'yuc mach'a ya yilon”, xaat. Te ap'ijil soc te bitic ya ana' ta ac'ope, la slo'layat. La anop ta awo'tan: “Jo'on nax, ma'yuc yan jich te bit'ilone”, xaat.

¹¹ Ja'uc me to, ya xtal te woclajel ta atojol, ma xju' awu'un scomel manchuc me ay bitic chujc'ul te ya apase. Ya me xtal ta atojol te muc'ul woclajele, ma xju' awu'un smaquel; ja' te tulan woclajel ta atojol te ma na'biluc te ora nax ya xtale.

¹² Pasulaya me quiltic te ya ana' spiquel c'abal soc te ya awac' chamele, jich bit'il la apasulay te c'alal jch'ielat to ae. Ya me awil teme ya xtuun awu'un jtebuque; ya me awil teme ya xi'at a te ants-winiquetique.

¹³ Mero ma x'ajtabaj te mach'atic jtojteswanej awu'une, asta lubenatix yu'un. Ac'a taluquic te j'il-eq'uetic awu'une, te mach'atic ay bi ya xtal ta yo'tan ta yilel te eq'uetique, te mach'atic ya yalbey sc'oplal te bi ya xc'ot ta pasel ta jujun u, ac'a me yalic te ya scoltayate.

¹⁴ Ja'uc me to, pajalic soc te taquin ac; ora nax ya xc'ajq'uic, ma xju' ya scoltay sbaic loq'uel a. Melel te c'ajq'ue ma jichuc nax te bit'il ac'ale, te ya xnajc'ajat ta sts'eel te ya aq'uixnaj abae.

¹⁵ Jich ya xc'oat ta loq'uel soc te mach'atic ya sna'ic yilel te eq'uetique, te c'ax bayal bila la apas soc ta spisil a te acuxlejale. Juju-jtul la st'unic bael te slotil beique, ma me ayuc mach'a ya scoltayat.