Isaías 46 - Bible in Tzeltal de Oxchuc y Tenejapa

¹ Te loc'omba Bel ya spajc'an sba, soc te loc'omba Nebo ya xyal ta lum. Te loc'ombaetic cuchbilic bael ta burroetic soc ta yantic chambalametic; bayal yalal te ijc'atsil ya scuchic bael te chambalametic te lubenique.

² Te lotil diosetic ya stinan sbaic, ya xyalic ta lum, ma xju' yu'un scoltabel sbaic, ja'ic uuc ya x'ich'otic bael ta yan q'uinal.

³ Te Cajwaltic ya yal: —Aiybon awaiyic stojol, ja'ex sts'umbalex Jacob, apisilic te cuxulex xan te israelexe: Jo'on jcuchojex te c'alal ma to x'ayinex ae; la jpetex bael ta jc'ab.

⁴ Soc ja' nix jich ya jpasulay bael c'alal ya xmamalubex; te c'alal saquix ajolic a, ja' nix jich ayex ta jc'ab. La jpasix, soc jich nix ya jcuchex bael; ayex ta jc'ab soc ya jcoltayex.

⁵ “¿Mach'a ya apajon soc a te ja'exe? ¿Mach'a te pajalon soc ta ac'opique?

⁶ Ay mach'a ya sloq'ues bayal oro ta sbolsaic, soc ya slicbeyic yalal te plata; ya spas trato soc te jten-taq'uine, te yacuc pasbotuc junuc dios yu'un a, swenta yu'un ya squejan sba ta stojol soc ya xch'uun.

⁷ Ya scajan bael ta snejq'uelic, ya xbajt'ic soc; ya xc'o snajc'anic ta scajtijib, tey ya x'ain a, ni ma stij sba ta yawil. Manchuc me ya yawtayic bayal ta sc'anbeyel coltayele, jc'axel ma sjac', soc ma xju' yu'un ya scoltay ta xc'uxulil te swocolique.

⁸ “Na'aic me, jmulawiletic, ma xawac' abaic ta q'uexlal, nopaic ta lec;

⁹ na'aic me te bitic c'oemic ta pasel ta namey q'uinale. Jo'on nax Dioson, ma'yuc yan; Dioson jtuquel, ma'yuc yan pajalon soc.

¹⁰ Jo'on la calbey sc'oplal ta xjajch'ibal te slajibale; la jloq'ues ta alel te bila ya xc'ot bael te c'alal ta namey q'uinale. Jo'on ya cal te ya me yich' pasel te bitic ya jchajbane; ya me jpas spisil te bitic ya jloq'ues ta alele.

¹¹ La quic' jtul winic ta sloq'uib c'aal, te ya xtal ta c'ubul q'uinal. Jich bit'il ja'mal-mutetic te ya stsac sti'ic te chambalametique, jich ya xc'ot ta pasel te bitic chapal cu'une. Teme jich caloj, jich nix ya jpas; te bitic jchajbaneje, jich nix ya jc'otes ta pasel.

¹² Aiybon awaiyic, ja'ex te tulan awo'tanique, te yacalex ta yalel ta awo'tanic te bayal to c'aal ta jyalel te ya x'ochex ta libre.

¹³ Jo'on ya cac' te ya xnoptsaj tel te ya x'ac'awanon ta libre; te colel cu'une ma ba ya xjalajix, ma ba bayalix c'aal ya sc'an. Jo'on ya cac'bey Sión te colele; ja' ya cac'bey Israel te cutsilale —xi' te Cajwaltique.