Isaías 45 - Bible in Tzeltal de Oxchuc y Tenejapa

Te Cajwaltic la yac'bey ta swenta Ciro te at'ele

¹ Te Cajwaltic la yac'bey yat'el ta muc' ajwalil Ciro, la stsac ta sc'ab swenta yu'un ya smandaltes te nacionetique soc te ya spojbey yat'ejibic ta guerra te muc' ajwaliletique. Te Cajwaltic ya spas ta stojol Ciro te ya xjam te smajq'uil yochibal te lumetique, te ma me ayuc mach'a ya xju' yu'un smacticlayel. Ta ora yo'tic jich ya yalbey:

² —Jo'on ya xneelajon bael awu'unic, ya me jbusq'uin coel te witstiquile, ya me jc'as te smajq'uil yochibal lum te pasbil ta bronce, soc ya me jwuy te ch'ixil taq'uinetique.

³ Ya cac'bat te c'ulejalil te nac'bilique, ja' te c'ulejalil q'uejbilic ta muquen ta bay yawile, swenta yu'un ya me ana' stojol te jo'on Ajwalilon, te Dioson yu'un Israel, te la quic'at ta abiile.

⁴ Ta swenta xc'uxtayel cu'un te cabat Jacob, ja' te lum yu'un Israel te jtsaoje, la quic'at ta abiil soc la cac'bat awich' awat'el te ich'bilat ta muc' yu'une, manchuc me ma'yuc bay ya ana'bon jba te ja'ate.

⁵ Jo'on nax Ajwalilon jtuquel, ma'yuc yan; ma'yuc yan Dios jich te bit'ilone. Jo'on jchajbanejatix soc awip, manchuc me ma x'ana'bon jba,

⁶ swenta yu'un ya me sna'ic ta spisilic, te ayic ta sloq'uib c'aal c'alal ta smalib c'aal, ma me ayuc yan Dios jich te bit'ilone. Jo'on jtuquel Ajwalilon, ma'yuc yan.

⁷ Jo'on ya jchicnantes te saquil q'uinal soc te ijc' q'uinale; ya cac' utsubuc te q'uinale, ya cac' taluc te woclajele. Jo'on Ajwalilon ya jpas ta spisil.

Te yu'el Dios ma'yuc bi ya spajbey smuc'ul

⁸ “Jo'on ya jticun tel c'alal ta toyol te tsalawe, jich bit'il ts'ujul ya xyal tel ta ch'ulchan soc te ja'al yu'un te tocale. Te lumq'uinale ya me yuch', jich ya xchicnaj tey a te colel jich bit'il awalil ya sitin, soc ta sts'eel ya me snichin te bitic toj ta pasele —xi' te Cajwaltique.

⁹ Te pac'bil oxom te pajal soc yantic xan, ma xju' ya xjajch' ta c'op ta stojol te mach'a pasot yu'une. Te pac'bil ajch'al ma ba ya yalbey te mach'a ya x'at'ej ta stojole: “¿Bi yacat ta spasel?” ma xiuc. Te bila pasbil yu'une ma ba ya yalbey: “Te ja'ate ma x'ana' at'el”, ma xiuc.

¹⁰ Te jtul nich'anil ma xju' ya yalbey te sme'-state: “¿Bi yu'un la awac' ayinucon li' ta balumilal to?” te xie.

¹¹ Te Cajwaltic, te Ch'ul Dios yu'un Israel, te la xchajbane, ya yal: —¿Ya bal awich'bon jc'op yu'un te jnich'nabe? ¿Ya bal awac'bonic jnop te bi ya cut ya jpas te bitic ay cu'une?

¹² Jo'on la jchicnantes te balumilal soc te yajwale, la jlim bael ta jc'ab te ch'ulchane, soc la cal mandal te ya xchicnaj spisil te bitic xlemlajanic ta ch'ulchane.

¹³ Jo'on la jpas te ya xchicnaj te Ciro swenta yu'un ya me yaiy tsalaw; ma ba wocol ya jtojtes te beetic yu'une. Ja' me ya xcha'pasbon te lum cu'une, soc ya yac'bon ta libre te mach'atic baemic ta mosoil cu'une. Ma ba ya sc'anbey stojol te yat'el, ni yan majt'anil yu'un —xi'. Ja' c'opoj stuquel te Cajwaltic te Spisil ya xju' yu'une.

¹⁴ Te Cajwaltic ya yalbey te Israel: —Te mach'atic ya x'at'ejic ta q'uinal ta Egipto, te mach'atic jchonbajeletic ta Etiopía, soc te yajwal Sabá, te toyolic ta jyalele, ya me xtal yac' sbaic ta atojol. Abatetic me ya xc'ot awu'un; ayic me ta cadena ya st'unat bael. Ya me squejan sbaic soc ya me yalic wocol ta atojol: “Ta smelelil ay me ta awolilic te Diose, soc ma'yuc tsobol te Diose, ma'yuc yan”, xiic me ta yalel —xi' te Cajwaltique.

¹⁵ Ja'uc me to, ja' Diosat atuquel te ma chicanucat ta ilele, Diosat te Jcoltaywanejat yu'un Israel.

¹⁶ Spisilic te mach'atic ya spasic loc'ombaetic ya me xq'uexawic yu'un; peq'uel me ya xjilic soc ma'yuc sc'oplalic ya xc'otic.

¹⁷ Ja'uc me to, te Israel coltayotix yu'un te Cajwaltique, sbajt'el q'uinal te coltayel la yac'beye; mero ma xjilic ta q'uexlal stuquelic, ni ma me peq'ueluc ya xjilic yu'un.

¹⁸ Te jchicnanteswanej yu'un te ch'ulchane, ja' te Dios te Ajwalil stuquele, ja' te la spas te lumq'uinal soc te la xchajban, ja' te tulan la snajc'ane, te mach'a la xchicnantese, ma yu'unuc la sc'an te jochol ya xjile, ay me yajwal ya xc'ot, jich ya yal: —Jo'on Ajwalilon, ma'yuc yan.

¹⁹ Ma ba muquen ya xc'opojon ta bay ijc' q'uinal. Ma yu'unuc ya calbey te mach'atic sts'umbal Jacob: “Tey me ya aleon a te banti ma'yuc bi ay”, ma xoocon. Jo'on Ajwalilon smelelil ya xc'opojon, ja' ya cal te bila stojile —xi'.

Cajwaltic la stij ta c'op loc'ombaetic

²⁰ Te Cajwaltic ya yal: —Tsoba abaic, la'ic, noptsajanic tel ta apisilic te jaychajp mach'atic cuxulex to ta lumetique. Mero ma'yuc bi ya sna' te mach'atic ya sbeentesic yajcananic te pasbil ta te', te ya xjajch' sc'oponic te sdiose, te ma xju' ya xcoltayotic yu'une.

²¹ Ac'a c'opojicuc soc ac'a stejc'an sbaic ta yaq'uel pruebaetic, ac'a sjojc'obey sbaic, teme jich yo'tanique: “¿Mach'a la sneeltesbey sc'oplal ta alel ta xjajch'ibal in bitic to? ¿Mach'a la yalbey sc'oplal c'alal ta namey tel?” xiuquic me. ¿Ma bal jo'ucon te Ajwalilone? Ma'yuc yan Dios jich bit'ilon. Ta jtojol ma'yuc yan Dios te ya yaiy tsalaw soc te ya xcoltaywane.

²² “La'ic ta jtojol, ya me jcoltayex, ja'ex te lumetic ta bayuc ayuquex c'alal sti'il te balumilale, melel jo'on nax Dioson, ma'yuc yan.

²³ Jo'onix la jta jba ta alel jtuquel, la cal ta jamal te jo'on ya caiy tsalawe, te bila caloj ta jamal, ya me xc'ot ta pasel. La cal te ya me xtal squejan sbaic ta jtojol spisil te ants-winiquetique, soc ta spisilic ya me staonic ta alel.

²⁴ Jich me ya yalic: “Ja' nax te Cajwaltic te ay ta swenta tsalaw soc te ay yu'el stuquele”, xiic me. Spisilic mach'atic ya yac' slab yo'tanic ta jtojol, ya me xq'uexawic yu'un.

²⁵ Ta jwenta jtuquel, jtsalwanej ya xc'otic ta loq'uel spisil te lum Israel, soc toyem nax me q'uinal yaiyic cu'un —xi' te Diose.