Isaías 44 - Bible in Tzeltal de Oxchuc y Tenejapa

Ma xyanaj yo'tan Cajwaltic, ja' nax Dios stuquel

¹ “Aiybon awaiy yo'tic, Israel, lumat yu'un Jacob, cabatat te jtsaojate.

² Jo'on Ajwalilon te jchicnanteswanejon awu'un te la jchicnantesat te c'alal ma to x'ayinat a, jo'on la jcoltayatix. Ma xiwat, Jesurún, lumat yu'un Jacob, cabatat te jtsaojate.

³ Melel ya me cac' oquinuc ja' ta jochol taquin q'uinal, bebe-ja'etic ya xc'ot ta bay te taquin q'uinale. Jo'on ya cac'bey yach'il xcuxlejal te ats'umbale, te bendición cu'une ya jticunbey ta stojol.

⁴ Jich me ya xmuc'ubic te bit'il awalts'unubil te bueno ya yich' malel ta ja', jich bit'il sauce-te'etic ta ti'muc'ja'.

⁵ Ay me jtul ya yal: “Yu'unon Cajwaltic”, te xie, yan ya yal: “Ja' sts'umbalon Jacob”, te xie. Yan ya sts'ibuy ta sc'ab: “Ja' yu'unon te Cajwaltique”, te xie; soc ya me sbiilinbey xan sbiil Israel —xi' te Cajwaltique.

⁶ Te Cajwaltic, ja' te muc' ajwalil soc J'ac'wanej ta libre yu'un Israel. Te Cajwaltic te Spisil ya xju' yu'une, ya yal: —Jo'on ayon ta sbabial soc ta slajibal; ma me ayuc yan dios jich te bit'ilone.

⁷ ¿Ay bal mach'a pajalon soc? Ac'a c'opojuc, soc ac'a xcholbon caiy teme aye. ¿Mach'a yalojbey sc'oplal c'alal ta xjajch'ibal te bit'il ay ta patile? ¿Soc mach'a ya yal te bila ya xc'ot ta pasel baele?

⁸ Ja'uc me to, muc'ubuc awo'tanic, ma me xiwex. Te jo'one jich la calbey sc'oplal c'alal to ta namey q'uinal, soc te ja'exe testigoex cu'un. ¿Ay bal yan dios jich te bit'ilone? Ma'yuc yan anjibal; ma'yuc yan quiloj —xi' te Cajwaltique.

Ma lecuc ta ch'uunel loc'ombaetic

⁹ Ma xtuunic te mach'atic ya spasic te loc'ombaetique, soc ma xtuunic te loc'ombaetic te bayal sc'oplal ta yo'tanique. Te mach'atic ya xjajch' xch'uunic, ja' ma'sitetic c'oemic, te ma sna'ic q'uinal ta jyalele. Ja' swentail te jc'axel ya xch'ayic ta q'uinal yu'un te q'uexlale.

¹⁰ Te mach'a ya xchajban yajcanan te ya xch'uune, te jich c'oem ta yo'tan te bit'il dios yu'une, tojol ya xch'ay c'aal a.

¹¹ Spisil te mach'atic ya xch'uunique, ya xq'uexawic yu'un. Te mach'atic yat'elinejic spasel te loc'ombaetique, winiquetic nax. Teme spisilic ya x'ochic ta tejc'anel ta ich'el ta c'op, peq'uel me ya xjilic, soc ya me xq'uexawic yu'un ta c'axem to xan.

¹² Ya me quiltic te bila ya spas te jten-taq'uine: Ya stsac te taq'uine, te c'alal tsajubenix ta c'ajc' yu'un a, ya xjajch' xchajban stenel ta martillo. Buen tulan at'el ya spas soc te sc'abe. Teme ma xwe' te jten-taq'uine, ya xlaj yip te sc'abe, soc teme ma xyuch' ja'e, ya xlub.

¹³ Soc ya quiltic te mach'a ya x'at'ej soc te': Ya yich'bey sp'isol ta regla, ya squits'bey srayail ta lapiz soc compás. Ta ora ya stsac te formon, ya xjajch' ta at'el. Jich ya spastaj loc'omba, te ja' sloc'omba winic yilele, buen t'ujbil nax yutsil. Ora ya xba snajc'an ta templo.

¹⁴ O teme ay mach'a sts'unoj te cedroetic te ya xmuc'ub yu'un te ja'ale; jich ay cedroetic te ya sts'ete. O c'antaj soc c'antulan te yac ta scanantayel ta ja'maltic, ja' to c'alal muq'uix ta lec a.

¹⁵ Jich te ants-winiquetic ya xtuun yu'un spasel sc'ajc' a; ya yich'ic bael smajc'alel yu'un ya sc'atinic; soc yan xan smajc'alel ya spay swe'el a; soc yan xan smajc'alel ya spasbey sloc'omba a te dios yu'une, te ya xjajch' squejan sba ta stojol.

¹⁶ O teme olil te te' ya yac' xtil ta c'ajc', ya swo ti'bal a. Ya sti' te wobil ti'bale, bujts'an yo'tan ya xjil yu'un. Soc ya sq'uixnay sba a, jich ya yal yu'un: “Mero lec te bit'il ayon ta sts'eel te c'ajq'ue; yaconix ta chic' yu'un”, xi'.

¹⁷ Yan te sobrail te te' ya spasbey sloc'omba te dios yu'une, ya squejan sba ta stojol ta xch'uunel, soc ya yalbey wocol: “Coltayawon, melel ja'at diosat cu'un”, xi' ta yalel.

¹⁸ Te ants-winiquetic ma sna'ic q'uinal ta jyalel, ma xc'ot ta yo'tanic. Ma'situbenic ta jyalel te ma xju' yu'unic yilele; mero macal ta jyalel te yo'tanique, jich ma sna'ic stojol.

¹⁹ Ma xju' yu'unic snopel, ay to sc'an na'el yu'unic te ya xc'ot ta yo'tanique, te yacuc yalic: “Olil te te' la cac' tiluc c'ajc' a, te ac'ale tac'aj tel jwe'el a, la jwo ti'bal a soc we'on; te smajc'alele la jpas a te bila ilaybile. Jun smajc'alel te' te bi yacon ta xch'uunele”, te xiuque.

²⁰ Te mach'atic jich ya spasique, ta mero melel jich c'oem te bit'il yacalic ta slo'el c'ajc'al tane; melel ya yac' sbaic ta lo'layel yu'un te lotil nopjibaletique. Te mach'atic jich ya spasique, ma xju' ya scoltay sbaic. Mero ma'yuc sp'ijilic ta sna'el stojol te bitic ay ta sc'abic te puro lote.

Cajwaltic ya spasbey perdón soc ya scoltay Israel

²¹ Te Cajwaltic ya yal: —Israel, te lumat yu'un Jacob, na'a me te ja'at cabatate; ja'at cabatat, melel jo'on la jchajbanat. Israel, ma me xch'ayon ta awo'tan.

²² Jo'on la jch'aybatix ta jc'axel te faltaetic soc te muliletic awu'une, jich bit'il ya xch'ay ta jc'axel te tocale. Sujt'anic tel ta jtojol, melel cac'ojatix ta libre —xi'.

²³ Ja'at ch'ulchan, awunan, binuc nax awo'tan yu'un te bila spasoj te Cajwaltique. Toyesaic ta alel, “Bin nax yutsil”, xaanic me, ja'ex te ayex ta yet'al balumilale. Ja'ex witstiquil soc ja'maletic ta apisilic soc te te'etic awu'unique, binuc nax me awo'tanic ta aw. Melel te Cajwaltic la yac' ta ilel te yutsilale; libre la yac' te Israel, te lum yu'un Jacob.

²⁴ Te Cajwaltic jich ya yalbat, ja' te J'ac'wanej ta libre awu'une, te la xchicnantesat te c'alal ma to x'ayinat a: —Jo'on Ajwalilon, te la jchicnantes spisil te bitic aye; jo'on la jlim bael te ch'ulchane, soc la jtulantes te balumilale, ma'yuc mach'a la scoltayon.

²⁵ Ma xcac' te ya xc'ot ta pasel te bila la yalbey sc'oplal te lotil j'alwanejetique; jo'on ya cac' jowejuc sjolic te mach'atic ay bila ya xtal ta yo'tanique. Jo'on ya cac' ya scontroin sbaic ta c'op te mach'atic p'ijique; soc te bitic ya sna'ic, puro jowil c'op me ya xc'ot ta loq'uel.

²⁶ Ja'uc me to, ja' ya cac' c'otuc ta pasel sc'op te abatetic cu'une; soc te lecuc ya xc'ot ta loq'uel te bitic chajbanbil yu'un te mach'atic jticuneje. Ya me cal ta jamal, te Jerusalén ya xnoj xan yajwal, soc te lumetic yu'un ta Judá ya me yich' xan pasel. Jo'on ya cac' jajch'uc xan te jinem ts'ajq'uetic yu'une.

²⁷ Jo'on ya xju' ya cal mandal te ya xtaquej te mar, soc te beja'etic yu'un, mero ma'yuc ya'lel ya xjil.

²⁸ Jo'on ya calbey te Ciro: “Ja'at me jcanan-chijat cu'un ya xc'ot; ya me apas spisil te bila ya sc'an co'tane”, ya me cut. Soc ya calbey te Jerusalén: “Te ja'ate ya me awich' xan pasel”, ya me cut; soc te ja'at templo: “Ya me yich' aq'uel te awiptajibe”, ya me cut —xi' te Cajwaltique.