Isaías 43 - Bible in Tzeltal de Oxchuc y Tenejapa

Ja' nax Jcoltaywanej stuquel Cajwaltic

¹ Ja'uc me to, ta ora yo'tic, Israel, te lumat yu'un Jacob, te Cajwaltic te la xchicnantesate, ya yalbat: —Ma xiwat, jo'on la cac'atix ta libre; jo'on la quic'at ta abiil, jich la cu'uninat.

² Teme ay ya xc'axat ta mar, tey me ayon ta atojol; teme ay ya at'un c'axel muc'ja', ma ba ya ajic'an. Teme ay ya xc'axat ta c'ajc', ma ba ya xc'ajc'at; ma ba ya xchic'at te c'ajq'ue.

³ Melel jo'on Awajwalon, te Jcoltaywanejon awu'une, te Ch'ul Dioson yu'un Israel. Jo'on jmanojat; te atojol te la cac' te la jcoltayat, ja' te Egipto, Etiopía soc Sabá.

⁴ Melel toyem atojol la caiy ta co'tan, muc' ac'oplal cu'un soc c'uxat ta co'tan. Swenta yu'un ya cu'uninat soc ya jcoltaybat acuxlejal, jich ta awenta ya cac' winiquetic soc nacionetic.

⁵ Ma me xiwat, melel joinejat me. C'alal ta sloq'uib soc smalib c'aal, ya quic' sujt'el tel te ants-winiquetic awu'une swenta yu'un ya yich' xan tsobel.

⁶ Ya calbey te mach'a ay ta norte: “Sujt'esbon tel a”, ya me cut, soc ta bay sur: “Ma me x'acombon”, ya me cut. Ic'bon tel te jnich'nab queremetic soc te ach'ixetic, c'alal ta c'ubul q'uinal, ja' to ta sti'il te balumilale.

⁷ Ic'bon tel spisilic te mach'atic yich'ojbonic te jbiile, te mach'atic la jchicnantes soc te la jchajbane, ja' te mach'atic la jpas swenta yu'un ya xchicnaj a te cutsilale.

⁸ “Ticunaic tel te lum cu'une te ay sitic pero ma xyilic q'uinal, soc te ay xchiquinic pero ma xyaiyic c'op.

⁹ Tsoba abaic tel apisilic, lumetic, tsoba abaic tel, nacionetic. ¿Mach'a ta yolilic te neel yalojbey sc'oplal? ¿Mach'a yalojbey sc'oplal te bitic c'oemix ta pasele? Teme ay testigoetic yu'un te melele, ac'a stejc'anic, swenta yu'un jich me ay ta aiyel stojol soc ta alel te smelelile —xi' te Cajwaltique.

¹⁰ Te Cajwaltic ya yal: —Ja'ex testigoex cu'un, te abatetic te la jtsa jtuquele, swenta yu'un ya me sna'bonic jba soc ya me smuc'ulinon yo'tanic, soc te ya xc'ot ta yo'tanic te mach'aon a. Ma'yuc bay yan dios te neel chicnajem cu'un a; ma'yuc bay ya xchicnaj xan tel yan ta patil te bit'ilone.

¹¹ Jo'on nax jtuquel te Ajwalilone; ma'yuc yan mach'a ya xju' ya xcoltaywan, jo'on nax jtuquel —xi'.

¹² Te Cajwaltic ya yal: —Jo'on la calbey sc'oplal soc tulan c'opojon. La cal te la jcoltayexixe; ma'yuc bay la spas jich yan dios, soc te ja'exe testigoex cu'un.

¹³ Jtalel ayon te Dioson jtuquele. Ma'yuc mach'a ya xju' ya sloq'uesat ta jc'ab. Ma'yuc mach'a ya xju' ya xch'ay ta jc'axel te bila ya jpase —xi'.

¹⁴ Te Cajwaltic te Ch'ul Dios yu'un Israel, ja' te Mach'a ya yaq'uex ta libre, jich ya yalbeyex: —Ta swenta bit'il ya jcoltayex te ja'exe ya jticun bael winiquetic ta Babilonia, soc ya cac' ta jamel spisil te ti'nailetique. Te bit'il bin nax yo'tanic te caldeoetic, ya xc'atp'uj ta xc'uxul mel-o'tan.

¹⁵ Jo'on Ajwalilon, te la jchicnantesex te Israelex; jo'on te Ch'ul Dioson soc muc' ajwalilon awu'unic —xi'.

¹⁶ Te Cajwaltic la sjam c'axel be ta yolil mar, jun be ta yolil ja' te mero c'ax bayal yipe;

¹⁷ tey la yac' ochel spisil a te soldadoetic te mero c'ax bayal yipique, soc carretaic soc caballoetic yu'unic ta swenta sjinelic. Jc'axel lajic jilel, ma ba la stam sbaiquix jajch'el; jich a laj ta jyalel te bit'il ya xtup' sc'aal smechail te c'ajq'ue.

¹⁸ Yo'tic jich ya yalbey Cajwaltic te lum yu'une: —Ma me x'ana'ix te wojeye; ma me x'ana'ix te bitic c'axemix tele.

¹⁹ Ay me bi yach'il ya jpas, ya me awil te yo'tic nix ya xchicnaje. Ya jam be ta jochol taquin q'uinal soc ya cac' ja'etic tey a.

²⁰ Ya me yich'onic ta muc' te ja'mal chambalametic, te ja'mal ts'i'etic soc te mutetic avestruz sbiilique. Melel ya cac' xt'om loq'uel ja' ta jochol taquin q'uinal; ya cac' ja'etic tey a swenta yu'un ya cac'bey yuch' te lum tsabil cu'une.

²¹ Ja' te lum te chajbanbil cu'une, swenta yu'un ya yalbonic yutsil jc'oplal.

²² “Ja'uc me to, ja'at Israel te lumat yu'un Jacob, ma la ac'oponon, lubat ta jtojol.

²³ Ma la awac'bon chic'bil jmajt'an chijetic; ma la awich'on ta muc' soc milbil majt'anil. Ma ba lubat cu'un te la jc'anbat majt'anil; soc ma la cuts'inat yu'un sujbelat ta sc'anel pom.

²⁴ Ma la amanbonic tel jalal te bujts'an yic', swenta yu'un ya awich'bon tel ta majt'anil ta jtojole; soc ma la awac'bonic bayal xepuil te milbil chambalametique. Ja'uc me to, ja' nax la alubesonic yu'un te amulique; la awuts'inbonic co'tan yu'un te bila amen la apasique.

²⁵ “Ja'uc me to, ta scaj te Dioson awu'unic ya jtup'beyex te mulil awu'unic, soc ma ba ya jna'beyex xan.

²⁶ Na'a me teme ay bila ay ta awo'tan ta jtojole, ya me cac' jbatic ta chajbanel. Ich'bon tel te c'opetic awu'une, ya me awil teme ma'yuc amul ya xc'oat ta loq'uele.

²⁷ Te sbabial ame'-atat la sta smul; te maestroetic awu'unic jelawic ta jtojol;

²⁸ te ajwaliletic awu'unic la sboltesbonic te templo. Ja' swentail te la quijq'uitay jilel te lum Israel, ja' te lum yu'un Jacob, te la yich'ic jinel soc ixtac'optayel.