Isaías 42 - Bible in Tzeltal de Oxchuc y Tenejapa

Te abat yu'un Cajwaltic

¹ “Li' ay te cabat, te mach'a ya jwentain, ja' te tsabil cu'une, te mach'a bin nax co'tan yu'une. Cac'ojbey ta stojol te espíritu cu'un swenta yu'un ya me yich' tel te stojil ta chajbanel ta spisil te nacionetique.

² Ma ba x'awun, ma me xtoy sc'op; ma me xyac' ta aiyel stojol sc'op ta calleetic.

³ Ma ba ya slajin sc'asel ta jyalel te jalal te c'asemixe; ma ba jc'axel ya stup'bey sc'aal te smechail c'ajc' te c'un nax yac ta tilele. Ta mero melel ya me yich' tel stojil chajbanel.

⁴ Ma ba ya xlub, ni ma ba ya xch'ay te smuc'ul yo'tane, ja' to teme chicnaj te stojil chajbanel ta balumilale. Te lumetic ta ti'ti'mar jun me yo'tan ya yaiyic stojol te p'ijubtesele —xi' te Diose.

⁵ Te Cajwaltic Dios, ja' la xchicnantes te ch'ulchane, la slim bael jichuc pac'. La xchajban te balumilal soc te bitic ya xch'i tey a; ja' ya yac'bey xcuxlejal soc ja' la yac'bey yich' ic' te ants-winiquetic te nainemic tey a. Jich ya yalbey te yabate:

⁶ —Jo'on te Ajwalilone la quic'at tel soc la jtsacat ta jc'ab, swenta yu'un ja' me ya xtuunat yu'un te colele. Jo'on la jchajbanat, jich yu'un ya jc'an te ja'ucat señailat te trato cu'un ta stojol te lume, te ja' ya sacub q'uinal awu'un ta stojol te nacionetique.

⁷ Ya jc'an ya ajambey sit te mach'atic ma'sitetique, soc ya aloq'ues te mach'a ayic ta chucjibale, ja' te chucjibal ta bay nainemic ta ijc' q'uinal.

⁸ Jo'on Ajwalilon, ja' me jbiil abi, soc ma me xju' te ya cac' yutsilalin yan te cutsilale; jo'on nax me jtuquel ya x'ich'oton ta muc', ma me ja'uc te loc'ombaetique.

⁹ Ila me awilic te c'ot ta pasel spisil te bi la cal ta nameye, ta ora yo'tic ja' ya calbeyix sc'oplal te bitic yach'ile; neel me ya cac'beyex ana'ic stojol te ja'exe te c'alal ma to xchicnaj a —xi' te Cajwaltique.

C'ayoj ta yalel wocol te Diose

¹⁰ C'ajintayaic te Cajwaltic ta yach'il c'ayoj; c'alal ta bay c'ubul ayex ta balumilal, albeyaic yutsil ja'ex te ya xbeenex ta barco ta mar, soc te chambalametic nainemic tey a, te lumetic ta ti'ti'mar soc te yajwalique.

¹¹ Binuc nax yo'tanic te jochol taquin q'uinal soc te lumetic yu'une, soc te nanatic yu'un te sts'umbal Cedar. Ac'a c'ajinuc soc sbujts' yo'tanic te yajwalic te lum Sela; ac'a stoyes tel sc'opic ta jol witstiquil.

¹² Albeyaic yutsilal Cajwaltic soc pucbeyaic yutsil sc'oplal ta lumetic ta ti'ti'mar.

¹³ Te Cajwaltic ya me xloc' tel jichuc jtul winic te ay yipe; ya me yac' puersa ta yaq'uel guerra jichuc jtul soldado. Ya me stoyes sc'op, ya me x'awun yu'un guerra; soc ya me stsal te scontrotaque.

¹⁴ Te Cajwaltic ya yal: —Bayal c'aal te ma'yuc bila la cal; ch'abal nax q'uinal cu'un soc la jcom jba. Ta ora yo'tic ya x'awunon, jich bit'il ants te ya x'ayin te yale; ya me x'ajc'anajon soc ya me jic' co'tan.

¹⁵ Ya me jin te witstiquil soc te ch'in witsetique; taquin ya quijq'uitay te ste'elique. Ya jc'atp'un ta taquin q'uinal te ja'etique; taquin ya quijq'uitay jilel te pampam ja'etique.

¹⁶ Ya me quic' bael te ma'sitetic ta bebetic soc ta bay ch'in be te ma xyilique. Ya me jc'atp'un ta saquil q'uinal ta stojolic te ijc' q'uinale, soc ya me jc'atp'un ta spamlej ta bay chujc'ulique. Te bitic la cale ya me xc'ot ta pasel cu'un ta puersa.

¹⁷ Te mach'atic ja' smuc'ul yo'tanic te loc'ombaetique, soc teme ay yajcananic ya yalbeyic: “Ja'ex me te diosex cu'untique”, teme xiic ta stojolique, ya me sq'uej sbaic bael yu'un q'uexlal abi.

Ma'situben Israel

¹⁸ “Cojc' chiquinetic, aiya me awaiyic stojol; ma'sitetic, p'ijanic, ilawilic.

¹⁹ Ma'yuc mach'a c'ax to xan ma'sit a, ni c'ax to xan cojc' a te bit'il cabat, ja' te mach'a jticuneje. Ma'yuc mach'a c'ax to xan ma'sit a, ni c'ax to xan cojc' a te bit'il te j'alwanej, te yabat te Cajwaltique.

²⁰ Bayal bitic ya yil, ja'uc me to, ma xyil c'oem; ya xju' ya yaiy stojol, ja'uc me to, xujt' ma xc'ot ta yo'tan.

²¹ Te Cajwaltic, te bit'il Dios stuquel te ya xcoltaywane, la sc'an yo'tan ya spas muc' soc jelawen yutsil te p'ijubtesel yu'une.

²² Pero ja' te lum, ya x'elc'anbot soc ya xpojbot loq'uel sbiluc, ta spisilic ac'otiquix ta chuquel, ac'otiquix ta mero yutil chucjibal. Ya xtsacotic ta jyalel, ma'yuc mach'a ya x'ac'otic ta libre yu'un; ya xmacotic ta chucjibal, ja'uc me to, ma'yuc mach'a ya xloq'uesotic yu'un —xi' te Cajwaltique.

²³ ¿Ja'uc me to, mach'aex a te ja'exe te ya xch'uun awo'tan te bila la cale? ¿Mach'a te jich yo'tan ta yaiyel stojol te bi ya xc'ot ta pasele?

²⁴ ¿Mach'a la yac' permiso te ya yich' tsalel te Israel, te lum yu'un Jacob, soc te ya xba yich' pojbeyel te sbiluque? ¿Ma bal ja'uc la yac' permiso ta melel te Cajwaltique? Melel ja'ic la sle smulic ta stojol Dios, ma la sc'an st'unic bael te be te ac'bot yilic yu'une, ma la xch'uunbeyic te p'ijubtesel yu'une.

²⁵ Ja' swentail te ilin ta stojolic. La yac'bey castigo ta tulan guerra, ora nax a tilic jichuc c'ajc'. Ni ja'uc c'ot ta yo'tanic a.