Isaías 41 - Bible in Tzeltal de Oxchuc y Tenejapa

Dios ya yal ya xcol ta libre Israel

¹ Te Cajwaltic ya yal: —Ch'abanic nax me ta jtojol, ja'ex lumetic ta ti'ti'mar. Nacionetic, chajbana abaic apisilic soc te awipique. La'ic me, swenta yu'un ya jchaptic te aiyeje; ya jtsob jbatic ta xchajbanel.

² ¿Mach'a la yac' chicnajuc ta bay sloq'uib c'aal te muc' ajwalil te puersa ya spas ya yaiy tsalawe? ¿Mach'a ya yac'bey ta sc'ab nacionetic soc te ya spejc'an ta stojol te muc' ajwaliletic yu'unic, swenta yu'un ta spuñal soc ta yat'ejibal st'im ya me slic bael soc ya me spuc bael ta wilesel jichuc taquin ac?

³ ¿Mach'a ya spas te ya xnutsawan, soc te jun nax yo'tan ya xc'ub baele, jich c'oem te ma chicanuc ya xbeene?

⁴ ¿Mach'a la spas? ¿Mach'a a ta xjajch'ibal to tel te xmelmon la yac' c'otuc ta pasel spisil ta sba te balumilale? Jo'on te Ajwalilon, te jtuquel Dioson, te ayon ta sbabial soc ta slajibal.

⁵ Te lumetic ta ti'ti'mar la yilic soc bayal och xiwel ta yo'tanic; nijc' te lumq'uinal ta juju-jejch' sti'il te q'uinale. Ya stsob sbaic tel, ya xtal yilic.

⁶ Juju-jtul te mach'atic ay bila sna'ojix spasel, ya scoltay sbaic soc ya yac'bey smuc'ul yo'tan te sjoy ta at'ele.

⁷ Te mach'a carpintero ya yac'bey smuc'ul yo'tan te mach'a ay bila ya sna' spasel ta oro; te mach'a ya yac' martillo ya yac'bey smuc'ul yo'tan te mach'a ya sten taq'uin ta stenjibale, soc jich ya yal te lec te spac'jibal taq'uine. Soc ya yac'bey xan tejc'ajuc ta lec yu'un lawuxetic te loc'ombae, swenta yu'un ma sts'eunajuc ya xc'ot a.

⁸ Te Cajwaltic ya yal: —Aiya awaiy stojol Israel, lum yu'un Jacob, te cabat te jtsaoj jtuquele, ja' te lum te sts'umbal Abraham, te jun co'tan jba soque:

⁹ Jo'on la jloq'uesat tel ta sti'il te balumilale, la quic'at loq'uel tel ta xujc' q'uinal te c'ubul aye, soc jich la calbat: “Ja' cabatat”, la cutat. Jo'on la jtsaat, ma la jch'ojat bael ta co'tan.

¹⁰ Ma me xiwat, joinejat me; ma me xnijc' awo'tan, melel jo'on te Dioson awu'une. Jo'on ya cac'bat awip, jo'on ya jcoltayat; ja' me jtsacojat ta jc'ab te jtsalwanejone.

¹¹ Spisil te mach'atic ay slab yo'tanic awu'une, ya me xjilic ta q'uexlal soc peq'uel me ya xjilic; te mach'atic yac'ojic puersa yuts'inbelate, jc'axel me ya xch'ayic bael ta jyalel.

¹² Lea xan awil te acontrotaque; ja'uc me to, ma'yuc bay ya ataix ta leel; te mach'atic ya yac'bat guerra, jich me ya xc'ot te ma'yuc bay chicnajemic ta q'uinale.

¹³ Melel te jo'on te Awajwalon te Dioson awu'une, jtsacojat ta jc'ab; jo'on calojbat: “Ma me xiwat, ya jcoltayat”, xoon me —xi' te Diose.

¹⁴ Te Cajwaltic tulan ya yalbey sc'oplal: —Israel, te lumat yu'un Jacob, manchuc me ch'in xujt'at, soc teme ma'yuc awipe, ma me xiwat, jo'on ya jcoltayat. Jo'on, te Ch'ul Dioson yu'un Israel, jo'on Jcoltaywanejon awu'un.

¹⁵ Ya jc'atp'unat ta sloq'uesjibal spat trigo te yach'il soc te lec ye; ya me awuy te witstiquile, ya me ac'atp'un ta tan, ya me awuy jichuc c'ajben te bay bujajtique.

¹⁶ Ya me ach'oj moel, ya me yich' bael te iq'ue; te sutu-iq'ue ya me spuc bael. Jich yu'un te ja'ate bin nax me awo'tan ta stojol te Cajwaltique, toyol nax me q'uinal ya awaiy yu'un te Ch'ul Dios yu'un Israel.

¹⁷ “Te ants-winiquetic te ma'yuc bi ay yu'unique, ya sle ja' yuch'ic; ja'uc me to, ma ba ya staic. C'ax taquinajem yeic yu'un te taquinti'ile; ja'uc me to, jo'on te Ajwalilon ya me cat'elin yaq'uel, te jo'on te Dioson yu'un Israel, ma ba ya jpijt'es.

¹⁸ Ya cac' t'omuc loq'uel tel ja'etic ta witstiquil ta jochol taquin q'uinal soc sloq'uibja'etic ta yolil xatajtic; ya me jc'atp'un ta lo'obetic te jochol taquin q'uinale, ya cac' xt'om loq'uel ja'etic ta bay ma xyac' te ja'ale.

¹⁹ Ta jochol taquin q'uinale ya jts'un cedroetic, acaciaetic, arrayanetic soc olivoetic; ta bay taquin te q'uinal ya cac' ch'iuc tel tajaltic tey a soc te abetoetic soc te c'antajetique.

²⁰ Ta spisil ants-winiquetic ya me yilic soc ya me sna'ic te jo'on Ajwalilon, te jpasoj soc te cu'ele. Ya me yaiyic stojol soc ya me xc'ot ta yo'tanic te jo'on, Ch'ul Dioson yu'un Israel, te jo'on la jchicnantese —xi' te Diose.

Dios ya xq'uexlaltes lotil diosetic

²¹ Te Cajwaltic, te Dios yu'un Jacob, jich ya yal: —La'ic, loc'ombaetic, la', coltaya abaic; la'ic me, c'opojanic yu'un te ac'oplalique.

²² La'ic me, alaic te bila ya xc'ot bael ta pasele, soc cholbotic caiytic sc'oplal te bila c'oemix tel ta pasele, ya me caiytic stojol; albotic te bitic ya xc'ot ta pasel ta patil, swenta yu'un ya quiltic te bit'il ya xc'ot ta loq'uele.

²³ Albotic caiytic te bitic ya xc'ot ta pasel ta patilale, ac'botic quiltic teme diosex ta melele. Pasaic ta bay ya xju' awu'unique, chican teme lec o amen, te ya xnoj xiwel ta co'tantic yu'un soc te ya xnijc' co'tantic yu'une.

²⁴ Ja'uc me to, te ja'exe ma'yuc atuulic ta jyalel, ma'yuc bi ya xju' awu'unic. Ch'ayemic te mach'atic la stsaex sdiosinexe.

²⁵ “La cac' chicnajuc jtul winic ta stojol sloq'uib c'aal; la calbey sbiil, jich tal, ya xjul tel ta bay norte. Ya me spech' ta teq'uel te ajwaliletic, jich bit'il ya yich' teq'uel ajch'al, jich bit'il jpac'jom te ya swots' ta teq'uel te ajch'ale.

²⁶ ¿Mach'a la yalbey sc'oplal c'alal to ta xjajch'ibal, swenta yu'un ya jna'tic stojol a? ¿Mach'a la yalbey sc'oplal ta namey, swenta yu'un ya stsac co'tantic te jichuque? Ma'yuc jtuluquex la awalbeyic sc'oplal te ja'exe, ma'yuc bay awac'ojic ta aiyel stojol jp'aluc ac'opic.

²⁷ Jo'on la calbey sc'oplal ta stojol Sión c'alal ta xjajch'ibal; soc jo'on la jticun bael ta Jerusalén jtul j'alwanej, swenta yu'un ya xba yalbey te lum te nopolix ya sujt' tel te yajwale.

²⁸ Yacon ta yilel te ma'yuc jtuluc te jcuybilic ta diosetic ya xchicnaj; ma'yuc mach'a ya yalbon te bila lec ta pasele, ma'yuc mach'a ya sujt'esbon te bila ya jojc'oe.

²⁹ Ma'yuc bi ayic a, ni jtebuc. Ma'yuc bi ya xju' yu'unic spasel; jocholic, yolq'uinal loc'ombaetic.